sonin.mn
Сэтгэгдэл (21)

МАН-ын генсек Я.Содбаатар өчигдөр их сонин юм ярилаа. Мань эр урвагч сайд нарыг сайдаар нь үлдээх шийдвэр гаргаснаа зарлав. Г.Занданшатар ч засгийнхаа бүрэлдэхүүнийг УИХ-д танилцуулчихлаа. Өмнөх засгийн 60 хувь нь МАН-ын гишүүд байсан. Энэ удаа ч тэд танхимд эзлэх хувиа өөрчилсөнгүй. Сайд нараа ч өөрчилж гавьсангүй. Өнөө л урвагч сайд нарын нэрс ирийж байна. Ерөнхийлөгч, Ерөнхий сайд хоёрыг эвдрэлцүүлж, засаг самарсан гэгдэж буй “төрийн ховч муужгай” сайд ч суудалдаа үлдлээ.


Танхимынхаа эсрэг кноп дарсан урвагчдад найр тавьсан энэ увайгүйтлийг иргэд цочирдон хүлээн авч байна. Л.Оюун-Эрдэнийн Засгийн газрыг “Болохгүй байна” гэж унагасан мөртлөө гол сайд нарыг нь буцаагаад томилчихоор эрүүл ухаантай ямар ч хүн цочирдон хүлээж авах нь ойлгомжтой.


Мэдээж МАН-д эрүүл сэтгэлгээтэй гишүүд олон бий. УИХ-ын гишүүн Б.Бат-Эрдэнэ “Кабинет унавал Засгийн газар бүрэлдэхүүнээрээ огцорно. Ямар ч сайд дараагийн кабинетэд орох ёсгүй” гэж дуугарсан бол Ж.Бат-Эрдэнэ гишүүн “Засгийн газар кабинетаараа хариуцлага хүлээх нь зөв” гээтэхсэн. Г.Занданшатарын засагт хамтрах намынхан сайдын зөөлөн суудлаа бодож амаа хамхиж суугаа биз. АН энэ увайгүйтэлд яаж хандах нь тодорхой биш байна. Иргэдийн хувьд “Унасан засгийн сайдууд шинэ засагт орж болохгүй” гэсэн хатуу байр суурь илэрхийлсээр байгаа. Харамсалтай нь МАН олон нийтийн энэ дургүйцэл, бухимдлыг үл тоож “Урвагчдын Засгийн газар” байгуулах шийдвэр гаргалаа. Г.Занданшатарынхаар бол Л.Оюун-Эрдэнэ ганцаараа муу ажиллаж бусад сайд нь сайн ажилласан бололтой юм.


Ер нь улстөрийн нам үнэт зүйл, тодорхой бодлоготой байхын хэрээр хүчирхэгждэг. Харамсалтай нь МАН-д үнэт зүйл алга. Танхимаасаа урвасан хүмүүсийг дэмжиж сайд болгож буйгаас нь харахад энэ нам дотооддоо үнэт зүйлийн өлсгөлөнд нэрвэгдчихэж.


Бүр тодруулж хэлбэл МАН ёс суртахууны үгүйрэлд орчихож. Өөрсдийг нь сонгосон иргэдийн бодол, байр суурийг үл тоож урвагчдад өндөр суудал өгч буйн цаана хоёр л шалтгаан бий. Нэг бол МАН хүний нөөцгүй туйлдчихсан байх. Эсвэл урвагчдыг зориудаар дэмжиж дээшлүүлдэг мафи, бүлэглэл төдий болчихсон байх.


Хоёр дахь нь үнэн болж таарч байна даа, ер нь. Тийм ч учраас Монголын хамгийн том энэ нам өмнөх засгаасаа урвасан сайд нарыг сайдаар эргүүлэн тавих байж боломгүй соёл, жишгийг улстөрд оруулаад ирлээ.


МАН-ын томчууд ард түмнийг цагаан цаас, сонгуулийн үеэр тархийг нь угаачихад дараагийн сонгуульд намынхаа системээр ялж орхино гэж боддог байх. Гэхдээ ард түмэн тэнэг биш. Жил ирэх бүр хэрсүүжсээр байгаа. Урвасан сайд нарыг, төрийн хутгуурыг төрийн өндөр суудалд эргүүлэн залсан энэ үйл явдлыг тэд мартахгүй. Товчхондоо МАН урвагчдын засгийг байгуулснаараа өөрсдөд нь итгэж саналаа өгсөн сонгогчдынхоо өмнө маш том оноо алдаж, унах нүхээ өөрсдөө малтчихлаа.



Б.ДУЛАМ