sonin.mn
Сэтгэгдэл (19)

УИХ-ын гишүүн, АН-ын бүлгийн дарга О.Цогтгэрэл Ардчилсан Намын даргад нэр дэвших хүсэлтээ өглөө. АН-ын Дотоод Сонгуулийн Хороонд хүсэлтээ холбогдох баримтын хамт хүлээлгэн өгснийхөө дараа тэрээр мэдээлэл хийв.


Энэ үеэрээ тэрээр: "Миний бие АН-ын журмын нөхөдтэйгээ ярилцаад АН-ын даргын сонгуульд албан ёсоор өрсөлдөх хүсэлт, мөрийн хөтөлбөрөө хүлээлгэн өглөө. Би АН-д гишүүнээр элсээд 25 жил болж байна. ҮБХ-ын гишүүнээр сонгогдоод 10 жил, УТЗ-ийн гишүүн болоод 8 жил, сүүлийн хоёр парламент дамжаад УИХ дахь АН-ын бүлгийн даргаар ажиллаж байна. 10 жилийн өмнө дунд шатны буюу аймгийн намын даргаар ажиллаж байсан, АН-ын бүх л үе шатаар дамжиж явсан бүтээгдэхүүн гэдгээ тодотгож хэлье.


Монгол улсын эдийн засаг, улстөрд хийх ёстой шинэчлэл маш их байна. Шинэ шатанд гарах шаардлагатай болсон. Үүнийг улстөрийн аль хүчин хийж чадах юм бэ? Магадгүй АН л ганцхан энэ шинэчлэлт, өөрчлөлтийг хийж чадна гэдэгт би эргэлздэггүй. Хамгийн тулгамдсан асуудал бол хүн амын 3 хүн тутмын 1 нь ядуу байна. Дахиад 3 хүн тутмын 1 нь ядуурлын шугаманд маш ойрхон байна. Энэ ядуурлын цаана ардчилсан тогтолцоо өөрөө эмзэг байдалд орчихжээ. Ардчилсан намын олон ялагдлын шалтгаан нь энд байна.



Тийм ч учраас Ардчилсан нам ялах ёстой. Бүр ялсан шиг ялаад, засагласан шиг засаглах нийгэм улстөр, эдийн засгийн хэрэгцээ шаардлага байна.



Өнгөрсөн хугацаанд АН ялж чадаагүй шалтгаан бол улстөрийн систем болж чадаагүй явж ирсэн. Шинэ монголоо цуг бүтээцгээе. Шинэчлэгдсэн АН үүнийг хийж чадна гэдэгт эргэлзэхгүй байна. Л.Оюун-Эрдэнийн Засгийн Газар Монгол Улсыг талцал хуваагдлаар, айдас хүйдсээр удирдах гэсэн системийг угсарч байсныг би буруутгаж хандаж ирсэн. " гэлээ.



М.Чой