сонин mn
Сэтгэгдэл (14)
Аз жаргалыг их холоос эрэх хэрэггүй юм байна. Тэр дундаа лоозогнох, тунхаглах бүр ч хэрэг алга даа. Нийслэлийн удирдлагууд хөөрхий сайн санаа гаргаж, энэ зүгийн ажлыг их хөөцөлдсөнийг үгүйсгэх аргагүй. Нэг л бүтэхгүй байгаа. 
Гэтэл ойрын өдрүүдэд жинхэнэ аз жаргалыг Сүхийн талбайд бид харлаа. Яасан аз жаргал вэ гар дэлгэн, ногоон зүлгэн дээр тэрийн хэвтэх гэдэг. 
Нүүдэлчин монголчуудад эсвэл хөгжил тааруу оронд л аз жаргалын энэ эрэл байдаг юм биш билээ шүү. 
 
90-ээд оны эхээр эртний их түүхт Кайр хотын Нил мөрөн ч билүү нэртэй том зочид буудлын орчмын өчүүхэн бага ногоон зурвас зүлгэн дээр эр, эм хоёр жоохон хүүхэдтэйгээ налайн суухыг хараад миний бие “иш хөөрхий дөө, газар нутаг багатай орны зовлон юм даа” хэмээн дооглонгуй бодож байж билээ. Одоо харин нийслэлээ хараад тэр бодлоосоо ичих шиг санагдаж байна. 
 
За тэгээд румыны ард иргэд мийч гэх хонины татсан махаар хийсэн хоолоо гадаа зүлгэн дээр шараад хээв нэг аз жаргалтай амарч хэвтэж байдагсан. Миний амьдралын бүхэл бүтэн үе гэхээр 12 жил тэнд өнгөрсөн болохоор сайн мэднэ ээ. 
Шинэ Дели хотын Лоди цэцэрлэгт хүрээлэн, Далай багшийн их морилдог Будда төвд энэтхэг, түвд олон үндэстэн ястан ногоон зүлгэн дээр аз жаргалтай нь аргагүй морилж, хүүхэд шуухад тоглон гүйлддэг. 
Газрын ёроолын диваажин Шинэ Зеланд, умард Америкийн Канад гээд ер нь хаана ч очсон та ногоон зүлгэн дээр аз жаргалтай амрах түмэн олныг харж болно. 
Канадууд Үндэсний баярын өдрөө Парламентийнхаа өмнөх цэл ногоон зүлгэн дээр суугаад юм үзэнгээ “Өө Канада” гэх сүлд дуугаа сүр жавхлантай дуулдагсан. 
Тэгэхээр хүн гэдэг амьтан төрмөл, байгалаас заяасан түүнд татагдан “аз жаргалтай” орших нигүүртэй юм шиг байна. Чухам энэ л Монгол Улсын нийслэл Улаанбаатар хотод дутагдаад буйг энэ өдрүүдэд бид яруу тод харж байна. 
 
Хөл бөмбөгийн цэнгэлдэх байхад очиж очиж Сүхбаатарын талбайд...зохиох хэмээн бодож байсан юмсан.
 
Санамсаргүй Сүхийн талбайн хиймэл зүлэг ийм үнэд хүрч, нийслэлчүүдэд юу чухам дутаж байгааг жагсаал цуглаан, үймээн самуунгүй чухамхүү “загтнасан газар маажсан” шиг хэлээд өглөө дөө Сумъяа захирагч аа, Улаанбаатарын дарга нар аа! 
 
 
Хүүхдийн паркын хашааг авч байна. Бусад олон олон хашаа хориог буулга! Их сайн. Саарал ордны цэцэрлэгийг нээ Төрийн тусгай хамгаалалтынхаан. Одоо зүлэг ногоон байгууламж олноор хий. 
Гуч гаруй жилийн өмнө улсын наадам үзэхээр очсон иргэд цэнгэлдэх тойрсон зүлэг ногоон дээр налайж байдагсан. Сумъяа захирагч тэр үед ид байсан аварга болохоор санах л ёстой. 
 
 
Т.Залаа-Уул