Уламжлалын үзлийг дээдэлсэн Бүгд Найрамдах нам, чөлөөт хөдөлмөр эрхэлсэн хүмүүсийн эрх ашгийг онцгойлон хамгаалдаг улс төрийн байгууллага болох Монголын Чөлөөт хөдөлмөрийн нам, 1991 оны 1 дүгээр сард хуралдсан МоАН-ын ээлжит бус 2 дугаар их хурлын үеэр Г.Бошигт тэргүүтэй хэсэг нөхдийн байгуулсан МоАН-ын Иргэний ардчилсан жигүүрийн удирдагчид 1992 оны 2 дугаар сарын 18-ны өдөр уулзалдан нэг нам байгуулахаар тогтож, намын нэрийн эхний хувилбарыг Шинэ Үндсэн хуулийн нам байхаар ярилцан нэг нам болохоо дурдсан мэдэгдэл гаргажээ.1992 оны 3 дугаар сарын 23-нд Нэгдсэн нам зохион байгуулах анхдугаар хурал болж намын Тэргүүнээр Санжаасүрэнгийн Зоригийг сонгон, намын удирдах дээд байгууллага Хурилдайг 103 хүний бүрэлдэхүүнтэй байгуулахаар тогтов.
 
 
Соёл, нийгмийн хөгжлийн түүх, хувь хүн болон чөлөөт байдлын тухай ойлголт, нийгэм улс төрийн тогтолцоо, түүний уламжлал, нийгэм, эдийн засгийн бодлого зэрэг асуудлыг багтаасан Нэгдсэн намын уламжлалын үзэл баримтлалын үндсүүдийг гол чиг шугамаа болгов.
 
Батлагдсан шинэ Үндсэн хуулийн дагуу 1992 онд УИХ-ын сонгууль явагдах байсан тул уг сонгуульд хамтарч Эвсэл байгуулан оролцохоор Монголын Нэгдсэн нам (МНН), Монголын Ардчилсан нам (МоАН), Монголын Үндэсний Дэвшлийн нам (МҮДН)-ууд 1992 оны 4 дүгээр сарын 23-ны өдөр гэрээ байгуулж, МоАН-ын дарга М.Энхсайхан, НН-ын дарга С.Зориг, МҮДН-ын дарга Д.Ганболд нар гарын үсэг зурав.
 
Хөрөнгө, санхүү, зохион байгуулалтын хувьд хүч тэнцвэргүй нөхцөлд явагдсан уг сонгуульд дээрх гурван намын Эвсэл МСДН-тай албан бус эвсэл байгуулж оролцон С.Зориг, М.Энхсайхан, Д.Ганболд, Ц.Элбэгдорж, Р.Гончигдорж нар УИХ-д сонгогдов. Хожмоо МАХН-аас УИХ-д сонгогдсон Н.Жанцанноров өөрийн хүсэлтээр чөлөөлөгдөхөд Дарханаас түүний удаах санал авсан Төмөр-Очирын Эрдэнэбилэг (Нэгдсэн нам), 1993 онд Ц.Элбэгдорж мөн өөрийн хүсэлтээр чөлөөлөгдөхөд Хөвсгөлөөс Р.Одонбаатар (МоАН) УИХ-ын гишүүн болжээ.
Ийнхүү Нэгдсэн нам УИХ-д хоёр төлөөлөлтэй боллоо.
Ардчилсан чиглэлийн намууд сонгуулийн үр дүнгээр зайлшгүй нэгдэх цаг ирсэн байна гэж үзээд МоАН, НН, МҮДН, МСМН (Монголын Сэргэн Мандлын нам) 1992 оны 10 дугаар сарын 25-ны өдөр намууд нэгдэх анхдугаар их хурал зохион байгуулж намаа Монголын Үндэсний Ардчилсан нам (МҮАН) хэмээн нэрлэв.
МҮАН зорилгоо багтаасан Эрмэлзэх 9 зүйл хэмээх баримт бичиг баталж, намын төлөөллийн төв байгууллагаа Чуулган гэж нэрийджээ.
Намын чуулганд Улаанбаатар хотын бүсээс экс нам тус бүр 13 хүн оруулахаар тохирон Нэгдсэн намаас С.Зориг, З.Нармандах, Т.Эрдэнэбилэг, Ц.Ганхуяг, Х.Хулан, Л.Эрдэнэтуул, Н.Туяа, Д.Батжаргал (Монголын залуучууд сонины сэтгүүлч), Ж.Ганболд, Д.Энхбаатар (Улсын Бага хурлын гишүүн асан), Ч.Дөл, Г.Чулуунбат, Г.Бошигт нар сонгогдон намын гүйцэтгэх байгууллага-Ерөнхий зөвлөлд НН-аас С.Зориг, З.Нармандах, Н.Туяа, Х.Хулан, Д.Энхбаатар нар багтав.
 
Ийнхүү С.Зориг даргатай Монголын Нэгдсэн нам МҮАН хэмээх айлын гал голомт бадраахад өөрийн хувь нэмрээ оруулснаар дараа дараагийн сонгуулиудад ардчилсан хүчин амжилт гаргах урьдчилсан нөхцөл бүрэлдсэн билээ.
 
1993 оны 6 дугаар сарын 6-нд явагдсан Ерөнхийлөгчийн сонгуульд МҮАН, МСДН-ын Эвслээс нэр дэвшигч П.Очирбат 57,8 хувийн саналаар ялж Монгол Улсын Ерөнхийлөгчөөр сонгогдон, 1996 оны УИХ-ын ээлжит сонгуульд “МҮАН, МСДН-ын Ардчилсан холбоо” Эвсэл 50 суудал авч түүхэндээ анх удаа дангаараа Засгийн газар байгуулах боломжтой болсон юм.
1996 онд бүрэлдсэн УИХ-д экс Нэгдсэн намаас С.Зориг, Д.Энхбаатар, Х.Хулан, Ц.Ганхуяг, Т.Эрдэнэбилэг нар сонгогдож, Н.Туяа Гадаад хэргийн сайд, С.Зориг Дэд бүтцийн хөгжлийн сайдаар, Х.Хулан УИХ-ын Нийгмийн бодлогын байнгын хорооны дарга, С.Зориг, Ц.Ганхуяг нар УИХ-ын Аюулгүй байдал, гадаад бодлогын байнгын хорооны даргаар 1996-1998, 1998-2000 онуудад тус тус сонгогдон ажилласан билээ.
 
1998 оны 10 дугаар сарын 02-ны өдөр С.Зориг бусдад хорлогдов. 
 
1998 оны 12 дугаар сард явагдсан УИХ-ын нөхөн сонгуульд С.Зоригийн төрсөн дүү доктор С.Оюун ялж УИХ-ын гишүүнээр сонгогдов. 
 
Үргэлжлэл бий
 
УИХ-ын гишүүн асан, Иргэний Зориг-Ногоон Намын Дарга Ц.Ганхуяг