sonin.mn
Сэтгэгдэл (0)

Улаанбаатар хотын Захирагчийн ажлын алба АНУ-ын Азийн сантай хамтран нийслэлийн  орон сууцны болон гэр хорооллын 152 хороонд амьдрах орчны газрын зураглалыг гаргаж байгаа.

Энэ зураглалыг хийхэд Захирагчийн гэр хороолол дахь ажлын албад, хороодын хэсгийн ахлагч нар, иргэдтэйгээ хамтран хорооныхоо  үндсэн мэдээллийг газрын зураглалд тэмдэглэн, дүүргүүдийн мэдээлэл технологи хариуцсан мэргэжилтнүүд мэдээллийн санд оруулж байна.

Эдгээр зураглалд үндэслэн Нийслэлийн Хөрөнгө оруулалтын газар, Нийслэлийн эдийн засгийн хөгжлийн газар нийслэлийн хэмжээнд хийгдэх гол ажлуудын төлөвлөлтөнд тухайн хороонд дутагдаж байгаа болон шинэчлэн өөрчлөх шаардлагатай саналуудыг тусгах юм.

Нийслэлийн зарим хороод иргэдийн оролцоотой хийсэн газрын зураглалаа хорооныхоо байранд байршуулан иргэдэд мэдээллийг нээлттэй өгч эхэлсэн.

БЗД-ийн 27-р хорооны иргэд өөрийн амьдарч буй хороогоо хичнээн хүн ам, хэдэн өрхтэй, дэлгүүр, сургууль, цэцэрлэгийн тоо хэр хүртээмжтэй байгааг зураглалаасаа харан ярилцаж  саналаа хэлж эхэлсэн.

Өмнө нь иргэд хороодын мэдээллийг зөвхөн зохих зөвшөөрлийн дагуу л холбогдох мэргэжилтнээс авдаг байснаас хэд дахин илүү боломжийг бүрдүүлж өгч байгаагаараа онцлог.

Өөрийн амьдарч буй орчноос гадна  бусад хороодын мэдээллийг ч иргэд цахим хэлбэрээр харна гэвэл “Manaikhoroo.mn” сайтаас мэдээллээ  авах боломжтой юм гэж Улаанбаатар хотын Захирагчийн ажлын албанаас мэдээллээ.