sonin.mn
Сэтгэгдэл (0)
Улаанбаатар /МОНЦАМЭ/. Герман дасгалжуулагч Майкл Вайссаар удирдуулсан Монголын хөлбөмбөгийн шигшээ баг 2018 оны 3-р сард ОУХБХ-ны шигшээ багийн өдрүүдээр хоёр албан ёсны нөхөрсөг тоглолт хийхээр болжээ.
“Талын хөх чононууд” эхний тоглолтоо гуравдугаар сарын 22-нд Куала-Лумпур хотод талбайн эзэн Малайзын шигшээ багтай хийнэ. Дараа нь энэ сарын 27-нд эх орондоо Африк тивийн Мауритус улсын багийг хүлээн авна. Манайхаас чамгүй дээгүүр түвшинд бичигддэг эдгээр багтай амжилттай тоглох нь манай шигшээ багийн чансаа дээшлэхэд ихээхэн ач холбогдолтой.
Манай улсын хувьд ОУХБХ-ны шигшээ багийн өдрөөр анх удаа талбайдаа олон улсын тоглолт хүлээн авч байгаагаас гадна мөн анх удаа Африк тивийн чадварлаг багтай тоглох гэж байна. Тиймээс манай шигшээ баг МХБХ-ны ногоон талбайд бэлтгэлээ хэдийн базааж эхэлсэн бөгөөд гуравдугаар сарын 4-нд урд хөршийг зорьж, Малайзтай хийх тоглолтын өмнө Юннан мужийн Кунминг хотод 14 хоногийн бэлтгэл хийх юм.
 
 
Монголын хөлбөмбөг сонирхогчдод энэ сарын 27-ны орой ногоон талбайдаа олон улсын тоглолт үзэж, шигшээ багийнхаа залууст урам өгч, хөгжөөн дэмжихийг МХБХ-ноос уриалж байна.
 
Үндэсний шигшээ багийн бүрэлдэхүүн: А.Сайханчулуун хаалгач /Улаанбаатар сити/
Э.Мөнх-Эрдэнэ хаалгач /Атлетик 220/
Б.Ариунболд хаалгач /Эрчим/
Д.Төрбат хамгаалагч /Атлетик 220/
О.Мөнх-Оргил хамгаалагч /Дэрэн/
А.Нармандах хамгаалагч /Дэрэн/
Н.Цэдэнбал хамгаалагч /Улаанбаатар сити/
О.Оюунбаатар хамгаалагч /Улаанбаатар сити/
Б.Даваажав хамгаалагч /Эрчим/
А.Мөнхнасан хамгаалагч /Эф Си Улаанбаатар/
М.Алтанхүү хамгаалагч /Улаанбаатар сити/
Г.Гантогтох хагас хамгаалагч /Улаанбаатар сити/
Б.Төгсбилэг хагас хамгаалагч /Улаанбаатар сити/
С.Ганхуяг хагас хамгаалагч /Хангарьд/
Ц.Мөнх-Эрдэнэ хагас хамгаалагч /Хангарьд/
О.Баяржаргал хагас хамгаалагч /Эф Си Улаанбаатар/
Б.Цэрэнбаяр хагас хамгаалагч /Улаанбаатар сити/
Ж.Сүндорж хагас хамгаалагч /Улаанбаатар сити/
Ц.Түмэнжаргал довтлогч /Улаанбаатар сити/
С.Гал-Эрдэнэ довтлогч /Эрчим/
П.Энхбилэг довтлогч /Гоёо Эф Си/
Ахлах дасгалжуулагч: Ханс Майкл Вайсс
Туслах дасгалжуулагч: З.Баттулга
Менежер: Б.Энхжин
Багийн эмч: Г.Мөнхзул
 
                                                                                                                                                
Д.Өлзий
Эх сурвалж: Монцамэ агентлаг