сонин mn
Сэтгэгдэл (16)
ЖАМЦЫН ЖАМСРАН
(1923-2021)
 
Монгол Улсын Зэвсэгт хүчний ахмад ажилтан, чөлөөнд байсан хурандаа Жамцын Жамсран 2021 оны 7-р сарын 11-ний өдөр хорвоогийн мөнх бусыг үзүүлэн бурхны оронд заларлаа.
Хурандаа Ж.Жамсран нь 1923 оны 8-р сарын 15нд Хэнтий аймгийн Цэнхэрмандал сумын Бор-Өндөр гэх газар малчин ард Жамцын хүү болон төрсөн юм.
Тэрээр 1940-1943 онд тухайн үеийн Дотоод явдлын яаманд хянагч, нарийн бичгийн дарга, 1945-1947 онд Дорнод, Ховд аймгуудад Монголын хувьсгалт залуучуудын эвлэлийн хорооны 1-р нарийн бичгийн дарга, 1947-1950 онд Монголын Хувьсгалт Залуучуудын Эвлэлийн төв хорооны зохион зааварлах хэлтсийн дарга, 1953-1957 онд Монголын хувьсгалт залуучуудын эвлэлийн төв хорооны нарийн бичгийн дарга, 1963-1965 онд БНМАУ-ын Сайд нарын зөвлөлийн зохион зааварлах хэлтсийн дарга, 1965-1966 онд Завхан аймгийн дарга, 1966-1969 онд Дорнод аймгийн намын хорооны 1-р нарийн бичгийн дарга, 1969-1972 онд БНМАУ-ын Ардын армийн улс төрийн газрын 1-р орлогч дарга, Ардын их хурлын депутатаар тус тус ажиллаж байв.
1938-1940 онд Хэнтий аймгийн Цэнхэрмандал сумын бага сургууль, 1943-1945 МАХН-ын Төв хорооны дэргэдэх намын шинэ хүчний дээд сургууль, 1950-1953 онд Москва хотын Коммунист залуучуудын эвлэлийн төв сургуульд, 1957-1963 онд ЗХУ-ын Хууль цаазын дээд сургууль тус тус төгсжээ.
 
Хурандаа Ж.Жамсран нь элэгний хавдраар оношлогдож улмаар эмчилгээгүй болсон тул ажил, албан тушаалаа өөрийн хүсэлтээр хүлээлгэн өгч Бурхан Халдун ууланд нутаглаж эмийн ургамал, уламжлалт эмчилгээг судалж шинэ эмчилгээг нээн илрүүлж өөрийн хүнд өвчнийг бүрэн эмчилсэн юм. Өөрийн туршлага, судалгаанд тулгуурлан Хурандаа Ж.Жамсран нь олон зуун хүнийг эмчилж, олон арван ном гаргасан учир ард түмний дунд элэгний Жамсран хурандаа хэмээн алдаршсан билээ.
 
Түүний хөдөлмөрийг төр засгаас өндрөөр үнэлж “Байлдааны гавъяаны улаан туг”-ийн одон, “Алтан гадас” одонгоор 2 удаа, “СССР-ын Таван хошуу” одон, улс хувьсгалын 40-100 жилийн ойн медалиуд зэрэг олон цол, тэмдэг, медалиудаар шагнагдаж байсан.
Таны минь гэгээн дүр, хүнлэг сайхан чанар, ариун сайхан үйлс хөдөлмөр бид бүхний сэтгэл зүрхэнд үүрд дурсагдах болно.
 
Үр хүүхэд, төрөл төрөгсөд нь
УМ САЙН АМГАЛАН БОЛТУГАЙ