sonin.mn
Сэтгэгдэл (0)
Нийслэлийн "Өргөө" амаржих газрын зарим эмч нарын буруутай үйл ажиллагаанаас болж хүү нь эрэмдэг болсон талаар иргэн Б.Эрдэнэцэцэг мэдээлэл хийлээ. 
 
Тэрээр: "Би нөхөр гурван хүүхдийн хамт амьдардаг. 2022 оны аравдугаар сарын 02-ны өглөө ус гараад "Өргөө" амаржих газарт очсон. Эмч нарыг ээлжээ хүлээлцэж дуустал хүлээж байгаад төрөх хэсэг рүү орсон. Тасгийн эрхлэгч нь өөрөөрөө төрөх боломжтой юм байна гэж хэлсэн. Ус гарсан учраас сэдээлт хийнэ гээд хийсэн. Нийтдээ гурван удаа сэдээлт хийсэн. Ус гарчихсан байхад хоёр хоног төрөхийн өрөөнд хонуулаад, аравдугаар сарын 4-нд хүүхэд чинь доошлохгүй байна гээд кесар хагалгаа хийж хүүг маань төрүүлсэн.
 
 
Намайг гурван өдөр усгүй өвдөж байлгачихаад гэнэт хагалгаа хийж төрүүлэхээр болсон. Хүү маань бүтэлттэй төрсөн. Ингээд хүүг маань сэхээн амьдруулах тасаг руу авч явсан. Миний хүү одоо зургаан сартай ч их жижигхэн. Эмч нарын буруутай үйлдлээс болоод хүү маань зургаан сартай мөртлөө, хоёр сартай хүүхэд шиг жижигхэн байна.
 
 
Толгойгоо даахгүй, нүд нь солир, ээжийгээ, аавыгаа харж, мэдрэхгүй байна. Би бүх эмчийг буруутгаагүй. Тухайн үеийн тасгийн эмч болон н.Оргилсайхан, н.Мядагмаа эмч нар жоохон сэтгэл гаргасан бол миний хүү эрүүл саруул байх байлаа. Хүчилтөрөгчийн архаг дутагдлаас болж тархиндаа нөлөөлөөд ийм байдалтай болчихсон.
 
Гэтэл Өргөө амаржих газраас ээж халдвартай байсан, хүүхэд ээжээсээ халдвар авсан гэж өөрсдийгөө зөвтгөдөг. Гурав хоног өвдөж байхад яагаад хурдан төрүүлээгүй юм. Би гомдолтой байна. Төрснөөс хойш “Өргөө” амаржих газар ганц ч удаа хүүг маань яаж байна гэж асуугаагүй. Өргөө амаржих газраас би өөрөө, бас хүүхэд маань Covid-19-ийн халдвар авсан. Эх нялхас руу шилжүүлсэн боловч Covid-19 илрээд аваагүй.
 
Манай хүүхдийг Монголд эмчлэгдэхгүй гэсэн. Шинжилгээ хийлгэхэд хүчилтөрөгчийн дутагдлаас болоод тархиа гэмтээсэн байна. Дээрээс нь халдвар авсан байна гэсэн.
Бүх үйл явц эмнэлгийн буруутай үйл ажиллагаанаас болсон гэж бодож байгаа. Намайг зүгээр төрүүлсэн бол ийм асуудал гарахгүй." гэсэн юм.
 
 
М.Чой