sonin.mn
Сэтгэгдэл (0)

-Секундын алхамд шилжсэнээр хэрэглэгч хоёр дахин хурдан халаасаа сэгсрүүлэх боллоо-

Товчхондоо, Мобиком О.Магнайг молигдож, ард түмнийг амаар нь шороо үмхүүллээ. Тодруулбал, өнгөрсөн оны 10 дугаар сарын 16-нд Шударга өрсөлдөөн хэрэглэгчийн төлөө газар (ШӨХТГ), Харилцаа холбооны зохицуулах холбоо (ХХЗХ),

 

Мэдээлэл, шуудан, харилцаа холбоо, технологийн газар (МШХХТГ) болон үүрэн холбооны компаниуд хамтран “хэрэглэснийхээ хэмжээнд төлье” хэмээгээд иргэдийн яриаг секундээр хэмжих гэрээнд өөр өөрийн мутраа үзгэлцгээсэн. Гэсэн ч тэдний гэрээ амьдрал руу хөрвөхдөө ард иргэдийн ачааг улам бүр хүндрүүлж орхилоо.

 

Сийрүүлбэл, Мобиком корпорацийн урьдчилсан төлбөрт хэрэглэгч нэг минутын яриаг 100 төгрөгөөр үнэлдэг байв. Гэтэл секундын алхамд шилжсэнээр нэг секундын яриаг 2.2 төгрөгөөр үнэлж нэг минутын яриа 132 төгрөгөөр үнэлэгдэх боллоо. Судалгаагаар гар утас хэрэглэгч иргэдийн 50-с дээш хувь нь эхний минутад багтааж яриагаа дуусгадаг аж.


Үүнээс үзэхэд, хэрэглэгч 50 хүрэхгүй секунд яриад нэг минутын төлбөрөөс илүүг төлөх нь. Гэхдээ үүнд бас нэг залжин санаа шургалсан нь хэрэглэгч өөрөө секундын багцад шилжих хүсэлтээ гаргах гэнэ. Яаж ч бодсон секундын алхамд шилжих нь ашиггүй. Тиймээс иргэд илүү мөнгө төлөх саналыг тоомжиргүй орхих нь дамжиггүй.

 

Тэгэхээр өнөөх шударга үнэний дуу хоолой болсон О.Магнай дарга “Мобиком” компанид дөнгүүлчихлээ. Тиймээс монопол эрхээрээ молигодож ирсэн “Мобиком” Монголын иргэдийг дахиад л шулж эхлэх нь. Үүнд, О.Магнай дарга, ХХЗХ, МШХХТГ газруудын гар хөл оролцсон нь тодорхой.

 

Гэхдээ иргэдийн сэтгэлийг тайтгаруулж, эцэст нь эрх мэдэлдээ жулдсан даргын үүрэг “роль” илүүтэй харагдаж байна. Тиймээс О.Магнай даргын шийдвэрийг онцлон үзье. Чиг үүргийн хувьд ШӨХТГ нь үүрэн холбооны компаниудын үнэ тарифийг тогтоодог байгууллага биш.

 

Гэхдээ О.Магнай дарга секундын алхамд шилжсэнээр хэрэглэгчийн хувьд 30 хүртэл хувийн хэмнэлт гарна гэсэн тооцоог тооны ухаанаар тайлсан гэдэг. Гэтэл толгой нь хүрсэнгүй юу, тооны машин нь алдаатай байсан уу, тэгтлээ хүссэн  хэмнэлт нь доголдол үүсгэж байна.

 

Тодруулбал, эхний минутад яриагаа дуусгадаг гэх 50-с дээш хувийн хэрэглэгч болон түүнээс дээш минутаар ярьдаг хэрэглэгчид “хохирогч” болох нь. Тиймээс таны яриад байгаа хэмнэлт хаана байна гэж асуумаар байна. Нөгөөтэйгүүр 50-с дээш хувь нь эхний минутад яриагаа дуусгадаг тэр систем хуучин, бүхлээр унадаг байсан хувилбарын хүрээнд яригдах учиртай.

 

Тодруулбал, нэг минут нь 100 төгрөг учраас хэрэглэгч үүндээ тааруулж яриагаа цэнэдэг байсан. Харин таны ярьсан шинэчлэлд хэрэглэгч нэг минутад хамгийн дээд тал нь 1.66 төгрөг төлөх учиртай байсан юм. Үүнийг минутаар үржүүлбэл дүндээ дүн гарна.

 

Тиймээс таны шийдвэр иргэдээ биш эрх мэдэлтэй компаниудын талд ашигтайгаар эргэлээ. Нөгөөтэйгүүр, ХХЗХ хэлэлцээрийн ширээний ард сууж иргэдэд ашигтай “дүн” гаргах байсан ч “найрын ширээний” ард наймаалцсан бололтой.  Тиймээс О.Магнай даргын математик ухаан мант хэдийгээ ийнхүү шулж байна.


Үүрэн телефоны компаниудын дундаж үнийг бодоход иймэрхүү зөгнөл харагдах нь. Харин бид дараа дараагийн дугаартаа тус компаниудын тухай илүү дэлгэрэнгүй буюу одоо мөрдөгдөж байгаа багцууд хэрхэн өөрчлөгдөхийг албаны хүнээс тодруулж хүргэх болно. Түүнчлэн дараа төлбөрт хэрэглэгчид барьцаа төлбөрөө хэрхэн гаргуулж авах, компаниудын тус тусын онцлогт шингэсэн үйлчилгээ, багцууд хэрхэн өөрчлөгдөхийг дэлгэрэнгүй хүргэх болно.


Б.Ширнэн

Эх  сурвалж: