sonin.mn
Сэтгэгдэл (0)

 

Баянгол дүүргийн XII хо­роонд байрлах “High class” зочид буудлын зургаан давхрын цонхоор  энэ сарын 22-23-нд шилжих шөнө 34 настай эмэгтэй унаж амиа алдсан хэрэг гарчээ. Талийгаач эмэгтэй тухайн үед “High class” зочид буудлаар гурван найзын хамт үйлчлүүлж байсан аж. Зарим эх сурвалжийн ярьж буйгаар уг хэрэг шөнийн 00:00-02:00 цагийн үед болсон байна.
 
 
Тодруулбал, талийгаач эмэгтэй нэг эмэгтэй, хоёр эрэгтэйн хамт тус буудлын таван давхарт хоёр ортой, дөрвөн хүний өрөө авсан аж. Удалгүй найзууд нь талийгаач Ш-г зургаан давхрын 407 тоот өрөөний цонхноос унаж амиа алдсаныг мэдсэн байна. Түүнийг буудлын торон төмөр хашааны үзүүрт сүлбүүлсэн байдалтай бай­хад нь олсон байна.
 
 
Манай сурвалжлах баг өчигдөр 12:00 цагийн орчим хэрэг гарсан буудлыг зорьсон юм. Биднийг очиход талийгаачийг амиа алдах үед ажиллаж байсан буудлын үйлчлэгч, ресепшн нар ээлжээ хүлээлгэн өгсөн байв. Уг хэргийн талаар “High class” зочид буудлын үйлчлэгч М-ээс дараах зүйлийг тодруулсан юм.  
 
 -Хэрэг хэдэн цагийн орчимд гарсан бэ?
 
-Шөнийн 02:00 цагийн үед гарсан гэсэн.
 
 
-Талийгаач цонхоор унахдаа ганцаараа байсан уу?
 
-Тийм ээ, хажууд нь хэн ч бай­гаа­гүй гэсэн. Тэр эмэгтэй зур­гаан давхрын 407 тоот өрөөнд орж, шууд л цонхоор үсэрсэн байгаа юм.
 
 
-Яагаад таван давхарт өрөө авчихаад зургаан давхраас унаж, амиа алддаг билээ?
 
-Талийгаач эмэгтэй гурван найз­тайгаа таван давхарт хоёр ортой өрөө авсан юм билээ. Харин ээлжийн  үйлчлэгч  зургаан давх­рын 407 тоот өрөөг цоожлоогүй байх хооронд ийм хэрэг гарсан байна лээ.
 
 
-Цонхоор унасан шалтгаан нь юу байсан юм бол. Ямар нэгэн гадны нөлөө байсан юм биш биз?
 
-Тэрийг сайн мэдэхгүй байна. Буудалд өрөө авахдаа тийм аймаар согтуу байгаагүй гэсэн. Тэгээд ч манайх согтуу хүнд үйлчилдэггүй. Харин өөрсдөө гаднаас архи авч орсон байж магадгүй. Угаасаа эрүүл хүн цонхоор үсрэхгүй шүү дээ. Согтуу хүний л хийх үйлдэл гэж бодож байна.
 
 
-Үйлчлүүлэгчид өрөө авахдаа бичиг баримтаа шалгуулж, бүрт­гүүлдэг биз дээ. Бүртгэлийн дэв­тэр хөтөлдөг үү?
 
-Шалгаж оруулдаг. Яг одоо үйлчлүүлэгчдийг бүртгэдэг дэвтэр алга байна. Бүгдийг нь цагдаа нар аваад явчихсан.  
 
 
-Талийгаач дээрээс унахдаа зочид буудлын торон хашаан дээр унасан гэсэн?
 
-Тийм ээ. Цагдаа болон эмч нарыг очиход буудлын төмөр то­рон хашаанд сүлбүүлчихсэн бай­дал­тай өлгөөтэй байсан гэсэн. Үнэ­хээр аймшигтай. Тухайн үед би байгаагүй болохоор үүнээс өөр зүйл мэдэхгүй байна. Ийнхүү  бидний яриа өндөрлөсөн.
 
Тэндээс Баянгол дүүргийн цаг­даагийн хэлтсийг зорьсон ч “Хэргийг шалгаж байна” гэ­хээс өөр тодорхой хариулт өгсөн­гүй. Харин дээрх хэрэгтэй холбогдуулж “High class” зочид буудлын ээлжийн ажилчид болон хамт явсан гурван хүнийг Баянгол дүүргийн Цагдаагийн хэлтэст шалгаж байгаа ажээ.
 
Эх сурвалж: "Өглөөний сонин"