sonin.mn
Сэтгэгдэл (29)

4.9 жилийн хорих ялаар шийтгэгдсэн сэтгүүлч Н.Өнөрцэцэгийн аав, ээж, эгч, дүү нар нь Монгол Улсын Ерөнхийлөгч, УИХ-ын дарга, Ерөнхий сайд нартай биечлэн уулзах хүсэлт тавьж байгаа талаараа Төрийн ордны гадна мэдээлэл хийлээ.


Энэ үеэр Н.Өнөрцэцэгийн эгч: "Миний дүүг таван хэргээр ялласан. Хоёр нь татвартай холбоотой хэрэг. Монголд татвартай холбоотойгоор ял шийтгүүлсэн ганц ч хүн байдаггүй юм билээ. Дараагийн хоёр нь бусдын алдар, нэр хүндэд халдсан гэх хэрэг. Эдгээр хэргүүд нь хорих ял шийтгэлгүй, торгуулийн ялтай.

Тав дахь нь буюу хамгийн гол яллаж буй нь төрийн нууц хадгалсан гэх хэрэг.


Zarig.mn сайт 20 гаруй сэтгүүлчтэй. Тэдгээр сэтгүүлчийн ширээн дээр, шүүгээнд нь ямар материал байгааг мэдэх аргагүй. Манай Өнөрөө ажил дээрээ бараг очдоггүй байсан.


Төрийн нууцтай холбоотой бичиг нь Өнөрөөгийнх биш ажилчдынх нь машинаас олдсон. Тэр машинд хоёр долоо хоног байсан. Гэтэл өөрт нь хамааралгүй юмыг хамаатай болгож байна.Дүү маань хоригдоод маш хүнд байна. Би өчигдөр эргэхэд их хэцүү байдалтай байсан." гэв.


Харин түүний дүү: " Төрийн нууцад хамаарах бичгийг өгсөн хүн нь Байгаль орчин, аялал жуулчлалын сайд асан, УИХ-ын гишүүн Б.Бат-Эрдэнэ. Тэр хүн төрийн нууцыг сэтгүүлчид дамжуулсан байтал ялгүй үлдээд, яагаад манай эгч ялтан болоод байж байгаа юм бэ? 


Б.Бат-Эрдэнэ нүүрсний сонсголын үеэр төрийн нууц гээд байгаа бичиг баримтыг zarig.mn сайтын сэтгүүлчид дамжуулсан. Сэтгүүлч тэр бичгийг нь шүүгээндээ хийсэн байсан.


Өнөрөө эгчийг хоригддог өдрийн орой zarig-ийн менежер тэр бичгийг бусад материалын хамт машиндаа хийсэн. Түүнээс хоёр долоо хоногийн дараа машиных нь цонх хагарчихлаа гээд өөр рүү нь залгасан. Гэтэл Өнөрөө эгчийг шалгаж байсан Амарбаясгалан гэдэг мөрдөгч zarig-ийн менежерийн машины цонх хагарсан газарт хоёр хүнтэй оччихсон байсан. Ингээд машинд нь үзлэг хийгээд, дотор нь байсан бичиг баримтуудыг хурааж авсан гэдэг. Маргааш нь Амарбаясгалан кофе ууя гэж дуудангуутаа гарын үсэг зуруулаад нөгөө бичиг баримтыг хүлээн зөвшөөрүүлсэн. Ийм л юм болсон. " хэмээсэн юм.


С.Сарнай