sonin.mn
Сэтгэгдэл (5)

Ардчилсан Намын Даргад нэр дэвшигчдийн сонгуулийн бодлогын мэтгэлцээн боллоо. Мэтгэлцээн хоёр цаг орчим үргэлжлэв. Ардчилсан Нам намын даргад нэр дэвшигчдийнхээ дунд мэтгэлцээн явуулж буй нь Монголын улс төрд бас нэгэн шинэ соёл, шинэ хандлагыг түгээж буй явдал боллоо. Нэр дэвшигчид ч аль аль нь чамтай бэлтгэлтэй, өөр өөрийн онцлогтой, үзэл бодолтой байв.

Гэхдээ үнэт зүйлийн ялгаа бараг л байсангүй.


Харин улсын эдийн засгийг бүхэлд нь харж, асуудал ба шийдлийг зөв тодорхойлж буй байдлаараа О.Цогтгэрэл хамаагүй илүү байлаа.


"Өнөөдөр бүх эдийн засаг төсөвжиж, төржиж, төвлөрчихөөд байна. 2017 онд 6 их наяд төгрөгийн татварын орлого төр авдаг байсан бол өнөөдөр 30 их наяд төгрөгт хүрсэн. Найман жилийн дотор ачаалал зургаа дахин ихсэж хувийн хэвшлийн орон зайгаа шахаж хумьсан нь харагдаж байна. Одоо ДНБ-ний 40 хувьд хүрсэн асуудлыг 25 хувьд хүргэнэ. Эдийн засаг “чөтгөрийн тойрогт” орсон. Уул уурхайн баялгийг төрийн өмчит компаниудаар халамж болгон тарааж улс төрийн ялалтыг худалдаж авч байгааг хална. Төвлөрсөн эдийн засгийг төрөлжүүлнэ. Төржсөн эдийн засгийг иргэдэд, төсөвжсөн эдийн засгийг бизнесийнхэнд хүргэх ёстой" гэсэн түүний яриаг онцолмоор байв.


Мөн АН-ын 2024 оны ялалтын гол хүчин зүйлийн нэг нь зөөлөн дэд бүтэц бий болгох гэж харж буйгаа илэрхийлсэн нь тун оновчтой байсан юм. Үнэхээр ч өөрөө 30 жил улаан байсан аймагт ялалт байгуулсан АН-ын анхны улс төрч тул түүний яриа хоосон биш гэдгийг нотлох мэт. Түүнчлэн нэн эгзэгтэй асуултуудаад "Намын хамт олон шийднэ, намынхаа Үндэсний Бодлогын Хорооны гишүүдийн саналыг сонсоно" гэх зэргээр хариулсан нь гишүүд төвтэй дарга байж, багаар тоглох зарчимтай нэгэн гэдгийг нь илтгэж байв. Товчхондоо бол АН-ын даргад нэр дэвшигчдийн мэтгэлцээнд О.Цогтгэрэл илүүрхлээ.


Б.Намуун