АНУ-ын Бостон хотноо жил бүр уламжлал болон зохиогддог олон улсын марафоны барианы ойролцоо гар хийцийн хоёр бөмбөг дэлбэрснээс гурван хүн амиа алдаж, 264 хүн гэмтэж бэртсэн халдлага өнгөрсөн 2013 оны дөрөвдүгээр сарын 15-нд болсон.
АНУ-д 2001 оны есдүгээр сарын 11-ний халдлагаас хойш гараагүй байсан террорист халдлагад амиа алдсан хүмүүсийг дурсах ёслол өнгөрсөн мягмар гарагт марафоны барианы хэсэгт сүмийн хонхны дуугаар эхэлсэн байна.
Энэ үеэр АНУ-ын Дэд Ерөнхийлөгч Жо Байден, Бостоны мэр Мартин Уолш, сенатч Элизабет Уоррен, халдлагаас амьд үлдсэн хүмүүс болон ард иргэд гашуудал илэрхийлэн нэг минут дуугүй зогсчээ. Нэг жилийн өмнө бөмбөг дэлбэрсэн үдийн 15 цагаас өмнө АНУ-ын далбааг мандуулж, төрийн дуулал эгшиглүүлсэн аж.
Уг нь Бостоны марафон нь хотод хамгийн олон хүн цуглардаг, баяр хөөртэй үйл явдал байсан ч халдлага үйлдсэн ах дүү хоёр спортын энэхүү баярыг аймшиг болгон хувиргажээ.
Өнгөрсөн оны марафонд оролцон шархадсан Патрик Даунес “Бидний үзсэн өвчин шаналал дахиад хэзээ ч битгий давтагдаасай гэж хүсч байна. Нэг жилийн өмнө шархадсан олон хүн уг халдлага амьдралдаа үзсэн хамгийн хэцүү мэдрэмж байсан” хэмээн хэлсэн. П.Даунес болон түүний эхнэр Ж.Кенски халдлагад өртөн хоёулаа нэг хөлгүй болжээ. Жо Байден “Ямар ч ёслол, үг яриа, үйлдлээр та бүхний зүрх сэтгэлийг тайтгаруулж чадахгүй гэдгийг мэдэрч байна. Гэхдээ энэ үйл ажиллагаа уй гунигийг жаахан ч гэсэн хөнгөлөх байх гэж найдаж байна” гэжээ.
Халдлага үйлдсэн ах дүү Жохар болон Тамерлан Царнаев нь багадаа эцэг эхийн хамт АНУ-д очсон чечень гаралтай гэр бүлийн хүүхдүүд аж. Эцэг, эх нь тэднийг АНУ-д үлдээгээд 2012 оны эхээр Дагестанд очсон байна. Ээж Зубейдат Царнаева нь исламын хэт даврагсдыг сонирхдог байсан төдийгүй 2011 онд том хүү Тамерлантай утсаар ярихдаа жихадын талаар хэлж, Палестинд очих боломжтойг дурьдаж байсан ч хүү нь араб хэл мэдэхгүй гэж хэлжээ. Холбооны мөрдөх товчоо тэдний утасны яриаг чагнасан бичлэгийг халдлагын дараа гаргаж ирсэн билээ. Бостоны халдлагаас хэд хоногийн дараа ах дүү хоёрыг сэжиглэн мөрдсөн бөгөөд тусгай ажиллагааны үеэр ах Тамерлан нь амиа алдаж, дүү Жохар нь шархдан эмнэлэгт хүргэгдсэн. Жохарыг одоо байцаан саатуулж байгаа. Түүнийг шүүх хурал ирэх арваннэгдүгээр сарын 3-нд болох юм.
Бостоны марафоныг энэ дөрөвдүгээр сарын 21-нд чангатгасан хамгаалалтад явуулахаар бэлтгэл ажил хийж байна. Хамгаалалтад 3500 цагдаа ажиллуулах бөгөөд энэ тоо нь өнгөрсөн оныхоос бараг хоёр дахин их юм.
Зөвхөн Бостон хотод төдийгүй Массачусетс мужид цагдаа нарын тоог нэмж байгаа гэнэ. Түүнээс гадна хотод 100 гаруй нууц камер суурилуулсан аж. Хамгийн гол нь марафоны барианы хэсэгт анхаарал их хандуулах бөгөөд гүйлтийг үзэх хүмүүсийг том цүнх, үүргэвч, уут барихыг зөвшөөрөхгүй.
Мөн нэлмэгэр хувцас, нүүрээ халхалсан бүрх өмсөхгүй байхыг хүссэн байна. Марафонд олон зуун хүн оролцохоо илэрхийлсэн бөгөөд энэ үеэр хэдэн мянган сайн дурынхан ажиллахаа хэлжээ.
Түүнчлэн халдлагад өртсөн иргэдэд туслах сангийн мөнгийг нэг жил цуглуулж байгаа бөгөөд 61 сая гаруй ам.доллар цугларсан аж.
Марафонд амиа алдсан хүмүүсийг дурсах ёслолоос хэдэн цагийн дараа барианы орчимд эзэнгүй хоёр үүргэвч орхисон байснаас дүүргийн оршин суугчдыг нүүлгэн шилжүүлсэн байна. Гэрчүүдийн хэлснээр хөл нүцгэн, гивлүүр бүхий хар бүрхтэй нэг эрэгтэй үүргэвч үүрэн “Бостон хүчтэй” хэмээн хашгирч явсны дараа зам дээр үүргэвчүүд үлдсэн аж.
Уг эрэгтэйг саатуулсан бөгөөд цүнх тэсрэх бөмбөгтэй эсэхийг цагдаа нар роботоор шалгажээ. Цүнхэнд юу байсан талаар цагдаа нар хэлээгүй ч “Аюулгүй байдлыг хангах үүднээс марафоны барианы орчимд үлдээсэн үүргэвчүүдийг устгасан” гэж мэдэгдлээ. Мөн цагдаа нар хэвлэл мэдээллийн ажилтнуудыг тэсрэх бөмбөгийн талаар телевизээр үзүүлэхгүй байхыг хүссэн байна.
Н.Тунгалаг
Эх сурвалж:
Сэтгэгдэл0