sonin.mn
Сэтгэгдэл (0)
Монголын жүдо бөхийн холбооны ерөнхийлөгч Х.Баттулга нийт жүдо сонирхогчдод шинэ жилийн баярын мэндчилгээ илгээжээ. Мэндчилгээг уламжилья.
 
Эрхэм хүндэт жүдо бөх сонирхогчид оо!
 
Айлчлан ирж буй шинэ жилийн баярын мэнд дэвшүүлэн сайн сайхныг хүсье. Өнгөрч буй 2013 онд Монголын жүдочид Тив, Дэлхий, Олон улсын тэмцээнээс 26 алт, 52 мөнгө,  75 хүрэл нийт 153 медаль хүртлээ. Үүнд Өсвөр үе, залуучуудын Дэлхийн аварга, Насанд хүрэгчдийн Дэлхийн аварга шалгаруулах тэмцээнээс 6 медаль, 1 алт, 2 мөнгө, 3 хүрэл медаль авч анхны эмэгтэй Дэлхийн аварга төрж, ард олноо магнай тэнийлгэн баярлууллаа. Мөн Дэлхийн Тулааны Спортын Наадамд гайхалтай амжилт үзүүлж эмэгтэй баг гуравдугаар байр, эрэгтэй баг хоёрдугаар байр эзэлсэн сайхан амжилт үзүүллээ. 
 
Олон Улсын Жүдо Бөхийн Холбооны Тивийн цомын тэмцээн, Гранд-При, Их Дуулга, Дэлхийн мастер зэрэг өндөр зэрэглэлийн тэмцээнүүдийн нийлбэр дүн, бүх амжилтаараа  Монголын баг Дэлхийд гуравдугаар байранд орсон нь хамтын ажлын үр дүн юм. 
 
Монгол оронд дотоодод 60 гаруй тэмцээн зохион байгуулж нийт 10 000 гаруй хүүхэд, залуучууд хамрагдаж хүч чадал ур чадвар, зориг тэвчээрээ шалгасан байна.  Үүний хажуугаар сургалт, семинар, нарийвчилсан хичээлийг явуулсан нь хойч ирээдүйд зайлшгүй хэрэгтэй бөгөөд ерөнхий боловсролын хичээлд оруулах боломж нөхцөл бүрдүүлж байна. Жүдо бөх нь Дэлхийн 200 гаруй оронд хөгжсөн хамгийн олон хүн хичээллэдэг тулааны урлаг, гайхамшигтай спорт юм.
 
Түүнээс гадна жүдо бөхийн спорт хүнийг төлөвшүүлдэг цогц боловсролын сургалт, системчилсэн хичээл арга ухаан юм. Жүдогоор дамжуулж эх оронч, шударга, ёс суртахуунтай, хүмүүжил, сахилга баттай иргэн хүн бэлтгэж байгаагаараа онцлог бөгөөд мөн биеийн болон оюуны олон төрлийн дасгал сургуулилт болдгоороо Монол хүнд тохирсон онцлогтой юм. 
 
Монгол Улсын Ерөнхийлөгчийн нэрэмжит “Чингис хаан” Дэлхийн цомын аварга шалгаруулах тэмцээний зэрэглэлийг ахиулж энэ жил анх удаа Гранд-При тэмцээн болгон Монгол Улсад зохион байгууллаа. Энэ тэмцээнийг анх удаа Дэлхийн 160 гаруй оронд шууд нэвтрүүлж телевизийн түүхэн өөрчилтийг эхлүүлж чадлаа.
 
Мөн 2013 онд Монголын Жүдо Бөхийн Ордон барихаар шав тавьж ажил эхлүүлсэн бөгөөд тусалж, дэмжихээр маш олон хүн саналаа илэрхийлж байгаад жүдочид баярлаж, хичээж байна.
 
2014 он бол Олимпийн эрхийн онооны чухал тэмцээнүүд үргэлжилж, ОХУ-д болох Дэлхийн аварга, БНСУ-д болох Азийн тоглолт зэрэг чухал тэмцээнд амжилттай оролцож, алтан медаль авах хүсэл, эрмэлзэлтэй байгаа бөгөөд үүгээрээ Монгол орноо мандан бадруулж спортын ертөнцөд гайхамшгийг бүтээх чухал хариуцлагатай жил болно. Энэ амжилтыг хамтдаа хийж бүтээхийг уриалж байна.  
 
Төгсгөлд нь Монголын жүдог Монголчууд бид өөрсдөө хөгжүүлж байна. Аймаг, сум, дүүрэг, хороо, клуб, нийгэмлэг, сургууль зэрэгт жүдо бөхөөр хичээллэж, түүнийг хөгжүүлж байгаа удирдлага, хөрөнгө оруулагчид, Дэд ерөнхийлөгч нарт баярлалаа. Уйгагүй хөдөлмөрлөн сэтгэл зүрхээ зориулж байгаа бүх багш, дасгалжуулагч, тамирчид, тэднийхээ найдвартай ар тал болж ирсэн гэр бүлийнхэн, эцэг эхчүүд болон  дэмжигч ард түмэндээ баярлалаа. 
 
    Гүнээ хүндэтгэсэн:
 
Монголын Жүдо Бөхийн Холбооны Ерөнхийлөгч Х.Баттулга