sonin.mn
Сэтгэгдэл (0)
"ТҮЦ-ээр амь зуугчдын холбоо"-ноос Цагаан сарын шинийн нэгний өдөр Сүхбаатарын талбай дээр эсэргүүцлийн жагсаал зохион байгуулах талаараа мэдээлэл хийлээ. Энэ үеэр тус холбооны УЗ-ийн гишүүн З.Пунсалдулам: " Төр иргэдийнхээ нийгэм, эдийн засгийн баталгааг хангах үүргээ биелүүлж чадахгүй бол өөрсдөө ажлын байр бий болгоод, ТҮЦ-ээр амьдарч байгаа иргэдийн эрх ашгийг битгий зөрчөөчээ гэдгийг хэлье. Нийслэлээс захирамж гаргаад Энхтайваны өргөн чөлөөг чөлөөлнө гэсэн.
 
 
Яг яагаад чөлөөлөх гээд байгаа юм бэ гээд судалгаа хийгээд үзэхээр аман яриагаар бол 2 давхар шилэн, нэгдүгээр давхартаа автобус хүлээх хүлээлгийн танхимтай, ариун цэврийн өрөөтэй, хоёрдугаар давхартаа үйлчилгээний лангуутай зүйл нээх гээд байгаа гэж яригдаад байгаа юм. Тэгэхээр бүр огт ТҮЦ-гүй болохгүй байгаа биз дээ? Бид нарын ТҮЦ-ийг авч хаяад хэн нэгэн эрх мэдэлтэн 2024 оны сонгуулиар ажлаа өгөөд зайлхаасаа өмнө нэг ах дүүгээ ч юм уу, өөрөө энэ автобусны буудал дээр эзэн суух гээд байна.
 
 
Бид нар хардах эрхтэй. Тэр шилэн ТҮЦ-ийг тавихын тулд хоёр гурван иргэний, 20, 30 хүний хоолыг булааж идэх гээд байна. Үүнийгээ зогсоо гэдгийг шаардаж байна. Хэрэв үүнийгээ таслан зогсоож, бидэнд 3 хоногийн дотор дорвитой хариу өгөхгүй бол энэ сарын 21-ний өдөр Сүхбаатарын талбай дээр тавгийн идээ засна. Төр ичихгүй бол бид ичихгүй. Бид амьдралынхаа төлөө ичихгүй. Юунаас ичих юм? Иргэдийнхээ ажлын байрыг битгий булаагаачээ гэж жагссаныхаа төлөө 300 цагдаад ачигдаад явж байсан. Түүх байгаа. Гуравхан эмэгтэйг 300 цагдаа ачиж байсан. Одоо бас бид нарыг талбай дээр идээ засаад суухаар цагдаа нар нь ирээд боорлох байх л даа. Хамаагүй ээ. Бид нар гэртээ хариад хоолгүй сууж байснаас талбай дээр байсан нь дээр гэж бүгд санал нэг баталсан.
 
 
Төрийн өндөрлөг, төрийн албан хаагчид нэртэй хулгайчид бүгд сонсож бай. Ард иргэдийнхээ амьдралын баталгааг булааж байгаа хулгайчид минь бид нар Сүхбаатарын талбай дээр өлсөж үхсэн ч чадна. Ямартай ч монголын түүхэнд байгаагүй цагаан сарыг талбай дээр хийнэ. Энэ бол шантааж биш. Энэ бол зовлонтой амьдралтай, улны 75 хувийн нэг хэсэг нь амьдралынх нь баталгааг булаах гэж байгаа төрийн хулгайчидтай ярьж байгаа хатуу үг шүү. Бид хэзээ ч хэнээс ч айхгүй, хэнээс ч ичихгүй. Ядуу гэдэг нэрнээсээ ч ичихгүй.
 
 
Төрд байгаа хулгайчид гадаад дотоодод байгаа мөнгөө яаж оффшор руу зөөх вэ? гэдэг айдастай амьдардаг бол бид нар үр хүүхдээ яаж цатгалан хонуулах вэ? Яаж үмх мах авах вэ? Өмнө нь яаж гуляш хийх вэ? гэж боддог байсан бол одоо яаж нэг бантантай хонуулах вэ? гэж боддог болсон.
 
 
Ийм эдийн засгийн хямралтай үед төр бидний амьдралыг битгий булаагаачээ гэж хэлмээр байна. Төр хэрэв бидний амьдралыг булаана гэсэн шийдвэр дээрээ хатуу зогсох юм бол бид ч тэмцэх шийдвэрээсээ ухрахгүй. Улс орныхоо уламжлалт сайхан баяраар иргэдийнхээ ТҮЦ-ийг ачна гээд захирамж гаргаад сууж байгаа дүүргийн, төрийн албан хаагчид ичээч. Хэрэв цагаан сараас хойш энэ захирамжаа өгсөн бол бас өөр шүү дээ. Сэтгэл тэнэгэр баяраа тэмдэглээд золгочихно. Гэтэл яг баяр тааруулаад ачина гэсэн шаардах хуудсууд өгөөд байна. Ямар ичдэггүй юм бэ? ТҮЦ-ээ чөлөөлөхгүй бол ачиж аваачаад хаялаа шүү гээд. Ийм байхад бид яаж амьдрах юм бэ? Яаж баяр тэмдэглэх юм бэ? Цааш нь хэлэх гэхээр үнэхээр сэтгэлд хэцүү байна. " гэсэн юм. 
 
 
М.Чой