Мягмар - 04 сарын 23,
2024
БРЮССЕЛЬ. /Reuters/. Олон улсын үнэлгээний “S&P Global” агентлаг даваа гарагт еврогийн бүсийн эдийн засгийн 2024 оны өсөлтийн төсөөллийг бууруулжээ.
Еврогийн бүсийн хамгийн сүүлийн үеийн эдийн засгийн төлөв байдлын тайланд дурдсанаар, дотоодын нийт бүтээгдэхүүний /ДНБ/ өсөлт 2024 онд 1 хувьд хүрэх төлөвтэй байна. Энэ нь өмнөх таамаглалаас 0.4 хувиар буурсан үзүүлэлт юм.
“S&P Global” агентлагийн Европ, Ойрхи Дорнод, Африкийн асуудал эрхэлсэн ахлах эдийн засагч Сильвен Бройер хэлэхдээ, эдийн засаг бага зэргийн уналтад орох эрсдэл өндөр байгааг бид харж байна гэжээ.
Инфляцын түвшин 2025 оны нэгдүгээр улирлаас өмнө зорилтот 2 хувьд, мөн суурь инфляц ч 2025 оны гуравдугаар улирлаас өмнө зорилтот түвшиндээ хүрэх төлөвгүй байгааг тайланд тэмдэглэжээ.
Европын Холбооны Статистикийн газраас /Eurostat/ гаргасан хамгийн сүүлийн үеийн мэдээллээр, еврогийн бүсийн инфляц нэгдүгээр сард 8.6 хувь байсан бол хоёрдугаар сард бага зэрэг буурч 8.5 хувь болсон байна. Европын Төв банк инфляцыг бууруулахын тулд бодлогын хүүгээ урьдчилан тооцоолж байснаас илүү урт хугацаанд өсгөнө гэж “S&P Global”-ын тайланд таамаглажээ. Төв банк гуравдугаар сарын хуралдаанаараа бодлогын хүүгээ 50 суурь нэгжээр өсгөснөөр 2008 оноос хойших хамгийн өндөр түвшинд хүргэсэн юм.
Э.Хулан
Эх сурвалж: "Монцамэ" агентлаг
Сэтгэгдэл0
Европын орнууд Америк ЕХ хоёрын хамаарлаас гарах хэрэгтэй. Энэ хоёр европын мөнгийг дайн тусламжид зарцуулаад дуусгачихсан. Одоо европын орнуудад инфляци өсч европын ард түмэн жагсаал хийж байна. Америк ЕХ хоёр хэзээ ч европын орнуудын хойч ирээдүйн сайн сайхны төлөө зүтгэхгүй. Учир нь барууны мөнгө санхүүгийн эзэд америкад эзэн суусан, ЕХ тэдний хувийн байгууллага.