Монголын Паралимпийн холбоо нэг үеэ бодоход бусад спортын холбоотой эн зэрэгцэж, төр засгийн анхааралд өртөх болсон. Тэр хэрээр хөгжлийн бэрхшээлтэй тамирчид гадаад, дотоодын олон уралдаан тэмцээнд оролцож, амжилт гаргаж байгаа билээ.
Хамгийн ойрын жишээ л гэхэд энэ сарын 18-нд Инчеон хотноо эхэлсэн паралимпийн Азийн II наадамд манай улсын баг, тамирчид гурван өдрийн дараах байдлаар жүдо бөх, буудлага, хөнгөн атлетик зэрэг төрлүүдээс нэг алт, нэг мөнгө, зургаан хүрэл нийт найман медаль хүртээд байна.
Өмнөх амжилтаа эвдэж, спортын төрөл бүрт “Рио-2016” паралимпийн эрх авах зорилго өвөртөлсөн тамирчид маань эхнээсээ амжилт үзүүлж, медалийн болзол хангаж эхэлсэн нь бэлтгэл хэр сайн хангагдсаныг илтгэнэ.
Өчигдөр л гэхэд жүдо бөхийн эмэгтэйчүүдийн -78 кг жинд барилдсан Н.Алтанцэцэг түрүүлж, Монголын баг ахны алтан медалиа хүртлээ. Тэрбээр Энэтхэгийн бөхийг ялж, шигшээ барилдаанд Тайландын Нантаракыг буулгаж авснаар ийнхүү алтан медалийн болзол хангасан юм.
Мөн энэ өдөр эрэгтэйчүүдийн 90 кг жинд Л.Эрдэнэбилэг, эмэгтэйчүүдийн 70 кг-д Б.Хашцэцэг нар тус бүр хүрэл медаль хүртэж, багийнхаа медалийн тоог нэмлээ. Өмнөх өдрүүдэд нь эрэгтэйчүүдийн 60 кг-д Б.Ууганхүү мөнгө, 66 кг жинд А.Мөнхбат хүрэл, эмэгтэйчүүдийн 48 кг-д Б.Болортунгалаг мөн хүрэл медаль хүртсэн.
Түүнчлэн буудлагын эрэгтэйчүүдийн 50 метрийн сонгомол гар бууны дасгалд спортын мастер З.Ганбаатар, бөөрөнцөг түлхэлтийн эмэгтэйчүүдийн F57 ангилалд Г.Цогтгэрэл нар хүрэл медал хүртээд байна.
Дашрамд дуулгахад, эл удаагийн наадмыг 61 тамирчин, 15 дасгалжуулагч, дөрвөн албаны хүн, хоёр эмч, хоёр шүүгч зорьсон. Тэдэнд төр, засгаас 140 сая төгрөгийн дэмжлэг үзүүлсэн бөгөөд ирэх онд хөгжлийн бэрхшээлтэй иргэдэд зориулсан спортын ордон барьж, ашиглалтад оруулахаа амалсан билээ.
Харин энэхүү наадмаас хамгийн олон медалийг хүртээд байгаа жүдо бөхийн шигшээ багийг Ч.Базарсүрэн, Б.Нарантуяа нар дасгалжуулж байгаа. Хүрэл медаль хүртсэн буудагч З.Ганбаатар “Рио-2016” паралимпид оролцох эрхийг Монголын тамирчдаас хамгийн түрүүнд авчээ.
Паралимпийн Азийн II наадам өнөөдөр өндөрлөнө.
Эх сурвалж:
Сэтгэгдэл0
Mash sain baina. Bayar Hurg'e!