sonin.mn
Сэтгэгдэл (0)

Нийслэлийн удирдах ажилтнуудын шуурхай зөвлөгөөн өчигдөр боллоо. Шуурхайн эхэнд нийслэлийн удирдах ажилтнуудын өнгөрсөн шуурхай зөвлөгөөн дээр өгсөн үүрэг даалгаврын биелэлтийг Хяналт шинжилгээ, үнэлгээний хэлтсийн дарга Х.Гантулга танилцуулсан юм. Түүнчлэн энэ удаагийн шуурхай зөвлөгөөнд Хан-Уул дүүргийн Засаг дарга Ж.Ганхуяг, Улаанбаатар хотын Ерөнхий менежер бөгөөд Захирагчийн ажлын албаны дарга Ч.Бат нар товч мэдээлэл хийсэн.


ЗАРИМ СУРГУУЛИЙН ЗАСВАРЫН АЖИЛ ДУУСААГҮЙ БАЙНА


Энэ жилийн хувьд хичээлийн нээлтийн бэлтгэл ажилтай холбоотой засварын ажилд нийтдээ 5.3 тэрбум төгрөгийн 105 багц ажил хийгдэж байгаа. Эдгээр ажил нь бүрэн дуусаагүй байгаа бөгөөд ерөнхийдөө 90 гаруй хувьтай байгаа ч хичээлийн шинэ жилийн нээлтийг хийхэд ямар нэг хүндрэл учруулахгүй байхаар зохион байгуулсан ба цаашлаад сургалтын үйл ажиллагаа хэвийн болоход энэ засварын ажил нөлөөлөхгүй ерөнхийдөө 10-р сарын нэгэн гэхэд эцсийн байдлаар дуусна гэсэн төлөвлөгөөтэй байгааг нийслэлийн Боловсролын газрын дарга танилцуулсан. Ирэх жилийн сургуулиудын төсвийн саналыг хүргүүлсэн ч одоогоор тодорхой биш байгаа учир задаргааг нь хэлэх боломжгүй байгаа ажээ. Өнөөдрийн байдлаар засварын ажлаас болж нийслэлийн хэмжээнд нэг цэцэрлэг үйл ажиллагаагаа эхлээгүй байгаа бөгөөд засварын ажил есдүгээр сарын 15 гэхэд дуусах юм байна.

Түүнчлэн Сонгинохайрхан дүүргийн 9 дүгээр сургуулийн засварын ажил нэлээд хойшилжээ. Учир нь, хоёр корпустаа ээлжлэн засвар хийж байгаа учраас одоогоор гурван ээлжээр хичээллэж байгаа аж. Засварын ажил энэ долоо хоногтоо багтаад дуусна. Гуравдугаар сургуулийн байрыг энэ жил ашиглах боломжгүй гэсэн мэргэжлийн байгууллагын дүгнэлт гарсан учраас 4, 16 дугаар сургуулийн нэг нэг давхарт гурван ээлжээр хичээллэж байгааг албаны хүн дуулгасан.

ХҮНСНИЙ ЗОРИУЛАЛТТАЙ АГУУЛАХЫГ ТООЛЖЭЭ


"Цаг үеийн ажлыг эрчимжүүлэх тухай" нийслэлийн Засаг дарга 2012 оны наймдугаар сарын 24-ний өдрийн 03 тоот албан даалгаврыг хэрэгжүүлж нийслэлийн хэмжээнд төмс, хүнсний ногоо нөөцлөх агуулах, зоорийн хэвийн нөхцөлийг хангахыг холбогдох хүмүүст үүрэг болгосон. Энэхүү ажлын явцын талаар Үйлдвэрлэлийн хэлтсийн дарга тэргүүтэй ажлын хэсэг явж танилцжээ. Ажлын хэсэг нийслэлд байгаа хүнсний зориулалттай зоориудыг тоолж байгаа бөгөөд өнөөдрийн байдлаар найман дүүрэгт 38863 тонн багтаамжтай 61зоорь байна гэсэн тооцоог гаргажээ. Өмнөх жилүүдэд 31-ээс 32 мянгаар тоологддог байсан гэнэ. Түүнчлэн энэ удаагийн шуурхай зөвлөгөөний үеэр сүүлийн үед мал аас хүнд халддаг бурцеллёз өвчний тархалт ихсээд байгаатай холбоотойгоор улсаас өнгөрсөн онд баруун бүсийн таван аймгийн малыг урьдчилан сэргийлэх вакцинжуултанд хамруулсан.

Энэ жилийн хувьд үлдсэн 17 аймгийн малыг урьдчилан сэргийлэх вакцинжуултанд хамруулж байгаа. Энэ вакцинжуулалтын ажил нийслэлд ч мөн адил явагдаж байгаа хэдий ч зарим дүүрэгт маш хангалтгүй явж байгааг хотын удирдлагад сануулсан юм. Хэдийгээр Мал эмнэлгийн газраас шаардлагатай вакцин тариурыг хуваарилсан, мэргэжлийн тоног төхөөрөмжүүдээр хангасан ч вакцинжуулалтын явц хангалтгүй байгаа ажээ.

ХУУРАМЧ ДУГААР ҮЙЛДВЭРЛЭСЭН ҮЙЛДВЭРИЙН ГАЗРЫГ ХААНА


Нийслэлийн замын түгжрэлийг бууруулах зорилгоор автомашины дугаарын сүүлийн орноос хамаарч хөдөлгөөнд оролцуулж байгаатай холбоотойгоор хуурамч дугаартай машинууд замын хөдөлгөөнд оролцох нь нэмэгдэж байгаа.Тиймээс хотын дарга замын цагдаа нарт хуурамч дугаартай автомашиныг илрүүлж жолоочийнх нь жолоодох эрхийг нь хасч, хуурамч дугаар үйлдвэрлэж байгаа үйлдвэрийн газрын мөн эрхийг нь хасах үүргийг өгсөн. Түүнчлэн хэвлэл мэдээллийн хэрэгслээр зарлахыг сануулсан. Энэ ажлын явц ямар байгаа талаар хотын дарга мэдээлэл сонссон юм. ЗЦГ-ын дэд дарга, хурандаа Жаргалсайхан "Одоохондоо ЗЦГ-аас улсын дугаар үйлдвэрлэдэг 10 аж ахуй нэгж байгууллагуудад мэдэгдэл шаардлага өгсөн. Улсын дугаарыг ямар нэгэн зөвшөөрөлгүйгээр иргэдэд хэвлэж өгөх асуудлыг зогсоох тухай.


Үүнд манайхаас холбогдох байцаагч нар хяналт тавьж ажиллаж байгаа. Мөн авто тээврийн газраас эдгээр байгууллагуудад мэдэгдэл хүргүүлсэн. Гудамж замд хяналт шалгалт хийж, улсын дугаар нь бүдгэрсэн, байршил харьяалалтай газраасаа зөрсөн, улсын дугааргүй болон улсын дугаарыг сольж зүүн хөдөлгөөнд оролцож байгаа зэрэг зөрчил дээр хяналт тавьж нэг өдөрт дөрвөн зөрчил илэрч байна. Эдгээр зөрчилд захиргааны арга хэмжээ авах, эрх хасах хүртэл арга хэмжээ авч байгаа. Мөн хэвлэл мэдээллийн хэрэгслээр элдэв зөрчил гаргахгүй байхыг уриалж байна. Хяналт шалгалт хийснээс хойш өдөрт улсын дугааргүй зорчих 40-50 зөрчил илэрдэг байсан бол сүүлийн өдрүүдэд харьцангуй цөөрсөн нь манай ажлын үр дүн гэж бодож байна. Цаашдаа хэвлэл мэдээллийнхэнтэй хамтран эдгээр зөрчлийг гаргахгүй байх талаас нь илүү сайн ажиллана" хэмээн хэллээ.

МЭРГЭЖЛИЙН ХЯНАЛТЫНХАН МЭЛЗЭВ ҮҮ?


Хичээлийн шинэ жилийн эхний өдөр Гуравдугаар эмнэлгийн орчим шавар зуурагч машин зам хөндлөн гарч явсан охины дээрээс унаж амь насыг нь хөнөөсөн. Мэргэжлийн хяналтын газраас тус барилгын компанид мэдэгдэл өгсөн гэдэг ч тус барилгын компани "нэг ч мэдэгдэл аваагүй" хэмээсэн байна. Үүнд Мэргэжлийн хяналтын газрынхны албан ёсны хариултыг хотын дарга сонсохыг хүссэн. Харин энэ талаар МХГ-ын дэд дарга "Энэ осол МХЕГ-т хамаагүй" гэж мэдэгдсэн төдийгүй "Манайхаас мэдэгдэл хүргүүлсэн. Зогсоох албан шаардлага болон актыг өгөөгүй байсан. Акт өгөөгүй болохоор шүүхэд хандаагүй" гэсэн хариултыг өгсөн юм.

Ийнхүү холбогдох албаны хүмүүсийн мэдээллийг сонссоны дараа хотын дарга ирэх 14 хоногт анхаарч ажиллах болон хийх ажлын үүрэг чиглэлийг өгсөн юм.

Б.Долгордулам

Эх сурвалж: "Улаанбаатар таймс"