сонин mn
Хуудсыг нь сөхөн шимтэн унших бүрийд шинэ бодрол, хүсэл тэмүүлэл, зорилгод хөтөлдөг зүйл бол ном юм. Зохиолчийн оюун ухаан хийгээд  цаг хугацаа, хөдөлмөрийн үрээр бүтсэн ном бүр өөр өөрийн үнэ цэн, оршихуйтай байдаг. Тиймээс “Зууны мэдээ” сонин “Би номныхоо тухай” буланг шинээр нээж анхны зочноороо “Данс нь хэзээ ч “0” заадаггүй эмэгтэй” номын зохиолч Б.Цацралыг урилаа. 
 
Санхүүдээ дүгнэлт хийдэг ч үр дүнд хүрч чадалгүй шантрах нь бий
 
-Өрх гэр, үр хүүхэд, байр, хувийн амьдрал гээд олон зүйл дээр хариуцлага хүлээдэг эмэгтэйчүүдийн хувьд одоо байгаа санхүүгийн нөхцөлдөө дүгнэлт хийж, ямар боломж байгааг хайж эрэлхийлдэг. Гэвч дорвитой үр дүнд хүрч чадалгүй шантардаг. Хүүхэд төрүүлж, өсгөх бүртээ карьер завсардах, адил хөдөлмөр эрхэлж буй зарим эрчүүдээс дутуу үнэлүүлэх, бага цалин авах, гэр бүлийн бусад асуудлыг зохицуулах гээд амьдралын мөчлөг, хэв маяг үүрэг хариуцлага зэрэг олон зүйлээр бид эрчүүдээс ялгаатай. Гэхдээ бидэнд давуу талууд байдаг. Бид шинийг эрэлхийлэгч, шийдвэртээ үнэнч, юмс үзэгдлийг өөдрөг талаас нь хардаг, гэр бүлдээ нөлөөлөгчид, зарим үед эмэгтэй хүний шийдвэрээр сонголт хийгддэг гээд хэлчихэд хилсдэхгүй. Тиймээс би номоо өөдөө тэмүүлж, өөдрөг байж, одоо байгаа нөхцөлдөө гундахгүй байгаасай гэсэн үүднээс “ДАНС НЬ ХЭЗЭЭ Ч “0” ЗААДАГГҮЙ ЭМЭГТЭЙ” гэсэн содон нэрээр нэрлэсэн юм. 
 
Хүмүүс санхүүгийн эрх чөлөөг их холоор төсөөлдөг
 
-Би мөнгөнөөс болж бүх зүйлс хүлэгдэж байгаадаа дүгнэлт хийж, ямар боломж байгааг хайж эрэлхийлэх явцад хөрөнгө оруулалтаар санхүүгийн эрх чөлөөнд хүрэх боломжтойг олж харсан. Ихэнх хүмүүс хөрөнгө оруулалт, санхүүгийн эрх чөлөө гэдэг ойлголтыг их холоор төсөөлдөг. Саяхныг хүртэл хөрөнгө оруулалт болон санхүүгийн төлөвлөгөө гаргах гэдэг нь зөвхөн өндөр орлоготой эсвэл их мөнгөтэй хүмүүсийн хийдэг зүйл гэсэн ойлголт давамгайлдаг байлаа. Бидний амьдарч буй капиталист нийгэмд хэн “түрүүлж алхаж” мэдлэг мэдээллийг олж, түүнийгээ хэрэгжүүлж байна тэр хүн нь хождог болсон. Тэгвэл энэ нийгэмд цалингаас цалингийн хооронд зээлээ төлж, амьдралаа арай чадан залгуулж яваа нэгэнд санхүүгийн эрх чөлөөнд хүрэх боломж байх болов уу даа гэх бодол байнга л орж ирдэг биз. Яг л энэ асуултад хариулт олох зорилгоор эхлүүлсэн ажил маань ном болон таны өмнө дэлгэгдэж байна. 
 
Мөнгийг өөрийнхөө төлөө ажлуул
 
-Амьдралдаа хяналт тавьж, ахин дэвших боломжийг эрэлхийлж, санхүүгийн нөхцөлдөө тохирсон алхам хийсэн цагт хүн бүр санхүүгийн эрх чөлөөнд хүрэх боломжтой гэж олон ч номонд дурдагддаг. Санхүүгийн эрх чөлөө гэдэг бол харьцангуй ойлголт. Та мөнгөний төлөө ажиллахгүйгээр мөнгийг өөрийнхөө төлөө ажиллуулах боломж бол хөрөнгө оруулалт. Жишээлбэл, хувьцаа, бонд, хадгаламж, үл хөдлөх зэрэг юм. Өөрөөр хэлбэл сарын хэрэглээний зардал 500 мянга төгрөг гэж үзэхэд таны хөрөнгө оруулалтын өгөөж сарын хэрэглээний зардлыг тань нөхөж байгаа цагт та өөрийгөө санхүүгийн эрх чөлөөтэй гэж үзэж болно. 
 
Хөрөнгийн зах зээлийн ач холбогдлыг энгийн үгээр тайлбарлав
 
-Гол нь мөнгө их олохдоо биш харин олсноосоо хэдийг авч үлдэж, ирээдүйн өөрийнхөө төлөө хөрөнгө оруулах вэ гэдгээ шийдэх нь чухал. Олж байгаа мөнгөө удирдаж, мөнгийг өөрийнхөө төлөө ажиллуулах ухаан, унтаж байхдаа мөнгө олох аргыг олсон цагт данс нь хэзээ ч “0” заахгүй амьдралаар амьдрах боломжтой. Данс нь хэзээ ч “0” заадаггүй эмэгтэй ном хөрөнгө оруулагч болох анхны алхмын тань хөтөч болох юм. Санхүүгийн уналт эрсдэлээс өөрийгөө хамгаалж ирээдүйгээ өнгөлөхийг хүсэж буй эмэгтэйчүүдэд  зориулан номоо санхүүгийн эрх чөлөө, санхүүгийн боловсрол, санхүүгийн төлөвлөгөө, зураглал хэрхэн гаргах, хөрөнгө оруулалт гэж юу болох тухай дөрвөн бүлэгт хуваан бичсэн. Мөн үүгээрээ дамжуулж хөрөнгийн зах зээлийн ач холбогдлыг энгийн үгээр ойлгомжтой тайлбарлаж ойлгуулахыг зорьсон юм.   Эцэст нь та хамгийн шилдэг нь байх ёстой биш, харин сэтгэл хангалуун байж, харамсал багатай амьдрахын тулд өөрөөс шалтгаалах бүгдийг хийж, гарах үр дүнг тайвнаар хүлээн авч, урагшлаарай. Суралцахгүй бол хөгжихгүй. Зориглохгүй бол өөрчлөгдөхгүй. 
 
 
П.Амгаланбаяр
Эх сурвалж: "Зууны мэдээ" сонин