sonin.mn
МОСКВА./TASS/. Оросын газрын тосны “Роснефть” компани ирэх 20 жилийн хугацаанд “Роснефть-2022” стратегийг хэрэгжүүлснээр төлөвлөгөөнөөс гадуур нэмж 500 сая тонн газрын тос олборлоно гэж Известия сонинд нийтлэгдсэн тус компанийн захирал Игорь Сечиний бичсэн өгүүлэлд дурджээ.
 
“Манай стратегийн давуу тал бол дэд бүтэц сайн хөгжсөн бүс нутаг дахь хуурай газарт газрын тосны асар их нөөцтэй байгаа явдал юм. Бидний стратегийн зорилго бол далайн эргийн дагуух газрын тосны асар их нөөцийг олборлох явдал. Бидний хийсэн дүн шинжилгээгээр, одоогоор илрээд байгаа нөөц нь ирэх 20 жилд төлөвлөгөөнөөс гадуур 500 сая тонн газрын тос нэмж олборлох боломжийг олгож байгаа юм. Гэхдээ үүнийг олборлолтын үр ашгийг дээшлүүлсэн нөхцөлд хийх боломжтой” гэж “Роснефть”-ийн захирал онцлон тэмдэглэсэн байна. 
 
Энэхүү зорилтыг биелүүлэхийн тулд өрөмдлөгийн хурдыг дээшлүүлэх, олон үе шатат давхрагын гидротасралтыг хэрэглэх, цооногийн хэвтээ өрөмдлөгийн эзлэх хувийг хамгийн багадаа 40 хувь хүртэл нэмэгдүүлэх хэрэгтэй байгаа юм. “Технологийг хөгжүүлэх замаар бид геологи хайгуул үр дүнтэй байх магадлалыг 98 хувь байлгахаар төлөвлөж байна. “Ухаалаг усалгаа” технологийг хөгжүүлэх, газрын тос, хийн гарцыг нэмэгдүүлэх зорилгоор давхарга доторх даралтын гүнзгийрүүлсэн туршилтын судалгааг хийж байгаа, цаашид ч хийнэ” хэмээн И.Сечин бичжээ.
 
Мөн тус компани “хүнд” газрын тосыг олборлох шинэ үеийн технологийг нэвтрүүлэн цооногийн бүтээмжийг дээшлүүлэх “усгүй” технологи, “давхарга дотор нь газрын тосыг боловсруулах” технологи, сайжруулсан апгрейдингийн технологийг нэвтрүүлэх арга замыг хайж байгаа аж.
 
“Роснефть”-ийн боловсруулж буй стратеги нь олборлолтыг хамгийн бага зардлаар явуулах, бүтээгдэхүүнээ зах зээлд хамгийн их үр ашигтайгаар борлуулах боломжийг олгох юм.
 
Үүний тулд тус компани “бизнесийн хувьд үр ашиг багатай цооногуудын тоог тогтоохын тулд” өөрийн цооногийн мэдээллийн сандаа дүн шинжилгээ хийх гэж байгаа аж. “Бид ийм цооногуудыг түрээслүүлэх, жижиг болон дунд бизнесийн үйлдвэрийн газруудад ашиглуулахаар шилжүүлэн өгөхөд бэлэн байна. Эдгээр байгууллагууд нь тухайн цооногуудын үр ашгийг дээшлүүлэх арга замыг хайх боломжтой” гэж И.Сечин нийтлэлдээ дурдсан байна.
 
 
О.Барс 
Эх сурвалж: Монцамэ агентлаг