sonin.mn
Сэтгэгдэл (0)

Манай сонины нэгэн уншигчаас бидэнд хаягласан захидал cap гаруйн өмнө ирсэн юм. Сэтгэлийнхээ гүн дэх хайр, харууслыг уудалсан энэ бүсгүйд бид мэргэжлийн хүнээс зөвлөгөө авч өгөхөөр шийдлээ. Захидлын эзэн “Надтай адил зовлон шаналал тээж яваа хэн нэгэн бүсгүйд энэ захидал хэрэг болж магад. Тиймээс захидлыг минь сониндоо нийтлээрэй ” гэжээ. Иймд эрхэм уншигчдадаа энэхүү захидлыг задалж байна. Мөн мэргэжлийн хүнээс авсан зөвлөгөөг дор нийтэллээ.
Уншигч бүр үүнд янз бүрээр л хандах нь лавтай. Гэхдээ хэнд маань ч хэн нэгний чин сэтгэлийг шүүх эрх үгүй билээ


Юуны өмнө танай сонины редакцийнханд захидал минь хүрэх өдрийн мэндийг эрье!

Би танай сонины байнгын уншигч. Ингээд бичихээр та бүхэн намайг төмөр замын салбарт ажилладаг гэдгийг ойлгох бизээ. Олон cap бодсны эцэст сэтгэл дэх бүхнээ уудлан бичмээр санагдлаа. Магадгүй, миний захидлыг уншсан зарим хүн намайг буруутгаж, үзэн ядах биз. Гэхдээ үүний цаана миний чин сэтгэл, хэнд ч хэлээгүй нандин зүйл байгаа гэдгийг ойлгохыг хичээгээрэй.


Би нэгэн залууд хайртай. Түүнийг ч надад хайртай гэдэгт итгэдэг. Гэхдээ биднийг учрахаас өмнө хайртай залуу минь гэрлэчихсэн бас хоёр хүүхэдтэй болчихсон байсанд л бүх зүйлийн зангилаа байгаа юм. Бид бие биенээ олж харсан тэр өдрөөс хойш хэдийнэ таван жил өнгөрчихөж. Эхэндээ, би энэ харилцаа удаан үргэлжлэхгүй гэж бодсон ч өдөр хоног өнгөрөх тусам бидний харилцаа улам гүнзгийрч, салахад улам хэцүү болсон.

 

Ертөнц дээр түүнээс өөр хэн ч байхгүй юм шиг л өдөр хоногууд өнгөрсөөр байлаа. Хайртай залуу маань зөвхөн чиний дэргэд л би аз жаргалтай байдаг гэдэг. Нэгэн удаа хүүхэдтэй болох, цаашлаад хамтдаа амьдрах талаар ярилцаж үзсэн. Магадгүй миний оронд өөр хүн байсан бол яаж шийдэхийг мэдэхгүй юм. Энэ таван жил миний хувьд аз жаргалтай юм шиг хэрнээ гунигтай, зовлон шаналалтай өнгөрсөн.

 

Түүнийхээ дэргэд байхад, царайг нь хараад сууж байхад, утсаар дуу хоолойг нь сонсох төдийд л би энэ хорвоогийн хамгийн аз жаргалтай эмэгтэй болдог ч миний сэтгэлээс гэмшил хэзээ ч арилдаггүй. Зүсийг нь харах бүү хэл, барааг нь олж үзээгүй гэмгүй эмэгтэй, хоёр хүүхдийг нь бодох бүрт өөрийгөө өөдгүй амьтан гэж зэмлэдэг. Хэзээ ч түүнийг эхнэр, хүүхдээ орхиод ир гэж хэлээгүй минь жаахан ч гэсэн өөрийгөө цагаатгах шалтаг болдог.

 

Гэхдээ өөрөө шийдвэрээ гаргаад хүрээд ирээсэй гэж дотроо хүлээдэг байсан шүү. Түүний зүгээс ч ямар нэг алхам хийгээгүй. Би нэг л мэдэхэд энэ байдлаас залхаж, итгэл алдарч эхэлсэн. Хааяахан жаахан л хичээвэл бүх зүйлийг эргүүлж болмоор шунаг сэтгэл төрдөг байсан ч зориглож, зүрхэлсэнгүй. Үнэхээр хайртай болохоор харилцаагаа таслах шийдвэртэй алхмыг хийж чадалгүй өнөөг хүрчихлээ.

 

Тэр ч надад хайртай, холбоогоо тасалж чадахгүй нь харилцаагаа энэ хэвээр нь үлдээе гэж гуйх юм. Хэдийгээр намайг гэх залуус байдаг ч хэн нь ч миний сэтгэлд хүрдэггүй. Түүнээс өөр хүнтэй би ганц ч болзоонд явж үзээгүй. Яагаад гэвэл тэр миний анхны хайр. Магадгүй амьдралд минь тохиолдох цорын ганц хайр ч байж магадгүй. Гэтэл би бусдын л адил үртэй ханьтай, гэр дүүрэн өнөр өтгөн айлын эзэгтэй болохыг хүсдэг. Хамгийн харамсалтай нь тэр хүслийг минь хайртай хүн минь надад биелүүлж өгч чадахгүй, чадаасай ч гэж би хүсэхгүй. Ингээд цаг хугацаа өнгөрөх тусам би хохирогч болоод байх шиг санагдах юм. Надад зөвлөгөө өгөөч. Гарах гарц зааж өгөөч. Би энэ бүгдийг дуусгамаар байна.

 

 

Та хэнээс ч үл хамаарах хувь хүн гэдгээ ухаарч, мэдрээрэй

 

Сэтгэл зүйч Л.Сарангэрэл

-Эхнээсээ та ийм харилцааг огт хүсээгүй. Тэгсэн хэрнээ, энэ байдлаас гарах шийдвэртэй алхам хийлгүй өнөөг хүрсэн нь та түүнээс хэт хамааралтайг харуулж байна. Юуны түрүүнд та өөрийгөө хазаарлаж зогсоохыг хичээ. Та хайртдаа дэндүү “уусч”. Тиймээс харилцаагаа таслах нь таны хувьд тэвчишгүй мэт санагдлаа ч энэ бол түүний шийдэх асуудал бус харин таны хувийн хэрэг гэдгийг ойлго. Та хэнээс ч үл хамаарах хувь хүн гэдгээ ухаарч мэдрэх хэрэгтэй.

 


“Үйлийн үртэй “ дурлалаас ангид байсан тэр сайхан үеэ эргээд сана. Санаачлагыг гартаа ав. Сул чөлөөтэй цаг гарах бүрт түүний утасдахыг хүлээн догдолж суухгүй байхыг хичээ. Аль болохоор өөрийгөө завгүй байлгах нь аливааг мартах хамгийн сайн арга шүү. Өөр хүсэл сонирхол танд бас байдаг л биз дээ. Сэтгэл хөдлөлөө хязгаарлаж, урьдын чөлөөт амьдралаа сэргээхийг оролд.

 

Эхнэрээсээ салахыг хүсэхгүйн адил тантай үүсгэсэн харилцаагаа таслах сонирхолгүй тэр эрийн тухай ямар ч сэтгэл хөдлөлгүйгээр, эрүүл саруул ухаанаар эргэцүүлэн бодоод үз. Магадгүй та түүнд байдаг 2-3 гайхалтай зан чанарыг олж харсан шигээ өмнө нь огт анзаардаггүй байсан сул талыг нь ч олоод харчихаж болно. Түүний гаргадаг зан авир, үйл хөдлөлийг нь кино хальс эргүүлэхийн адил нухацтай тунгаа.

 

Тэгвэл түүний ямар их хувиа хичээсэн эгоист зантайг нь олж харах болно. Таныг ганцаардуулж, амьдралыг чинь үрэн таран хийж сүйтгэхээс өөрөөр ямар ч “халамж" тавилгүйгээр дэргэдээ уяж байсныг олж мэдэх болно. Гэхдээ өөрийн аз жаргалгүй байдалдаа анхаарлаа төвлөрүүлж хэрэггүй. Тань шиг олон бүсгүй хорвоогоор нэг бий гэж бод. Түүнээс салж хөндийрөхөд л энэ бүх ухаарлаа ашиглахыг хичээх хэрэгтэй.Та шийдсэн л бол битгий буц. Эргэж бүү хар. Явсан л бол явсан. Танд хүч, зориг байгаа бол замын хагасаас л эрх чөлөөгөө мэдэрнэ. Хөндийрч салахын зовлон таныг удаан шаналгахгүй. Эцсийн эцэст таны сэтгэлийн шарх эдгэх л болно гэдгийг баттай хэлэх байна.



Эхнэртэй эрд дурлах

Та эхнэртэй эртэй хайр сэтгэлийн холбоотой байг. Та хоёрын энэ харилцаа удаан үргэлжилж байгаа ч дурлалт залуу чинь эхнэрээсээ салж тантай амьдралаа холбохыг яагаад ч юм яарахгүй. Таны амьдрал зөвхөн хүлээлтээр дүүрэн. Яагаад гэвэл хоромхон агшны учралын төлөө та ямагт бэлэн байх хэрэгтэйн дээр түүний ажлын цагийн хуваариас хамааралтай байдгаа байнга л мэдэрч явдаг.Мэдээж, ийм харилцааг та удаан үргэлжлүүлэх хүсэлгүй л биз дээ. Тэгвэл та юуны түрүүнд,


-Түр зуурын ийм хайр сэтгэлийн холбоо нь хэнийг ч аз жаргалтай болгодоггүй гэдгийг ойлгох хэрэгтэй. Мөн та хоёрын дурлалын түүх ч сайхнаар төгсөх магадлал бага гэдгийг ухаар.

-Тиймээс үр дүнгүй найдвар тээн шаналахын оронд эхнэргүй чөлөөт эрчүүдэд анхаарлаа хандуулсан нь дээр. Зоримог алхам хийхэд чинь туслах үүднээс эрчүүд ямар шалтгаанаар ийм үйлдэл хийдэг тухай өгүүлье.



Эрчүүд яагаад эхнэрээсээ салахыг яардаггүй вэ?
 

Сэтгэл зүйн үүднээс авч үзвэл:
Эрчүүд өөрийнхөө үйлдэл бүрийг эмэгтэйчүүдээс илүү хянаж чаддаг. Ийм учраас үр хүүхэд, ажил төрөл, орон байр гээд амьдралыг нь ганхуулах шалтгаануудад тун болгоомжтой ханддаг. Эрчүүд амьдралынхаа тогтсон хэв маягийг тийм ч амархан өөрчлөхгүй. Олон жилийн хөдөлмөрөөрөө босгосон ахуйгаа хоромхон зуур нурааж орхихыг бүр ч хүсэхгүй. Ер нь эхнэртэй эр нөхөртэй эмэгтэйчүүдийг бодвол илүү эрх чөлөөтэй.

 

Гэрийн доторх “бантан”, үр хүүхдийн хүмүүжил энэ бүгд эхнэрийн л хүрээний асуудал гэж боддог. Тийм болохоор эрчүүдэд үдшийн цагаар зав гаргах боломж бишгүй гарна. Тэд илүү цагаар ажиллах, эртний танилтайгаа уулзан ганц хоёр шил шар айраг уух гээд гэр бүлээс гадуур сул “зав” ихтэй. Нууцгүй хэлэхэд, ийм зав цагийг тэд нууц амрагтаа “илүүчилдэг”.



Эхнэрээ “араар тавигч" эрчүүд дотроо гэмшиж, эмзэглэж явдаг гэж та бодож байна уу. Огтхон ч тийм биш. Харин ч бүр эсрэгээрээ. Нууц амрагтай байх нь эрчүүдийн өөрийгөө үнэлэх үнэлэмжийг дээшлүүлж, тэдэнд сэтгэлийн таашаал авчирдаг. Эрчүүдийн ертөнц нууц амрагийг ийм л өнцгөөс олж хардаг юм. Эхнэрээсээ тун удахгүй сална гэдгээ нууц амрагтаа тэд амлах хэр нь гарцаагүй шалтаг тоочин “бултах” нь их.

 

Тиймээс тэдний харилцаа энэ байдлаараа хэдэн жилээр ч үргэлжилж болно. Тэгвэл ийм харилцаа аль хэр удаан үргэлжилнэ, төдий хэмжээгээр түүний эхнэрээсээ салах “шанс” багасдаг болохыг та хүлээн зөвшөөрөх хэрэгтэй. Магадгүй та түүнийг эхнэрээсээ салах гэж олон удаа оролдсон гэж “өмөөрч" болох ч ямар нэг зүйлийг тэр таны төсөөлснөөс өөрөөр хийсэн байж таарах нь.


Тун удалгүй, та хоёрын харилцаа хамтын аз жаргалын тухай таны “гэгээн мөрөөдөл” байсныг олж мэднэ. Таны дурлалт эр гэр бүлээ хаях нь юу л бол. Таны өрөөний босгыг алхах агшин дуусгавар болох мөчид л та бүгдийг мартах ёстой болсныг ухаарна. Дахиад л ганцаардал, нулимсанд норсон дэр, бүгдийг хаяад эргээд ирэх байх гэсэн хүлээлт. Энэ бүхнийг та хүсч байсан гэж үү?


Та өөрийн хийсвэр бодлын ертөнцөд хайрлаж, дурлаж, мөрөөдөж явдгаа ухаарах хэрэгтэй. Мөрөөдөл тань бодит амьдралтай нүүр тулангуут нуран унаж таны сэтгэл зүрхийг шархлуулан өвтгөж буйг ойлго.

Эх сурвалж: “Ган Зам”