sonin.mn
Сэтгэгдэл (0)

Монгол Улсын Үндсэн хуулийн цэцийн дарга Ж.Амарсанаа тэргүүтэй төлөөлөгчид ОХУ-ын Үндсэн хуулийн шүүхийн дарга В.Д.Зорькины урилгаар тус улсад албан ёсны айлчлал хийхээр өнөөдөр Улаанбаатараас мордлоо.

Айлчлалын хөтөлбөрийн дагуу Үндсэн хуулийн цэцийн төлөөлөгчид ОХУ-ын Үндсэн хуулийн шүүхийн дарга В.Д.Зорькинтой албан ёсны уулзалт хийж, хоёр орны Үндсэн хуулийн шүүх хоорондын харилцаа, хамтын ажиллагааг улам хөгжүүлэх асуудлаар ярилцах юм байна.

Мөн ОХУ-ын Үндсэн хуулийн шүүхийн гишүүдтэй ажил хэргийн уулзалт хийх үеэр Үндсэн хуульт ёсыг төлөвшүүлэх талаар хоёр орны Үндсэн хуулийн шүүхүүдийн явуулж буй үйл ажиллагаа, оруулж буй хувь нэмэр, хуримтлуулсан арга туршлага, үндэсний болон олон улсын эрх зүйн хөгжлийн чиг хандлага зэрэг асуудлаар харилцан санал солилцох аж.

Түүнчлэн айлчлалын хүрээнд Үндсэн хуулийн цэцийн дарга Ж.Амарсанаа тэргүүтэй төлөөлөгчид ОХУ-ын Дээд шүүхийн дарга В.М.Лебедевтэй ажил хэргийн уулзалт хийнэ. Төлөөлөгчдийн бүрэлдэхүүнд Үндсэн хуулийн цэцийн орлогч дарга Н.Жанцан, Үндсэн хуулийн цэцийн гишүүн П.Очирбат, Үндсэн хуулийн цэцийн Судалгааны төвийн захирал Ц.Сарантуяа нар багтаж байгаа юм.

Д.Эрдэнэсувд

Эх сурвалж: "Монцамэ" агентлаг