сонин mn
Сэтгэгдэл (0)
НЬЮ-ЙОРК. /Anadolu/. Дэлхийн эдийн засгийн төлөв байдал газрын тосны хэрэглээнд нөлөөлөх төлөвтэй байгаатай холбоотойгоор мягмар гарагт 4 гаруй хувиар унаад байсан газрын тосны үнэ лхагва гарагт дахин буурчээ.
 
Тодруулбал, олон улсын жишиг “Brent” маркийн газрын тосны торхын үнэ лхагва гарагт 0.43 хувиар буурч, 81.74 ам.долларт хүрсэн бол Америкийн жишиг “WTI” маркийн нефтийн үнэ 0.55 хувиар унаж, 76.50 ам.долларт хүрсэн байна.
 
Мягмар гаргийн арилжаагаар хоёр маркийн газрын тосны үнэ аль аль нь огцом уналт үзүүлж, “Brent” маркийн газрын тосны үнэ ойролцоогоор 5 ам.доллароор унаад байсан юм. Олон улсын валютын сангийн /ОУВС/ тэргүүн Кристалина Георгиева 2023 онд дэлхийн эдийн засгийн гуравны нэг нь уналтад орж болзошгүй байгааг анхааруулсны дараа газрын тосны эрэлт буурах вий гэсэн болгоомжлол үүсжээ. 
 
“Эдийн засаг нь уналтад ороогүй орнуудад ч олон зуун сая хүнд уналтад орсноос өөрцгүй санагдах бололтой байна” гэж К.Георгиева “CBS” телевизэд саяхан ярилцлага өгөх үеэрээ тэмдэглэн хэлсэн юм.
 
АНУ, Европын Холбоо, Хятадын эдийн засгийн өсөлт саарч байгаа тул дэлхийн ихэнх улс орнуудын хувьд айлчлан ирж буй он өнгөрсөн жилийнхээс хүндхэн байх төлөвтэй байгааг тэрбээр сэрэмжлүүлжээ. Мөн ЕХ Украинд болж буйнд “хүчтэй” нэрвэгдэж, тус холбооны орнуудын тэн хагас нь уналтад орж болзошгүй онцлоод, бодлогын хүү, ам.долларын хүчтэй өсөлт зэргээс шалтгаалан хөгжиж буй эдийн засагтай орнуудын хэтийн төлөв улам бүр бүрхэг болж байгааг нэмж хэлсэн байна. 
 
 
Э.Хулан
Эх сурвалж: "Монцамэ" агентлаг