sonin.mn
Улаанбаатар хотын авто замын түгжрэлийг бага зардлаар богино хугацаанд шийдвэрлэх боломжийн талаар өөрийн хувилбараа 1980-аад оноос хойш Улаанбаатар хотод автобусны жолооч ажлыг хийсэн иргэн Д.Дорждагва танилцууллаа.
 
Тодруулбал тэрээр: "Би яг энэ саналаа энэ оны 2-р сард танилцуулж байсан. Гэтэл хотын дарга, түгжрэлийн эсрэг сайд гэх нар миний  санааг ажилдаа тусгахгүй, хоёр гурван төсөл яриад байгаа нь Монголд ямар ч ашиггүй, түгжрэлийг арилгаж чадахааргүй байгаа. Иймээс би санаагаа дахиад танилцуулж байна.
 
Ер нь Яармагаас хотын төв рүү чиглэсэн хөдөлгөөнтэй гурван эгнээтэй уулзвар Яармагийн замд түгжрэл үүсдэг гол шалтгаан болдог. Энэ гурав дээр дахиад хоёр эгнээ нэмэх боломжтой, газар нь байгаа. Хотын төвөөсөө Яармаг чиглэлд дөрвөн эгнээ байгаа. Үүнийг мөн нэмж таван эгнээ болгох боломжтой, бас л газар нь байгаа. Ингэснээр энэ уулзвар түгжрэлгүй болно.
 
Улаанбаатарын бүх уулзварыг янзалж, түгжирдэггүй болгоход маш бага мөнгө орно. Хэдхэн зуун метр газарт эгнээ нэмэхэд нэг километр зам бүтээн байгуулахаас хямд тусна. Гэтэл Хотын дарга, Түгжрэлийн Сайд гэх мэт шийдвэр гаргах түвшний хүмүүс тэрбум, тэрбум төгрөгийн төсөл хэрэгжүүлнэ гэж яриад байна. 
 
Хоёр эгнээтэй уулзвар байлаа гэхэд ногоон гэрэл нэг удаа асахад 10 автомашин нэвтэрдэг. Тэгвэл дөрвөн эгнээ болгочихвол 20 автомашин гарах юм" гэв. Үгүйсгэх, няцаах аргумент алга.
 
Үнэхээр л туршлагатай нэг жолооч л Нийслэлийн Засаг Дарга бөгөөд Улаанбаатар хотын захирагч, Нийслэлийн МАН-ын хорооны дарга, Д.Сумьяабазар, УИХ-ын гишүүн, Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар нараас илүү оновчтой сэтгэх юм. Яамаар ч юм бэ дээ?
 
О.Чулуут