сонин mn
Сэтгэгдэл (10)
"Нүүрсний хулгайн" буюу УИХ-ын гишүүн асан Т.Аюурсайхан, "Эрдэнэс Тавантолгой" ХХК-ий Захирал асан Б.Ганхуяг нарын 11 хүнд холбогдох хэргийн шүүх хурлын урьдчилсан хэлэлцүүлэг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд өнөөдөр болж байна.
 
Уг хурлын үеэр яллагдагч Х.Ганхуяг: "Өнөөдрийн хуралдаанд  нэр бүхий 11 хүнд холбогдох хэргийг урьдчилан хэлэлцэж байна. Хэрэг дотор надтай холбоотой зургаан үйлдэл бий. Үүнд нэг шанага ч нүүрстэй холбоотой асуудал огт  байхгүй. Анх 2023 оны 12-р сарын 8-ны өдөр намайг анх цагдан хорьсон. Цагдан хорьсон прокурорын тогтоол дээр "жагсаал цуглаан зохион байгуулсан, турхирсан, санхүүжүүлсэн" гэдэг үндэслэл дурьдсан байсан. Есөн сарын хугацаанд  үүнтэй холбоотой нэг ч мэдүүлэг аваагүй. Энэ хавтаст хэрэг дотор жагсаал цуглаантай холбоотой ямар ч хэрэг байхгүй. Гэтэл араас нь "Нүүрсний хэрэг" гэгчийг  гаргаж ирсэн. Нүүрстэй холбоотой 50, 60 хүнээс мэдүүлэг авсан. Тэднээс нэг нь ч үлдээгүй.
 
Одоо УИХ дээр нүүрсний хулгайтай холбоотой ажлын хэсэг байгуулагдсан байна. Тэд байнга нүүрс ярьж байна. Тэгсэн мөртлөө надтай холбоотой юу ч яригдахгүй байгаа. 
 
2023 оны 8-р сарын 23-ны өдөр ажилдаа ирсэн эсэх асуудал, АТГ-ын тогтоол зэрэг нь дандаа зөрүүтэй. Гадуур яригдаад байгаа шиг 40 их наяд төгрөгийн хохирлын асуудал байхгүй. Энд хоёр гурван хүний маргааны асуудал бий. Өөр хүмүүсийн хэргийг бидэнд тохох гээд байгаа юм уу?
АТГ-ынхан  ямар ч үндэслэлгүй 19 удаагийн захирамжаар намайг хорьж байна." гэсэн юм.
 
Мөн тэрээр өөрийг нь шүүж буй шүүгчээс татгалзах хүсэлт гаргаж байгаагаа мэдэгдэв. Харин прокурор: "Өнөөдөр гэм буруугийн тухай шүүхгүй. Хэргийн урьдчилсан хэлэлцүүлэг явагдаж байна. Яллагдагч Б.Ганхуяг шүүгчээс татгалзаж байгаа юм байна. Гэвч үндэслэлээ тайлбарлаж чадсангүй" хэмээсэн юм.
 
Э.Мягмар