sonin.mn
Сэтгэгдэл (54)

ОХУ-аас Монгол Улсад суугаа Элчин сайд Алексей Николаевич Евсиков Зөвлөлт Орос, Ардын Монголын хооронд дипломат харилцаа тогтоосны 103 жилийн ойн баярын мэндчилгээ дэвшүүлжээ.


Тэрээр мэндчилгээндээ: "Монголын анд нөхөддөө Зөвлөлт Орос, Ардын Монголын хооронд дипломат харилцаа тогтоосны 103 жилийн ойн чин сэтгэлийн баярын мэндийг дэвшүүлье! 1921 оны 11-р сарын 5-ны өдөр залуу Зөвлөлтийн Бүгд Найрамдах Улс Монгол Улсын тусгаар тогтнол, ард түмнийх нь хувь заяагаа бие даан шийдвэрлэх эрхийг хүлээн зөвшөөрсөн анхны улс болсон билээ. Энэхүү үйл явдал нь Монголын ард түмний хурдацтай, эргэлт буцалтгүй хөгжил дэвшлийн чухал гарааны эхлэл болж, улмаар 20-р зууны хүнд хэцүү сорилт, аюул заналхийллээр дүүрэн байсан үед найрсаг Монгол Улсын тусгаар тогтнол, бүрэн эрхт байдлын найдвартай баталгаа болсон юм.


Орос-Монголын найрамдлын баялаг болон гэгээлэг хуудсаар дүүрэн түүхийг Орос улсад нандигнан хадгалж байдаг юм. Энэ оны 9-р сард Халхын голд Зөвлөлт, Монголын цэргүүд хамтарсан Ялалт байгуулсны 85 жилийн ойг тохиолдуулан ОХУ-ын Ерөнхийлөгч В.В.Путины Улаанбаатарт хийсэн айлчлал нь үүний нэг онцлог бэлэг тэмдэг болсон билээ.


Өнөөдөр манай улсуудын дайчин нөхөрлөл үргэлжлэн улам бүр бэхжиж байгааг тэмдэглэхэд таатай байгаа бөгөөд 1939 онд болсон байлдааны талбар орчим энэ оны 8-р сард ээлжит "Сэлэнгэ" хамтарсан хээрийн сургууль болсон юм. Дипломат харилцаа тогтоосны 103 жилийн ойн хүрээнд эдийн засгийн хамтын ажиллагааны томоохон тэмдэглэлт ойнууд тохиолоо. 75 жилийн тэртээ Зөвлөлт-Монголын “Улаанбаатарын төмөр зам” хувь нийлүүлсэн нийгэмлэг үүсгэн байгуулагдаж, өнөө хүртэл тус улсын тээврийн гол судас хэвээр байсаар байна. Энэ жил бид Зөвлөлтийн мэргэжилтнүүдийн туслалцаатайгаар Монгол Улсад атар газар эзэмшиж эхэлсний 65 жилийн ой, Зөвлөлт-Монголын найрамдлын бэлэг тэмдгүүдийн нэг болсон Эрдэнэт хот байгуулагдсаны 50 жилийн ойг тэмдэглэн өнгөрүүллээ. Өнөөдөр манай улс хамтын ажиллагааны шинэ чиглэлүүдийг хөгжүүлэхэд ашиг сонирхлыг харилцан хүндэтгэх байр суурийг тууштай баримталж байна.


Монголын түншүүдийн Евразийн эдийн засгийн холбооны зах зээлд илүү өргөнөөр нэвтрэх хүсэлтийн дагуу ЕАЭЗХ болон Монгол Улсын чөлөөт худалдааны түр хэлэлцээрийн төслийг жил хүрэхгүй хугацаанд тохиролцож чадлаа.


Үүний үр дүнд Оросын хэрэглэгчид тун удахгүй Монголын уламжлалт экспортын ноос, ноолуур, арьс шир, махан бүтээгдэхүүн зэрэг өндөр чанартай бараа бүтээгдэхүүнийг дэлгүүрийнхээ лангуун дээрээс худалдан авах боломж нээгдэх бөгөөд Монголын үйлдвэрлэгчдэд ч мөн цаашид хөгжих урам зориг нь нэмэгдэх болно гэдэгт итгэлтэй байна. Манай улсууд хоёр талын эрчим хүчний хамтын ажиллагааны томоохон боломжийг нээхийн төлөө ажилласаар байгааг тэмдэглэхэд таатай байна. ОХУ-ын хөнгөлөлттэй зээлээр хийгдэх Улаанбаатар хотын 3-р ДЦС-ыг Оросын дэвшилтэт технологийг нэвтрүүлэн шинэчлэн байгуулах ТЭЗҮ-г боловсруулах ажил идэвхтэй өрнөх шатандаа явж байна. Ерөнхийлөгч В.В.Путины саяхан Улаанбаатарт хийсэн айлчлалын үеэр Газрын тосны бүтээгдэхүүн нийлүүлэх чиглэлээр хамтран ажиллах тухай хэлэлцээрт гарын үсэг зурсан явдал нь ОХУ энэ төрлийн бүтээгдэхүүнээ Монголд тогтвортой экспортлох зорилготой байгааг баталгаажуулсан юм. Эгийн голд усан цахилгаан станц барих төслийн байгаль орчин болон Байгаль нуурт үзүүлэх нөлөөний тухай хамтарсан шинжээчдийн дүгнэлтийг хийхээр тохиролцсон. Монголд анхны бага хүчин чадалтай атомын цахилгаан станц барих талаар яриа хэлэлцээ хийж байна. Монголын газар нутгаар Оросоос Хятад руу байгалийн хийн хоолой татах асуудал яригдаж байгаа бөгөөд энэ нь мөн Монголын нийслэл хотыг байгалийн хийгээр хангах өргөн боломжийг нээж байгаа юм. 


Орос улс Монгол Улсын хөгжлийн тэргүүлэх салбаруудад ажиллах боловсон хүчнийг их, дээд сургуулиуддаа бэлтгэдэг уламжлалаа үргэлжлүүлсээр байна. ОХУ-ын Засгийн газраас жил бүр Монголд 620 оюутны төсвийн тэтгэлэг олгодог юм. Бид ирээдүйн оюутнуудын хэлний мэдлэгийг дээшлүүлэхийн төлөө хүчин чармайж байна.


Эл өдөр Орос, Монголын ард түмнүүдэд хөгжил цэцэглэлт, сайн сайхан, шинэ ололт амжилт, Орос-Монголын харилцааг Иж бүрэн стратегийн түншлэлийн хүрээнд хөгжүүлэх талаар хоёр улсын ерөнхийлөгч нарын тавьсан томоохон зорилтуудыг хэрэгжүүлэхийг чин сэтгэлээсээ хүсэн ерөөе!  " гэсэн байна.