sonin.mn
Сэтгэгдэл (0)
Өнөөдөр иргэд нийслэлийн төв талбайд цуглан, жагсаж эхэллээ. Тэд "УИХ-ыг тараа, Үндсэн хуулинд нэмэлт өөрчлөлт оруулж, УИХ-ын гишүүдийн тоог 152, 126 болгохыг зөвшөөрөхгүй, Боловсролын зээлийн санг тоносон этгээдүүдэд хариуцлага тооц" гэсэн лоозон барьсан байв.
 
 
Жагсаалын үеэр иргэд: "Одоо бид төрийнхөө үйл хэрэгт шууд оролцох хэрэгтэй болжээ. Энэ УИХ-ыг тараагаад бид 1992 оных шиг тогтолцооны өөрчлөлт хийнэ. Ардын Түр хурал байгуулж гишүүдээ сонгоод жинхэнэ итгэл даах хүмүүсийг төрд оруулаад Шинэ Үндсэн хуулийг хэлэлцэнэ. Ард түмний төлөөлөл өөрсдөө шинэ Үндсэн хуулийг хийх ёстой болохоос энэ хулгайчид хийх эрхгүй. УИХ-ын гишүүдийн тоог нэмнэ гэдэг хуулийн төсөл батлах гээд байна. Энэ талаар нь 5 сарын 5-наас эхлэн талбай дээр хүмүүсийн гарын үсэг цуглуулж санал авлаа.
 
Үүнд саналаа өгч гарын үсэг зурсан хүмүүсийн 99,9 хувь нь УИХ-ын гишүүдийн тоог нэмэхийг эсэргүүцэж байна.
 
Дэмжиж байгаа иргэд алга. Ингээд 85 хуудас бүхий иргэдийн гарын үсэгтэй саналын төрийн гурван өндөрлөгт хүргүүлсэн. Иргэд ҮХНӨ-ийг дэмжихгүй байна.
Монгол хүний Үндсэн хууль бол газар, хүн, эрх чөлөө. Эдгээр бидний үнэт зүйл өнөөдөр хаана байна вэ? Байхгүй. Энэ хулгайчууд биднийг цонхоороо хараад инээгээд сууж байна. Монголын ард түмэн сэрэх цаг нь болсон. Эдгээр хулгайчуудаас юуг ч шаардаад, шахаад нэмэргүй. УИХ болон төр удирдаж байгаа нөхдүүд бүрэн бүрэлдэхүүнээрээ огцрох ёстой. 12 сард огцор гэсэн, огцроогүй. Ямарваа нэгэн жагсаал цуглааныг өөрсдийнхөө тал руу чиглүүлж, троллууд гаргаж ирж буруу тийш нь түлхдэг болчихсон. Тийм учраас өнөөдөр бид нэгдэж ирээдүйнхээ төлөө, үр хүүхдийнхээ төлөө тэмцэхгүй бол Монгол орон маань мөхөхөд тун ойрхон ирээд байна. Тийм учраас УИХ-ыг нэн даруй тараах шаардлагатай байна.
 
 
152 гишүүн гэж яриад байна. Битгий солиор. 126 ч солиор. 76 ч солиор. Сүүлийн 7 жилийнх шиг ийм увайгүй, шунахай, идэж уухаас өөр юм мэддэггүй парламент Монголын байтугай дэлхийн түүхэнд байхгүй.
 
 
Монголын ард түмэн эднийг хэзээ ч сонгохгүй болсон учраас жагсаалт нэрээр өөрсдийгөө оруулж ирэх гэсэн санаархал. Эдний хулгайг ярьж дийлэхгүй. Далай. Яагаад ковидоо ярихгүй байгаа юм? Өнөөдөр төрж байгаа хүүхэд бүр 30 сая төгрөгийн өртэй гэж яриад байна. Бид нар тэр өрийг тавьсан юм уу? Үгүй. Сүүлийн 30 жил төр барьж байгаа хулгайчуудын тавьсан өр. Тийм учраас ямар ч чадамжгүй парламент тарах ёстой. Тараахын төлөө ард түмэн тууштай явах ёстой." гэх мэтээр байр сууриа илэрхийлж байлаа.
 
 
М.Чой