Швед улсын засаг захиргаа Палестинийг улс гэж албан ёсоор хүлээн зөвшөөрсөн байна. Тус вант улсын Гадаад хэргийн яамнаас энэ талаар мэдэгдэл гаргасан аж.
Ийнхүү Швед нь Европын Холбооны гишүүн орнуудаас Палестин улсыг хүлээн зөвшөөрсөн анхны улс боллоо. Гадаад хэргийн сайд Маргот Вальстром “Шведийн Засгийн газраас Палестин улсыг хүлээн зөвшөөрөх шийдвэр гаргалаа. Энэ шийдвэр нь палестинчуудын эрхийг батлахад чухал алхам болж байна” хэмээжээ.
Шведийн шинэ Ерөнхий сайд Стефан Левен энэ сарын эхээр Стокгольм нь Палестин улсыг хүлээн зөвшөөрөх талаар хэлж байсан. Гэвч Израиль улс уг шийдвэрийг шүүмжилсэн бөгөөд Гадаад хэргийн сайд Авигдор Либерман “бодож тунгаагаагүй, яарсан шийдвэр” гэж мэдэгдсэн.
Дашрамд дурьдахад 1988 оны арваннэгдүгээр сарын 15-нд Алжирт болсон Палестиний үндэсний зөвлөлийн ээлжит бус хуралдаанаар Палестин улсыг тунхагласан ч 2012 онд НҮБ-ын Ерөнхий ассамблей Палестинийг улс гэж хүлээн зөвшөөрсөн юм. Энэ хугацаанд дэлхийн 134 улс Палестин улсыг хүлээн зөвшөөрсөн хэдий ч Европын нэг ч орон байгаагүй ажээ.
/Лента.ру/
Эх сурвалж:
Сэтгэгдэл0
Европын орнууд яагаад ийм хоцрогдсон байдаг юм бол оо.