sonin.mn
Сэтгэгдэл (0)

Дээдсүүдийн тэнэглэл хэрээс хэтэрлээ. Бууриа сэлгэж, өрх тусгаарласан экс Ерөнхийлөгч шударга байхыг уриалж, зөвхөн үнэний дуу хоолойг нийгэмд бий болгоно гэж байсан нь ердөө л хоосон үг байсныг түүний үг, үйлдэл бүр гэрчлэх боллоо.

Дахин төрсөн мэт шинэ хүн болсон гэж байсан ч өнөөх л дүрсгүй, жудаггүй зан нь өөрчлөгдсөнгүй. Жил гаруйн өмнөөс хуулийн байгууллагынхан түүнээс тайлбар авах гэж хамаг аргаа барсан. Ямартаа л эцэст нь хүч хэрэглэх вэ дээ. Түүнд Монголын төрд хашиж үзээгүй албан тушаал . гэж үгүй. Тиймдээ ч төрийн их сүр хүч, халдашгүй дархан эрхийн файзыг нүүрэндээ наасан эл эрхэмд хуулийн байгууллагынхан шууд халдалгүй аясыг нь дагасаар өнөөг хүрсэн. Харин энэ зуур экс иргэн, сонгогчдын сэтгэл санаагаар наадах ээлжит шоугаа хэдийнэ төлөвлөж сууж. Н.Энхбаярын баривчилгаанд сүр бадруулсан хуулийн байгууллагынхны арга барил хэтэрхий хуучинсаг, сүржин, болхи байсан нь үнэн. Тэгвэл үүнээс илүүтэй хаалгаа эвдэж орж ирэхийг нь хүлээж, суусан экс Ерөнхийлөгчийн сэтгэлгээ үнэхээр инээдтэй юм. Тусгай хамгаалалтынхнаар дотор үүдээ “хамгаалуулж”, хуучны фракцийн нөхөд, намынхнаараа хүрээлүүлж, хэвлэлд ярилцлага өгсөн шигээ гаднах байдлыг ажиглаж, цагдаагийнхныг даапаалж суусныг нь орон даяар харсан.



Өнгөрсөн хугацаанд түүний холбогдоод байгаа хэргийн золиосонд олон хүн буруудаж, зарим нэг нь аавын хаалга татаж байхад экс юу ч дуугараагүй. Чимээгүйхэн байдлыг ажиж байсан. Тэр ч бүү хэл, мөр зэрэгцэж явсан журмын нөхрөө нэр төрд нь халдсан хэмээн Сүхбаатар дүүргийн шүүхэд өгсөн шигээ хийх ажлаа олдож ядаж байв. Тодруулбал, энэ оны эхээр Хууль зүй, дотоод хэргийн сайд Ц.Нямдоржийг Н.Энхбаяр хуулийн өмнө шалгагдаагүй байхад нь худал мэдээлэл цацаж, нэр төрд нь халдсан хэмээн 100 сая төгрөг нэхэмжилж байлаа.



Харин энэ удаад жирийн л нэг баривчилгааг сүр дуулин болгож, өөрийгөө өрөвдүүлэх гэсэн түүний төлөвлөгөө тун амжилттай хэрэгжсэн. Уг нь хүн хулгайлахдаа “сурамгай" Б.Хурц дарга өөрийн биеэр очсон бол эксийн сцениар “будаа” болох байлаа. Намайг шалга хэмээн бардамнаж байсан экс Төв аймгийн хориход хүргэгдсэн даруйдаа захидал бичиж, эцэст нь өлсгөлөн зарлаж сүржигнэв. Хэрэг хийсэн хүн бүр тэнд л “тухлах” ёстой гэдгийг тэр тун сайн мэднэ. Гэвч “Би л биш” гэж хашгичих нь түүний зорьж, тэмүүлж байсан шударга төр биш байлтай. Бусдын өмнө бурхан шиг царайлж байсан эрхмийн үнэн төрх ердөө л энэ.



Хуулийн өмнө хүр бүр тэгш эрхтэй хэмээх Ерөнхийлөгч Ц.Элбэгдоржийн санал санаачилга зөв. Гэхдээ арга хэлбэрээ ашиглах байдал нь хэтэрхий өрөвдөлтэй юм. Ардчилсан Ерөнхийлөгчийн алсын хараа зөвхөн улс төрийн нүүдэл байсан нь харамсалтай. Баривчилгаа бүр өрсөлдөгчөө мад тавих сонгуулийн ээлжит нүүдэл төдий. Чихэр царайчлах экс эрхмийн батлан даалтад гарах болсон нь өнөөх л нүүдлийн нэг гэх. Намын нөхөд нь царай алдан гуйж байхад “Үгүй” хэмээн тас гүрийж байсан Төрийн тэргүүн НҮБ-ын Ерөнхий нарийн бичгийн дарга Бан Ги Мүн ганц залгахад л толгой бөхөлзөн хүлээн авсан нь хачирхалтай. Нэг гартаа АТГ, зүүндээ Улсын ерөнхий прокурорын байгууллагыг атгаж, улс орны эрх ашгаас илүүтэй ирэх сонгуулийн өнгө төрхөнд анхаарлаа хандуулах болсонд нь ичиж байна. Түүнчлэн Тамгын газрын даргаа хорих руу илгээж, Н.Энхбаярт анхаарал халамж тавьж байгаагаа илэрхийлж хошигносон. Эгзэгтэй үед нь, хоосон орон зайг дүүргэж, худал байсан ч хүсч байсан үгийг нь хэлэхдээ гаршсан Төрийн тэргүүнд энэ үйлдэл оноо цуглуулах гэсэн арчаагүй үйлдэл шиг харагдаж байсан.



Ажлаа хийж байгаа хуулийн байгууллагынхны өөдөөс эсэргүүцэл үзүүлэх зориг зүрхтэй Н.Энхбаярын өмнө хууль хүчин мөхөсдлөө. Сэжигтэн, яллагдагч бүр өлсгөлөн зарлавал шүүх хурлын өмнө батлан даалтад гарч болох нь гэх буруу жишгийн зам мөрийг ч тэр тавилаа. Магадгүй өнөөдөр Ганц худагт өөр бусад хориход шүүх хурлын товоо хүлээж суугаа нөхдүүд Н.Энхбаяртай барьцвал тэднийг ч гэсэн батлан даалтад гаргаж асрамжпахаас өөр аргагүй болох нь. Үгүй бол Монгол Улсын иргэнийг алагчилсан хэмээн хуулийн байгууллагынхан ял сонсоно. Улсад долоон тэрбум төгрөгийн хохирол учруулсан экстэй тэдний хийсэн хэрэг дүйнэ гэж болзошгүй тул ардчилсан Ерөнхийлөгч та удирдлаган доорх хүмүүстээ эртнээс үг зааж өгөхгүй бол горьгүй нь.



Нөгөөтэйгүүр, ард түмнийг нохойд барьдаг мод шигээ санадгаа боль гэж эрх баригчдад хатуухан сануулмаар байна. Өөрийнхөө бодол санааг “Ард түмэн ингэж хүсч байна” хэмээх амандаа бувтнах өчүүхэн санаа нэр дэвшигчид, УИХ-ын гишүүд, төрийн өндөрлөгүүдийн амиа хоохойлох арга хэрэгсэл болжээ. Н.Энхбаярыг ард түмэн суллахыг хүсч байна хэмээн амаа билүүдэх МАХН-ын Ерөнхий нарийн бичгийн дарга Н.Удвалд ч энэ үг хамгийн их хамаатай.

Сэтгэлээ барьж дийлэхгүй, асуудалд ул суурьтай ханддаггүй хэдэн өвөө, эмээ нарын үг, үйлдлийг нийт ард түмний хүсэл сонирхол мэт хэлж, ярих нь зүйд нийцэхгүй. Би ч гэсэн тэр ард түмний ширхэг нь. Миний гэр бүлийнхэн, найз нөхөд ч өнөөх ард түмний нэгээхэн эд эс, хэсэг бүлэг нь гэдгийг сануулья. Би, бид Н.Энхбаярыг суллахыг шаардаж байсан удаагүй. Тэр ч бүү хэл, тэрхүү цуглаан, жагсаалд нь ч оролцсонгүй. Харин ч ард түмэн ажлаа хийж, амьдралаа залгуулах гээд, хүүхдээ өсгөж, боловсролтой хүн болгох гээд бор хоногийг завгүй өнгөрөөж байна. Тэдэнд хуулийн байгууллагаар шалгагдаж байгаа хэн нэгнийг өмөөрч, ажпаа хаяж, хүүхдээ хойш тавьж гүйх хүсэл сонирхол огтхон ч үгүй гэдгийг тодотгоё.



Иймээс дахин ард түмэн гэж дэмийрдгээ боль. Энэ үгийг хэн дуртай нь хэлэхийг ч хориглоё. Хэнд ч хэрэггүй хуулийн төсөл санаачилж, ажил хийсэн дүр эсгэгчид энэ талаар хуулийн төсөл санаачилж яагаад болохгүй гэж. Цагаан толгойн үсгийг ч зүгээр байлгалгүй хасаж, нэмэх хуулийн төсөл боловсруулаад л, Д.Дэмбэрэл дарга руу бариад бүдэрч унах шахам гүйдэгтэй адил. Энэ үгийг парламентын дугуй танхимд, дархан эрхтэй түшээд, Засаг төрийн удирдлагууд хэсэг бүлэг хүний үгээр нийт ард түмнийг төлөөлүүлэн бусдын өмнөөс шийдвэр гаргахаас бид татгалзаж байна. Тэр бол хэсэг хүний л бодол санаа. Магадгүй ард түмэн хэмээх үгээр гангарах дуртай эрхэмийн гэр бүл, найз нөхдийн л үзэл бодол.



Эх сурвалж: "Нийгмийн толь"

Л.Нинжсэмжид