сонин mn

Австри улсын Вена хот дахь Монголын Элчин сайдын яамны сайтад Монгол Улсын Гавьяат жүжигчин, дуурийн дуучин Э.Амартүвшингийн талаар мэдээлжээ. Уг мэдээлэлд, Монгол Улсын Соёлын элч Э.Амартүвшинг Вена хотын дуурийн театр (Wie­ner Staatsoper)-т Ж.Вердийн алдарт “Набукко” дуурийн гол дүрд тоглохоор болсныг онцоллоо. Вена хотын дуурийн театр (Wiener Staat­soper) 60 гаруй төрлийн тоглолт бүхий 2021/2022 оны шинэ улирлын хөтөлбөрөө зарлаад байгаа бөгөөд тогтолтууд ирэх есдүгээр сараас эхэлнэ.

 

 

Э.Амартүвшин дэлхийн нэр хүндтэй театруудад тоглолтоо үргэлжлүүлж, шилдэг гэдгээ баталсаар байна. Тэрбээр 7-9 дүгээр сард Италийн Верона хотноо мөн “Набукко” дуурьт дуулах бол Вена хот дахь тоглолтын дараагаар 2022 онд Лондон, Мадрид хотноо мөн “Набукко”, Италийн Милан хотноо “Риголетто” дуурьт тус тус тоглох хуваарьтай байгаа талаар бичжээ.

 

 

“Набукко” дуурийг ирэх арваннэгдүгээр сарын 1, 6, 9-ний өдрүүдэд нийт гурван удаа толилуулах бөгөөд тоглолтын тасалбарыг https://rb.gy/tntkhu -ээс авах боломжтой ажээ.

 

Б.Сийлэн

Эх сурвалж: "Монголын үнэн" сонин