сонин mn
Сэтгэгдэл (27)
Монгол Улсын Их Хурлын 2022 оны 04 дүгээр сарын 15-ны өдрийн 14 дүгээр тогтоолоор байгуулагдсан “Монгол Улсын Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаар Хянан шалгах үүрэг бүхий түр хороо”-ны Нотлох баримтыг шинжлэн судлах хоёр дахь шатны сонсгол өнөөдөр /2023.02.08/ Төрийн ордноо  үргэлжилж байна. Сайншанд Аж үйлдвэрийн цогцолбор ТӨХХК-ийн асуудлаар Монгол Улсын Ерөнхийлөгч асан Х.Баттулга гэрчээр дуудагдан ирж мэдүүлэг өгөх үеэрээ:
 
“Энэ одоо яг юу нь болохгүй болчихоод байгаа юм бэ? Би ерөөсөө ойлгодоггүй. Монгол Улс чинь газрын баялгаа боловсруулах ёстой гэж ойлгоод УИХ, Засгийн Газрын тогтоол нь он, сар, өдөр, цагаараа гарчихсан, үүнд оролцсон хүмүүс бүгдээрээ сууж байна.
 
Энэ чинь бидний хувьд анхны юм шүү дээ. Бид нар мэдэхгүй шүү дээ. Гадны мэддэг байгууллагуудыг бүгдийг нь хөлсөлж авна. Тэд нар мөнгөгүй бол хөдлөхгүй.
 
Анх удаа бид нар боловсруулах үйлдвэр гэдэг юмны тухай ярьсан. Би ч сайд байх үедээ үүнийг гэгээлгээр хийж байсан. Үүгээрээ би бахархдаг. Үүнийг би цаашдаа ч хийж дуусгана гэж бодож байгаа. 
 
Нилээн ажил хийсэн. Нийт 5 орчим тэрбум ам.долларын хөрөнгө оруулалт хийгдэх ёстой.
 
Монголын Засгийн газар 34 хувийг нь оруулахад энэ нь өөрөө 1.7 орчим тэрбум ам.доллар болох ёстой юм. Үлдсэн 66 хувь дээр нь бид хувийн болон гадаадын хөрөнгө оруулагч нарыг оруулж ирэх ёстой.
 
Ерөнхийлөгч байх хугацаандаа энэ ажлуудыг хийгээд өнөөдөр Тавантолгойгоос Сайншанд хүртэлх 416 км төмөр зам, авто зам, усны нөөцийн хайгуул, байгаль орчны шинжилгээ гээд янз бүрийн юмнуудыг хийгээд өнөөдөр бид нар Монгол Улсын Засгийн газар өөрөө энэ хөрөнгөө үнэлэхэд 2 тэрбум ам.доллароор үнэлж болж байгаа юм. Бодвол та нар дандаа л гадаад, дотоодод сургууль соёл төгссөн, боловсролтой хүмүүс байх.
 
Энэ хугацаанд чинь бид нар, Монгол улс 2 тэрбум ам.доллар хийчихсэн шүү дээ. Одоо бид нар ингэж татан буулгаж байхын оронд “Монгол Улсын Засгийн Газар Сайншандын цогцолбор дээр оруулсан 2 тэрбум доллараа 34 хувь гэж үнэлж байна, 66 хувь дээр нь гадна, дотны хөрөнгө оруулагч нарыг дуудаж байна” гэж зарлах ёстой шүү дээ.
 
Би энэ ажлыг хариуцаад явбал босгочихно.
 
Үнэхээр харамсалтай нь 2015 оноос бүтэн жил эрүүгийн цагдаа саяын ярьсныг бүгдийг нь шалгасан шүү дээ. Баахан хүн аваачиж хоёр жил гаран шалгасан. Баахан хүн аваачиж шоронд хийсэн. Тэр 35 мянган га газарт байгаль орчны үнэлгээ хийнэ гэдэг бол тийм амар ажил биш шүү дээ. 35 мянган га. Салхи, ус, гээд л... Хөөврийн гол гээд 1984 онд Оросуудын судласан судалгаа бий. Үүнийг бид дахин судлах ёстой. Төмөр зам, авто зам хийчихсэн. Ус олсон. Одоо цахилгаанаа татчих юм бол, Монголын Засгийн Газар 2 тэрбум ам.доллар хийчихсэн. Юун татан буулгах тухай яриад байгаа юм бэ.
 
Бодвол тухайн үед ЗГХЭГ-ын дарга байсан Ч.Хүрэлбаатар энэ асуудлуудыг оруулж ирж байсан. Сангийн сайд болчихоод татан буулгах тухай яриад л явж байна. Би бол энэ Ч.Хүрэлбаатарыг толгойлж хийсэн л гэж бодож байна. Ерөөсөө энэ Монгол орныг аж үйлдвэржүүлэх, арьс шир, ноос ноолуур, газрын баялгийг боловсруулхыг жадлан эсэргүүцдэг хүн бол энэ Ч.Хүрэлбаатар.
 
Ний нуугүй л хэлж байна. Иймэрхүү тав, арван хүн л байдаг юм. 
 
Яагаад бид нар энэ 30 жилдээ өөрсдөө шийвэр гаргаад үүнийг цуцлаад яваад байдаг юм. Сайншандын аж үйлдвэрийн цогцолбор баригдах ёстой гэж одоо хүртэл итгэлтэй байдаг” гэж хэлэв.
 
 
Ч.Бүргэд