ВАШИНГТОН, 2025 оны наймдугаар сарын 29 /BBC/. АНУ-ын Холбооны нөөцийн сангийн /ХНС/ удирдах зөвлөлийн гишүүн Лиза Күүк өөрийг нь огцруулахыг оролдсон гэх үндэслэлээр Ерөнхийлөгч Д.Трампын эсрэг шүүхэд нэхэмжлэл гаргажээ. Ингэснээр АНУ-ын Төв банкны бие даасан байдалд нөлөөлж болзошгүй хууль эрхзүйн тэмцэл эхэлж байна. 

Л.Күүк шүүхээс Д.Трампын тушаалыг “хууль бус бөгөөд хүчингүй” гэж зарлахыг хүссэн бөгөөд ХНС-гийн дарга Жером Пауэллийг мөн буруутгажээ. Д.Трамп мэдэгдэхдээ, Л.Күүк орон сууцны зээлийн талаар худал мэдээлэл хийсэн гэж үзэх “хангалттай шалтгаан” байгаа гээд Үндсэн хуулийн дагуу түүнийг огцруулах эрх мэдэл өөрт нь бий гэдгийг сануулжээ. Л.Күүк өмнө нь өөрийг нь ажлаас халах “хууль эрхзүйн ямар ч үндэслэл байхгүй” гэж байв.

Ерөнхийлөгчийн зүгээс, бодлогын хүүг бууруулахад хойрго хандаж байна гэж үзэн ХНС-д шахалт үзүүлсээр байна. Л.Күүк бол бодлогын хүүг тогтоох эрх мэдэл бүхий удирдах зөвлөлийн гишүүн юм. Пүрэв гарагт шүүхэд гаргасан нэхэмжлэл нь АНУ-ын Дээд шүүхийн түвшинд хүртэл үргэлжилж магадгүй байна.

“Энэхүү нэхэмжлэл нь Л.Күүкийг албан тушаалаас нь огцруулах гэсэн урьд хожид үзэгдээгүй хууль бус оролдлогыг эсэргүүцэж байгаагийн илэрхийлэл бөгөөд хэрэв түүнийг халах аваас Удирдах зөвлөлийн түүхэн дэх анхны тохиолдол болно” гэж Л.Күүкийн өмгөөлөгч Аббе Лоуэлл мэдэгджээ.

Харин Цагаан ордны хэвлэлийн төлөөлөгч Куш Десай BBC телевизэд мэдээлэхдээ, Ерөнхийлөгч Д.Трамп Л.Күүкийг огцруулахын тулд хууль ёсны эрх мэдлээ ашигласан гэлээ. ХНС-гийн тухай хуулиар ХНС-гийн албан тушаалтныг дур зоргоороо огцруулах эрхийг Ерөнхийлөгчид өгөөгүй боловч Д.Трампын хэлснээр “тодорхой шалтгаанаар” үүнийг хийхийг зөвшөөрдөг байна.

ХНС-гийн удирдах зөвлөлийн долоон гишүүний нэг болох Л.Күүк өөрийг нь ажлаас халах шалтгаан бий гэдгийг няцаасаар ирсэн бөгөөд хуулийн мэргэжилтнүүд ч мөн Д.Трампын байр сууринд эргэлзэж байгаагаа илэрхийлжээ. Д.Трамп үүрэгт ажилдаа эргэн орсноосоо хойш ХНС-д, ялангуяа Ж.Пауэллд бодлогын хүүтэй холбоотойгоор шахалт үзүүлсээр байгаа юм. АНУ-ын Ерөнхийлөгч уг албан тушаалд нэр дэвшигчдийг санал болгодог тул Л.Күүкийг огцруулснаар хүүг бууруулах, Д.Трампын эдийн засгийн хөтөлбөрт нааштай ханддаг хүнээр түүнийг солих боломжтой гэсэн үг юм.

Э.Хулан

Эх сурвалж: "Монцамэ" агентлаг