сонин mn
Сэтгэгдэл (4)
Монгол Улсын Ерөнхийлөгчийн зарлигаар ОХУ-ын Газрын тос, байгалийн хийн Улсын их сургуулийн ректор В.Г.Мартынов, Москвагийн Олон улсын харилцааны дээд сургуулийн ректор А.В.Торкунов нарыг төрийн дээд шагнал "Алтан гадас" одонгоор шагнасныг Монгол Улсаас ОХУ-д суугаа Онц бөгөөд Бүрэн эрхт Элчин сайд Д.Даваа энэ сарын 15-нд гардуулав.
 
Мөн “Одияна орчин” ХХК-ний үүсгэн байгуулагч Р.В.Торияаг "Найрамдал" медалиар шагнасныг гардуулсан юм.
Шагнал гардуулах ёслолын өмнө Элчин сайд Д.Даваа ОХУ-ын Газрын тос, байгалийн хийн Улсын их сургуулийн ректор В.Г.Мартыновтой уулзаж, Газрын тос, байгалийн хийн Улсын их сургууль Монгол Улсын боловсон хүчинг бэлтгэхэд үнэтэй хувь нэмэр оруулж буйг онцлов. Тус сургуулийн ректор В.Г.Мартынов цаашид Монголын байгалийн хийн салбарын мэргэжилтэн, боловсон хүчин бэлтгэхэд түлхүү анхаарч ажиллахаа илэрхийлэв.
 
Түүнчлэн Элчин сайд Д.Даваа Москвагийн Олон улсын харилцааны дээд сургуулийн ректор А.В.Торкуновтой хийсэн уулзалтын хүрээнд тус сургуульд анхны гадаад оюутнаар монгол оюутан элссэний 75 жилийн ой энэ онд тохиож буйг тэмдэглэв. Өнгөрсөн хугацаанд тус сургууль Монгол Улсын хөгжил дэвшилд хувь нэмэр оруулсан олон төр, нийгмийн зүтгэлтнүүдийг бэлтгэсэнд талархал илэрхийлэв. Москвагийн Олон улсын харилцааны дээд (их) сургуулийн ректор А.В.Торкунов Монгол Улсын хүндтэй төрийн дээд шагнал хүлээж авсандаа баяртай буйгаа илэрхийлэн, цаашдын хамтын ажиллагаа улам бүр өргөжин хөгжинө гэдэгт итгэлтэй байна гэв.