sonin.mn
Сэтгэгдэл (0)
Ардчилсан намаас зохион байгуулж буй төвийн бүсийн “Эдийн засгийн форум” амжилттай үргэлжилж байна. Ардчилсан намын дэд дарга Р.Эрдэнэбүрэн “Говийн бүсийн эдийн засгийн хөгжилд усан хангамжийн нөлөө”, Улс төрийн зөвлөлийн гишүүн Л.Одсэр “Чинээлэг малчин”, Ардчилсан намын даргын зөвлөх Ж.Баясгалан "Нийгмийн бодлогын хүртээмжтэй байдал", Дундговь аймгийн Засаг дарга Ц.Мөнхбат “Дундговь аймгийн бизнес эрхлэлт ба залуучууд”, Өмнөговь аймгийн Засаг дарга С.Сэддорж “Өмнөговь аймгийн Бизнес эрхлэлт ба залуучууд”  сэдвээр тус тус илтгэл хэлэлцүүлж байна. 
 
Форумыг нээж, АН-ын дарга Л.Гантөмөр үг хэлэхдээ: "Бидний үйл хэрэг нэгдүгээрт, Монгол улсын төлөө байна. Хоёрдугаарт, Ардчилсан намын төлөө байна. Гуравдугаарт, орон нутгийнхаа төлөө байна. Дөрөвдүгээрт, өөрийнхөө төлөө байя гэж. Монголчууд бид хэсэг хугацаанд эрх чөлөөтэй болсноо мэдэрсэн. Ардчиллын үед үгээ хэлсэн хүнийг шоронд хийхийг болиулсан. Ардчиллын үед хүнийг цаазаар авахыг болиулсан. Ардчиллын үед хүнийг хэлмэгдүүлэхийг зогсоосон. Ингээд болчихлоо гээд бодчихсон. Бид болгочихлоо, цаашаагаа ард түмэн өрсөлдөөд, ажлаа хийгээд, төр засаг нь бодлогоо явуулаад болох юм байна гээд. Түүнээс хойш яасан бэ? гэхээр өөр өөрийн хувийн ухаан, хувийн тактикаа гаргаад эхэлсэн.
 
 
Хувийн тактикууд мөргөлдсөн. Энэ мөргөлдөөн Ардчилсан намын хагарал болсон. Тийм учраас энэ удаагийн Ардчилсан намын нэгдэл эхлээд бидний зорилго биелсэн үү? гэдгийг бүх гишүүдээсээ асууж байгаа юм. Биелээгүй гэдгийг сүүлийн хэдэн жил маш тодоор харж байна.
 
 
Бидний нүдэн дээр үг хэлсэн хүнийг шоронд хийхийг харлаа. Бид нарын нүдэн дээр шүүмжлэл бичсэн сэтгүүлчийг өдөр бүр цагдаагаас дуудаж байгааг харж байна. Нүдэн дээр маань бизнесүүдийг авчраад шүүж байгааг харж байна. Нүдэн дээр маань өмчийг нь дээрэмдээд авч байгааг харж байгаа. Маргааш бид яах ёстой вэ? Маргааш яах вэ? гэдэг бидний асуудал маш тодорхой. Хүмүүс яагаад стрессдээд, яагаад уурлаад байгаа юм бэ? Амьдрал нь яагаад болохгүй байгаа юм бэ? Орлого нь яагаад амжиргаанд нь хүрэхгүй байгаа вэ? гэдэг бүх учир шалтгааныг бид тайлж байгаа.
 
 
Дөрөвхөн жилийн дотор Засгийн газар 12 их наяд төгрөгийн өр тавьсан байна. 2020, 2021, 2022, 2023 онуудад. Энэ өрийг яаж төлсөн бэ? Маш амархан төлсөн. Төгрөгийн ханшийг унагаж төлсөн. Бидний худалдан авах чадварыг бууруулж төлсөн. Шатахуун 1000 төгрөгөөр авдаг байсан бол одоо 3000 төгрөгөөр авч байна.
 
 
Байрны түрээсэнд 500 мянган төгрөг төлдөг байсан бол 1 сая 500 мянган төгрөг төлдөг боллоо. Социалист бодлого гэдэг нь ард түмэнд байсан боломжийг нь булааж аваад, нөгөө талаараа цоо шинэ нийгмийг үүсгэдэг. Тэр нь ядуу буурай нийгэм. Социалист бодлогын гай нь хүмүүсийг ядууруулж байна. Социалист бодлогын гайгаар бид мөнгөгүй болж эхэлдэг. Зээлгүй хүн алга. Сүүлдээ зээлийн хүүгээ дийлдэг хүн байхгүй боллоо. Бидний стратеги яг энэ рүү хандана.
 
Маш бодитой зүйл рүү бид бүх стратегиа чиглүүлэх ёстой. Ардчилсан нам төр баривал юу болох вэ? Иргэд банкнаас зээл авч чаддаг болох ёстой. Социалист бодлого бидэнд ганц приус авсан ч тэр нь зовлонд унагадаг санхүүгийн системийг санал болгодог. Ардчилсан намын стратеги бол социалист бодлогын гайгаар монголчуудын хамгийн хүнд байгаа асуудлыг шийдэх ёстой. Түүндээ бид үнэнч байх ёстой.
 
 
Ардчилсан нам МАН шиг 8 жил төр баривал үр дүнд нь юу үлдэх вэ? гэхээр нэгдүгээрт, Монгол улс өргүй болох ёстой. Хоёрдугаарт, Монголын ард түмэн өрнөөс салах ёстой. Гуравдугаарт, дундаж орлоготой иргэд нь 50 хувьд хүрэх ёстой. Маш ойлгомжтой зорилго.
 
 
Маш ойлгомжтой зорилго нь маш ойлгомжтой үйлдлээр илчлэгдэх хэрэгтэй. Монголд социалист, популист, түмэн олонд мөнгө очихгүй байх бодлогыг явуулж байна. Картаар, гар дээр нь тарааж, саналыг нь худалдаж авахад зориулж тараана. Нэр хүнд нь унахаар нэмж тараана. Нэмснийгээ ханш унагаж төр буцааж халаасандаа авдаг. Ийм төртэй цаашаа явж болохгүй. Өргүй Монголын төлөө бүгдээрээ явья." гэв.
 
 
М.Чой