sonin.mn
НЬЮ-ЙОРК. /TASS/. НАСА-гийн эрдэмтэд Бархасбадь гарагийн дагуулуудын нэг болох Европа-гийн мөсөн давхаргын дор далай байдаг гэдгийг нотлох баримтуудыг олон нийтэд дэлгэлээ.
 
Энэ тухай АНУ-ын Балтимор хот дахь /Мэрилэнд муж улс/ дуран авайгаар сансрыг судлах хүрээлэнгийн төлөөлөгч Уильям Спаркс ярьсан байна.
Түүний ярьснаар, одон орончид Hubble дуран авайн тусламжтайгаар Нарны аймгийн хамгийн том гараг болох Бархасбадийн дагуулын мөсөн гадаргуу дээр оргилмол булгууд байгааг олж илрүүлжээ.
 
Европа-гийн мөсөн гадаргуугаас шингэн зүйл оргилон гарч ирж буйг нотлох зүйлүүдийг бид шинээр олж чадлаа гэж Спаркс ярьсан байна.   
Түүний хэлснээр, далай байгаа гэдгийг нотлох баримтуудыг 2014 онд дуран авайгаар ажиглалт хийх явцад олж авсан боловч мэдээллийг сайтар нягтлахад нэлээд цаг хугацаа шаардагджээ. Европа дээр усны судлууд буюу оргилмол булгууд байгаа нь мөсөн давхаргыг өрөмдөхгүйгээр далайн химийн бүтцийг судлах боломж олгож байгаа аж.  
 
Урьд өмнө нь эрдэмтэд таамаглахдаа, Европа дагуул дээр 100 км-ийн гүнд давсархаг далай тэнгис байдаг бөгөөд энэ далай нь мөсийг цоолон үе үе гадаргуу дээр гарч ирэн усан оргилуур маягийн зүйл үүсгэж, огтлогдон зүсэгдсэн мэт харагдах агаар мандлын давхаргад усны дуслуудын судлуудыг үлдээдэг гэж үзэж байсан юм. Ийм усан судлуудыг Hubble дуран авайгаар 2012 онд Европа-гийн өмнөд туйл орчимд илрүүлсэн аж. Гэсэн хэдий ч уг дагуул дээр оргилмол булгууд байдаг гэдгийг яг таг тогтооход шаардлагатай хангалттай хэмжээний мэдээлэл эрдэмтдэд байгаагүй юм.
 
Шинэ зуун гарснаас хойш Бархасбадь гарагийг судлахаар Cassini /2000 он/, Galileo /1995-2003 он/, New Horizons /2007 он/ зэрэг сансрын аппаратуудыг тус тус илгээж байжээ.
 
Харин 2020-оод онуудад Бархасбадь болон түүний дагуулууд руу JUICE (Jupiter Icy Moon Explorer) болон Europa Clipper гэсэн хоёр аппаратыг илгээхээр төлөвлөж байна.
 
Х.Сарнай
Эх  сурвалж: “Монцамэ” агентлаг