sonin.mn
Сэтгэгдэл (0)
Украинд цэргийн тусгай ажиллагаа Орос 15 дaхь сардаа явуулж байгаатай холбогдуулан мэдээллийн тэнцвэртэй байдал хангах үүднээс украины Freeдом ТВ, оросын Вагнер ЧВК цэргийн командлагч Евгений Пригожин, оросын сөрөг хүчний зүтгэлтэн Валерий Соловей, украины цэргийн шинжээч Александр Коваленко, Андрей Левченко, Крым дэх Украины төлөөлөгч Денис Чистиков нарын ярьснаас түүвэрлэн орчуулж сонирхуулъя. Энд sonin.mn сайтын байр суурь тусгагдаагүй болно.
 
Оросын арми санаачилгаа бүрэн алдаж, байлдааны ба стратегийн санаачилга Украины талд шилжсэн, Бахмутын ойролцоо Оросын арми хүнд хохирол амсан ухарч байгаа, Пригожин Оросын дайчдыг командлалынхаа эсрэг босч тэмцэхийг уриалсан өдрүүд Ялалтын баярыг залгажээ.
 
Ийм богинохон хугацаанд ийм их их хохирол амссан түүх байхгүй. Тэгтэл дэлхийд хамгийн шилдэг арми гэх миф хаанаас гараад ирсэн юм бэ гэдэгт оросын өөрийнх нь болон гадаадын шинжээчид хариу эрнэ. Таван шалтгаан тийм мифийг зохиомжилж, Кремлийн эрх баригчдыг ховсоджээ. Тэр нь
 
1.Танкийн биатлон гэх тэмцээн.
2.“Аналогов ему нет” (зэрэгцэх харьцуулах зэвсэг дэлхийд байхгүй) гэх суртал нэвтрүүлэг.
3.Улс орнуудын армийн рейтингийн олон улсын судалгаа дүгнэлтүүд.
4.Ялалтын баярын парадууд.
5. АНУ ба НАТО-гийн сул доройг илтгэсэн Афганистаны 20 жилийн дайн гэжээ.
 
Орос ялагдах мөртлөө “аналогов ему нет” гэдэг зэвсгүүдээрээ Украиныг ямагт заналхийлнэ. “Аналогов ему нет” хэмээн Путин чанга дуугаар өндөр индрээс зарламагц оросын суртал нэвтрүүлэгчдийн нүд нь гэрэлтэж, тэр зэвсгээрээ Киев, Варшав, Берлин, Парис, Лондонг устгаад өгөөч хэмээн ТВ-ээр ил уриална. Оросын армийн ялагдашгүй гэдэгт суртал нэвтрүүлэгчид дахин итгэх ба “Ялалт манай талд, тэр мэдээж” хэмээн О.Скабеева “60 минут”-аараа саяхан ярьж байв. Оросын цэргийн ялагдашгүй гэдэг тэр миф нь бүрэн хэмжээний их хүчээр өргөн фронтоор Украин руу давшиж байлдсан 15 сард дэлхийд нэгэнтээ тодорхой харагджээ. Киевийг гурав хоногт байлдан аваад Крещатикийн талбайд (оросуудынхаар Улаан талбай нь) ялалтын парадаа хийхээр нарийвчлан төлөвлөсөн байв. Украины нийслэлийн гол өргөн чөлөөнд парад болох нь болсон. Тэр бол Украины Үндэсний баярын өдрөөр зохион байгуулж олон нийтэд үзүүлсэн Оросын армийн сөнөсөн, шатсан хүнд техникийн сэгний цуваа байв. Орос нь Украинынхаас өөр нэг ч дайнд ингэтлээ шившгийн, масштабын ялагдал хүлээж байгаагүй. Оросын ТВ-ээр энэ тухай зориглон ярих боломжгүй, харин нөгөө нэг ялагдашгүй сөнөшгүй миф нь Ялалтын өдрүүдэд хангалттай яригдав–эксперт А.Коваленко ингэж дүгнэжээ. 
 
Украин дахь дайнд бүтэлгүйтэх тусам Оросын ард түмний итгэл найдвар зэрэг зэрэг гээгджээ. Уг нь 145 сая хүн амд итгэл дэндүү их байсан. Оросын сайн сайханд барууныхан атаархдаг гэж үздэгээсээ бусад улс үндэстнийг ойлгох мэдрэмж нь оросуудад төрдөг. Украиныг ОХУ хэзээ ч ойлгохыг хүсэхгүй, тэгэх тусмаа украинчуудыг оросууд ойлгохыг хэзээ ч хүсэхгүй, хүсэхгүй байх нь түүхэн учир шалтгаантай.
 
Оросоо 1-р сортын хүмүүс, Украинаа 2-р сортын хүмүүс гэсэн менталитет нь ойлгохыг хүсэхгүй байх гол шалтгаан нь гэж А.Левченко бичжээ. Украинд харгислаад байгаа чинь орос хүн харгис хэрцгийдээ биш, украинчуудыг 2-р сортод тооцож ирсэний гай гэжээ. Харин тэр 2-р сорт нь эргээд 1-р сортоо ялж байдаг.
 
“Дайран дээр нь давс” гэгчээр Оросоо улам муухай харагдуулах талаар Евгений Пригожин гайхалтай ажиллаж байна. Эх орноо хамгаалах гэж ирсэн хүн үү, эсвэл Оросоо, Оросын цэргийн командлалыг хорлон сүйтгэх гэж ирсэн хүн үү гэдэгт дэлхий дахин гайхшаа бараад байна. Украинд явагдаж буй дайныг “Оросын ард түмний эсрэг чиглэсэн геноцид” хэмээн нэрлэв. Оросын армийг ийм болтол нь тонож хулгайлсан цэргийн дарга генералуудыг Оросын түмэн хэзээ ч уучлахгүй хэмээн сүрдүүлэв. “Украины хүчин Бахмутын ойролцоо амжилттай давшлаа. Гэтэл Ялалтын баяр тэмдэглэх гэж Кремль тэрбум гаруй рубль гарзадлаа” хэмээн Пригожин уурсан хашгачна.
 
Оросын цэргийн байрлал хориглолтын тухай байлдааны нууц мэдээ Украины цэргийн тагнуулын албанд дамлах гэж байгаад илчлэгдлээ гэсэн мэдээ тарсан. Эх орноосоо урвасан гэх ял авах нөхцөл аль хэдийнэ бүрдсэн бололтой. 
 
А.Коваленкогийн ярьснаар, сүүлийн 7 хоногт пуужингийн довтолгооноо Орос гэнэт эрчимжүүлсэн нь цаанаа оросуудын айдсыг илтгэнэ, украины арми сөрөг давшилтад орчихно гэхээс айсандаа хамаа намаагүй пуужиндаж байна. Иргэний байгууламж, орон сууц, хот тосгод руу пуужин харваад дрон хөөргөөд байвал украины армийн сөрөг давшилт гацаж зогсоно, далимд нь тэнэсэн сум, пуужин, дронд украины армийн ар талын хангалтын баазууд өртөнө, украины агаарын довтолгооны зэвсэг суларна гэж давхар тооцоолжээ. 
 
“Коллаборант” (нэг ёсондоо урвагч) гэх хаягтай украины уугуул иргэдийн хувьд дайн маш хүндээр туслаа.  Крым ба Донбассын мянга мянган эрс фронтод хөөгдөн яваад сураг нь тасарсан. Крым дэх урвагчид ба оккупацын засаг захиргааны хувьд паникт орж, айж балмагдсан сэтгэл зүй давамгайлав. Донецк хутганы ирэн дээр дэнжигнэж байна. Луганскад До яамны сайд нь тэнгэрт халилаа. Москвад Путинтай тавуулаа гар гараасаа атгалцан “Россия!” хэмээн уухайлж байсан Пушилин, Пасечник, Балицкий, Сальдо нар хаа байгаа нь таг чиг. Коллаборант эрх баригчид иргэдээ тайван амгалан байцгаа гэх боловч иргэд нь ч итгэлгүй. 
 
Крымд гэхэд д тус хойгийг хөгжүүлэх гайхамшигт төлөвлөгөөгөө зарласан нь нэмэр болсонгүй. Бүх зүйл тайван байна, ажил амьдрал үргэлжилж байна гэдгийг хүн амдаа харуулах нь чухал тул Херсон мужид шинэ зам тавигдаж, тууз хайчилсан нээлт хийж, орон нутаг тогтвортой байна шүү гэсэн мэссэж өгөхийг зорьсон тухай Д.Чистиков Украины ТВ-ээр ярьжээ. Гэхдээ урвагчдын үлэмж хэсэг нь нутаг орноосоо зугтаж алга болжээ.
 
Херсоноос коллаборантын олонхи нь Орос руу зугтсан ба харин одоо оросын паспортжуулалт хүчтэй явагдаж байгаа ч ОХУ руу дүрвэхийг хатуу хоригложээ. Хоригийг давж дүрвэх явдал их байгаа ба Орос руу дүрвүүлдэг, оргуулдаг авилгын сүлжээ ажиллаад эхэлжээ.
 
Владимир Путины хувь заяаг таамагласан нэвтрүүлэг, бичлэг, ярилцлага олонтаа тавигдах болсны дотор энэ 2023 ондоо багтаж засгийн эрхнээс зайлуулагдана гэж үзсэн оросын сөрөг хүчний аналист Валерий Соловей бусдаасаа ялгарна. Энэ дайныг эргэлтгүй зогсоож ялагдлаас Орос орноо аврая гэдэг Засгийн газар ОХУ-д зайлшгүй гарч ирнэ гэсэн итгэлээ тэрээр зураглажээ. Оросын элит гэдэг нь үндсэн хоёр хэсгээс бүрдэнэ. 1. Эхний хэсэгт ердөө 10 хүн бий, тэр нь ҮАБЗ-өө тойрч нягтарсан байдалтай. Нэрсээс дурджээ. Путин өөрөө, Николай Патрушев, Дмитрий Медведев, Төрийн Думын дарга Вячеслав Володин, Холбооны Зөвлөлийн дарга Валентина Матвиенко, мөн Сергей Лавров, Москва хотын дарга Сергей Собянин, ОХУ-ын Засгийн газрын дарга Михаил Мишустин, Оросын Үнэн алдартны шашны тэргүүн Кирилл Гундяев гэх мэт нэрс харагдана. Нэг хүн гээгджээ. Хэн юм бол мэдэхгүй. Эднийг “банда Путина” гэж нэрлэх ба энэ “10” ба бусад нь (2) гэж хуваагаад, бусад нь гэдэгт Пригожиныг дурдаад орхижээ. Энэ “бусад”-ын төгсгөл хавьд Оросын ТВ-ийн “Нэгдүгээр суваг”-ын захирал Константин Эрнст орно гэсэн байх юм. 
 
Эхний “10”-т зориулж Орост бүх зохиомж явагддаг. Цэргийн тусгай ажиллагааг эдэнд зориулж эхлүүлсэн. Дайнд ялагдашгүй тухай миф зохиосоор байна. Саяхан Ялалтын баяраар Улаан талбайд цэрэг, казакууд, нахимовцчуудын парад ганц танктай хийсэн, ТУХН-ийн 6 ерөнхийлөгч, нэг ерөнхий сайдыг урьж авчирсан гэх мэт. Оросын элит дотор нөгөө “маршал”-ууд Шойгу, Герасимов, Украины дайны бусад жанжид хаагуур бичигдэх бол?
 
А.Коваленкогийн үзэхээр, Кремлийн эрх баригчдыг худал мэдээллээр цутгаж итгүүлсэн буруутныг эдүгээ хайж байгаа ба хүчний байгууллагын дүн шинжилгээний бүх бүтцийг “тооцоо”-гүй дайнд ОХУ-ыг татан оруулсан ялд унагаж байгаа аж. ОХУ-ын БХЯ-ны  ГРУ, Жанжин штабын ГУ, ФСБ ба Гадаад тагнуулын албаны мэдээлэл-дүн шинжилгээний газар хэлтсүүд хавтгайдаа хардагдаж байна. Энэ олон газраас ганц л дүгнэлт очиж байсан нь украинчууд баяр ёслолын байдалтай оросын цэргийг тосон авна, Киевт ялалтын парад, ялалтын буудлага гэх мэт. Украины дайны ялагдалд буруутгагдаж байгаа ирээдүйн ялтнуудын дотор “ЛНР” ба “ДНР” гэх тоглоомын улсын эрх баригчид, жишээ нь Денис Пушилин гарцаагүй нэрлэгдэж байна. Оросын ТВ-ийн ток-шоугаар яриад эхэлжээ. ОХУ-ын үндсэн байгууллага иргэдээ буруутгахаас илүүтэй Донбассын орос хэлт хүн амыг хамгаалаад өгөөч гэсэн хүсэлт Кремль рүү тавьж итгүүлсэн тэдгээр урвагчдыг нэрлэх ба энэ сэдвээр хамгийн их ярьсан нь Пушилин болж таарчээ. Энэ янзаараа бол ОХУ нь Украины газар нутгаас цэргээ гаргах элдэв шалтаг хайж, оросын ард түмний өмнө украин урвагчдыг буруутнаар тодруулах төгсгөл рүү явж байгаа юм байна. 
  
Англи, орос хэлнээс түүвэрлэн хөрвүүлсэн Дүгэржавын Номиндарь