Ерөнхий сайд Н.Алтанхуяг өнгөрсөн долоо хоногт хэлсэн үгэндээ “Шинэчлэлийн Засгийн газар цаашид илүү хурдтай, эрчтэй, нягт нямбай, өндөр хариуцлагатай шинэ эрч хүчтэй ажиллахын тулд танхимын сэлгээ хийх асуудлыг миний бие удахгүй эхлэх УИХ-ын намрын ээлжит чуулганы эхээр санаачлан оруулж, шийдвэрлэнэ гэдгээ зарлаж байна.
Засгийн газрын сэлгээнд зарим сайдын суудлаас гадна бүтцийн асуудлыг хамтад нь оруулж, шийдвэрлэх болно” гэсэн нь нам гүм байсан улстөрийн уур амьсгалыг цочоож орхисон.
Түүний энэхүү шийдвэр Монгол Улсын Ерөнхийлөгч болон олон нийтэд их л таалагдаж байгаа бололтой.
Ерөнхийлөгч Ц.Элбэгдорж “Сэлгээ хийх, тодорхой хүмүүстэйгээ хариуцлага тооцох, бүтэц бүрэлдэхүүнээ оновчтой болгох асуудлыг Ерөнхий сайд гартаа авах ёстой.
Энэ тухай би өмнө нь түүнд зөвлөж байсан. Хэн нэг сайдыг огцруулна, тэгнэ, ингэнэ гэж бусад нь ярьж явдаггүй. Ердөө л Ерөнхий сайд санаачилгыг гартаа авчих. Тэр нь зөв. Засгийн газрын бүрэлдэхүүнд халаа сэлгээ хийж, зардал хэмнэх, давхар дээлийг тайлах асуудал бий. Үүнийг Ерөнхий сайд цэгцэлнэ гэдгээ зарлалаа. Энэ бол сайн хэрэг” хэмээн тайлбарлажээ.
Н.Алтанхуяг сайд бүтцийн асуудлыг сөхөхтэй зэрэгцэн олон нийт сэлгэх сайдуудын нэр хийгээд татан буугдах магадлалтай яамдыг тодорхойлж эхэлсэн.
Ерөнхий сайдын хэлснээр бол Засгийн газрын бүтцийн асуудлыг хэлэлцэхэд хамгийн багадаа хагас сарын хугацаа байна. Тэгвэл сайд нь огцрох, солигдох, яам нь татан буугдах сургаар дотоод ажилчид нь хэрхэх бол гэдэг асуудал үүсч байна. Даргын халаасаар дамжиж яаманд ажилд орсон төрийн албан хаагч цөөнгүй бий. Тиймээс л “үлдэх хүнээр ачаа бүү татуул” гэдэг үг санаанд буугаад ер болохгүй нь.
Өөрөөр хэлбэл замд явахад ачааны бэхэлгээ ямар байх нь үлдсэн хүнд огтхон ч хамаагүй гэсэн үг. Түүнтэй адил Засгийн газрын бүтцээс хасагдах тухай яригдаж буй яамдад шинэ ажил даалгавал “Мянгуужингийн үлгэр” гэдэг л болох биз.
Өчигдөрхөн л гэхэд Нийслэлийн мэргэжлийн хяналтын газраас түүх, соёлын үл хөдлөх дурсгалын хадгалалт хамгаалалтын байдалд хийсэн хяналт шалгалтын талаар мэдээлэл өгөхдөө Соёл спорт, аялал жуулчлалын яамны зүгээс түүх соёлын дурсгалуудынхаа хадгалалт, хамгаалалтын байдлыг сайжруулах, бүгдийг нь бүртгэлжүүлж байнга хараа хяналт тавих, устаж үгүй болохоос сэргийлэх хэрэгтэй байгааг анхааруулсан.
Өнгөрсөн хоёр жилийн хугацаанд АНУ-аас авч ирсэн Батаар болон түүний ахан, дүүс, Есөн эрдэнийн Ганжуур, Данжуур, монгол үндэсний хувцас тэргүүтнийг ЮНЕСКО-д данслуулсан гэхээс өөр гавьяагүй тус яамныхан үлдсэн хугацаанд ажил амжуулна гэдэг юу л бол.
Тэр бүү хэл 1967 оны намар дэлхий сөнөх сургаар урьд өдөр нь хамгийн тарган малаа нядалж, хөгшин залуу, эр эмгүй ууж, идэж, уйлж, дуулж, шаналан, гашуудсан юм гэнэ лээ. “Харамсалтай нь” өглөө сэрэх нь ээ бүх зүйл бахь байдгаараа байсан гэдэг. Түүн лугаа адил юм болж, хэдэн яамныхан хөгнөө хөлдөө чирч балрах вий гэхээс хөх инээд ч хүрэх шиг.
Монгол Улсын хамаг л хөрөнгийг зарцуулах эрх мэдлийг гартаа атгачихаад байгаа Эдийн засгийн хөгжлийн яамыг хэрхэх тухай ч яригдаж буй. Улсын сан хөмрөгийг угтаа бол Сангийн яам дангаараа хариуцаж байсан ч сүүлийн хоёр жил гаруй хугацаанд шинэ яамны мэдэлд өгсөн. Шинэ яамны нөхөд “төрхөмдөө буцахдаа” шимийг нь аваад шимэлдгийг орхисон байх вий дээ гэдгийг урьчилан тооцоолсон л байлгүй, энэ улстөрчид.
Монгол Улсыг хөгжлийн зам руу хөтлөх нэрээр “Чингис”, “Самурай” бондуудыг олж ирсэн ч зарцуулахдаа “Зангууны үлгэр” болгож орхисон тус хөгжлийн сайд байтугай яамных нь суурь ганхаж байгаа болохоор үрсэн болон үлдээх хөрөнгийг их сайн нягтлах хэрэгтэй байх даа.
Нэгэнтээ хоёр жилийн хугацаанд хөгжлийн түүчээг хамтдаа туулах гэхээр хөлд нь чөдөр тушаа болсон сайд нар хаяад урагшлахад нь гар даллан инээгээд үлдэхгүй, харин ч бүдэрсэн дээр нь дараад унагаж мэдэх л юм. Тиймээс хагасхан сарын хугацаанд үлдэх хүнээр ачаагаа татуулахгүй л байгаасай даа.
Б.Төгөлдөр
Эх сурвалж:
Сэтгэгдэл0
hamgiin ineedtei ni bydlianii ezen Altanhy uuruu uldeh geed alialaad baina.