sonin.mn
Сэтгэгдэл (0)

 

Өнгөрөгч бүтэн жилийн турш хэвлэлээр зуузай холбосон Ц.Элбэгдорж, Н.Энхбаяр, Тарбозавр Батаар гурвын салах ёс хийх цаг ирж магадгүйгээр улстөр үргэлжилж байна.
 
 
Учрыг өгүүлье. Өнгөрөгч оны дөрөвдүгээр сарын 13-ны орой Ерөнхийлөгч асан Н.Энхбаярыг тусгай ажиллагаагаар баривчилж улс орон даяар шуугиан тарьсан. Энэ баривчилгааны дуулиан одоо ч галаа намдаасангүй, дүрэлзсээр аж.
 
 
Хөлгүй их галын дунд Ц.Элбэгдоржийн нэр мөнхөд уяатай явж, экс Ерөнхийлөгчийг өмөөрсөн ард түмний хилэн түүн рүү үй зайгүй галлаж байв. Мэдээж хэрэг том ажиллагааг захиалсан гэх Ерөнхийлөгч Ц.Элбэгдорж маань энэ их галыг намдаах ямар нэгэн арга олох нь туйлын чухал байсан.
 
 
Тийм ч учраас Ерөнхийлөгчийн пиарчдын бодож олсон зүйл нь Тарбозавр Батаар хэмээх үлэг гүрвэлийн яс билээ. Үнэн хэрэгтээ Н.Энхбаярын баривчилгаа, түүний шүүх хурал, хорих ял, шорон уруу ачих зэрэг шат дараалсан үйл явцтай эн зэрэгцэхүйц шуугиан тарьсан нь үнэн.
 
 
Хэвлэл мэдээллийнхэн ч Н.Энхбаяр Тарбозавр Батаар хоёрыг эн тэнцүүхэн авч явсаар өнөөдөртэй золгуулсан нь ч цаанаа учиртай. Өнгөрөгч нэг жил хоёр шатны сонгуулийг эс тооцвол Тарбозавр Батаар, Н.Энхбаяр хоёроор амьсгалсан цаг байлаа.
 
 
Ийнхүү Н.Энхбаярыг өрөвдөх, Ц.Элбэгдоржид өсөрхөх зэрэгцэж байсан ид үе буюу 2012 оны тавдугаар сарын 18-нд үлэг гүрвэлийн ясыг гаргаж ард түмний хилэнт индэр дээр тавив.
 
 
Тухайн үеийн мэдээллийг сийрүүлбэл, АНУ-ын Нью-Йорк хотноо дуудлага худалдаанд орох гэж байсан Тарбозавр Батаар Монгол Улсын Ерөнхийлөгчийн сонорт хүрч, тэр даруйд нь Ерөнхийлөгч Ц.Элбэгдорж улсынхаа нэрийн өмнөөс нэхэмжлэл гарган шуурхай ажиллалаа хэмээж байв.
 
 
Үлэг гүрвэл гэх үлгэрийн ч юм шиг хэрнээ үндэсний шүтээн болох шахсан энэ зүйлд ард түмэн хайртай байдаг гэдгийг мэдэлгүй яахав. Үүнээс хойш Ц.Элбэгдоржид ирэх гал арай л зөөлөрсөн байх.
 
 
Энэ цагаас эхлэн Тарбозавр Батаарын нэг сарвуу гэхэд төдөн мянган ам.долларт хүрч байж, бүтэн биеэрээ төд гэх зэрэг мэдээлэл цацаж нийгмийн анхаарлыг энэ зүгт хандуулах гэсэн ажиллагаа тасралтгүй явж байв.
 
 
Та анзаарсан бол уг мэдээлэл нь Н.Энхбаярын тухай сенцсаац дэгдэх тоолонд дагалдаж байсан даа. Мэдээж үүний дараа Тарбозавр Батаарын шүүх хурал төдөнд болно гэх зэрэг мэдээлэл нь ч Н.Энхбаярын шат шатны шүүх хурлуудтай бараг дөрөө харшиж байсан гэхэд болно.
 
 
Харин Н.Энхбаярын шүүх хурлын эцсийн шийдвэр гарч хорих уруу ачигдах мөчид Тарбозавр Батаарыг АНУ-д ийм газар хадгаллаа гэх зэргээр мэдээлэл хөвөрсөн. Энэ бол Ц.Элбэгдорж уруу чиглэсэн галыг бага ч атугай намдааж байсан нь үнэний хувьтай.
 
 
Хэрэв итгэхгүй байгаа бол дээрх үйл явдлуудын давхцалыг хэвлэлийн архив ухаад нэг харчихаарай. Харин Ерөнхийлөгчийн сонгуульд нэр дэвшигчдийн буухиа ид үргэлжилж ахуй цагт хулгайлагдсан гэх Тарбозавр Батаарын ясыг хүлээн авах ёслол АНУ-д болов.
 
 
Уг ёслолын ажиллагаанд оролцохоор Ерөнхийлөгчийн Тамгын газрын болон Засгийн газрын төлөөлөл сэтгүүлчдийн багтай хамт АНУ-ыг зорив. Уг нь “Чингис” бондын асуудлаар АНУ-ыг зорихдоо юун хэвлэл мэдээллийнхэн, оргодол босуул шиг л чимээ гаргалгүй одоцгоосон санагдана.
 
 
Харин манай нэг нэртэй нийтлэлч өөрийн самбаагаар “Эдийн засгийн хөгжлийн сайд Н.Батбаяр “Чингис” бондын ажлаар АНУ-д очоод байхдаа зочид буудалд бөөллөө” гэх маягийн мэдээлэл бид үүнийг олж мэдсэн.
 
 
Харин хэд хоногийн өмнөөс Ерөнхийлөгчийн бүтэн жил явуулсан ажиллагааны эцсийн түүчээг ССАЖ-ын сайд Ц.Оюунгэрэл, Ерөнхийлөгчийн Тамгын газрын дарга П.Цагаан нар хөтөлж АНУ- аас нэг хэсэг мэдээллээр нүдүүлэв.
 
 
Энэ үеэр “Тарбозавр Батаарын хэрэг дээр АНУ, Монголын маш чадварлаг баг гар нийлэн ажилласны үр дүнд хэргийг богино хугацаанд шийдсэнийг талууд хүлээн зөвшөөрсөн” гэх мэдээлэл Ц.Элбэгдоржийн нэртэй хамт нисгэсээр байв.
 
 
Улстөрийн намууд Ерөнхийлөгчид нэр дэвшигчдээ тодруулж, нийгэмд ирээдүйн Ерөнхийлөгчийн тухай яриа газар авч байх үед Ерөнхийлөгчийн Тамгын газрын дарга П.Цагаан, ССАЖ-ын сайд Ц.Оюунгэрэлээр удирдуулсан баг тэнд ажиллаж байв.
 
 
Тавдугаар сарын 6-ны өдөр МАН- ын Бага хурал болж, Ерөнхийлөгчийн сонгуульд Б.Бат-Эрдэнийг нэр дэвшүүлэхээр болж байхад АНУ-ын Нью-Йорк хотнoo Тарбозавр Батаар үлэг гүрвэлийн олдворыг Монголын тал хүлээн авч байлаа.
 
 
Мөн үеэр “Ерөнхийлөгч Ц.Элбэгдоржийн илрүүлж, шуурхай ажиллагаа явуулсны үр дүнд Монгол Улсаас алдагдсан үлэг гүрвэлийн яс олдож...” гэх мэт мэдээлэл МАН-аас нэр дэвших эрх гардсан Б.Бат-Эрдэнийн мэдээлэлтэй ид зуузай холбож байв.
 
 
Энэхүү мэдээлэл цоо шинээрээ, хуучирч амжаагүй байхад залгуулаад буюу тавдугаар сарын 7-ны өдөр АН-ын ҮЗХ-ны хуралдаан болж, Ерөнхийлөгчийн сонгуульд 100 хувийн саналаар Ц.Элбэгдоржийг нэр дэвшүүлэхээр болов.
 
 
Одоо Ерөнхийлөгчийн сонгуулийн суртал- чилгааны ажиллагаа хууль ёсны дагуу 22-ны өдөр эхэлнэ. Яг энэ мөчийг утгуулж үлэг гүрвэлийн ясыг Монгол Улсад авчирлаа. Үүнийг нэг газар залах сүр дуулиантай ажлыг зохион байгуулж таарна.
 
 
Тэгэхээр Ц.Элбэгдоржийн сонгуулийн сурталчилгааны албан ёсны эхлэл энэхүү үлэг гүрвэлийн ясыг залах ажиллагаагаар эхлэх нь гэж хэлж болохоор. Өнөөдрийн байдлаар мэдээллийн сайтууд “ЗГХЭГ-ын дарга Ч.Сайханбилэг, Шадар сайд Д.Тэрбишдагва Н.Энхбаяр, О.Цолмон нар гэрээ байгуулсан.
 
 
МАХН Засгийн газар хоорондын тохироо явж, Н.Энхбаярыг АНУ-д эмчлүүлнэ” гэх зэрэг мэдээлэл цацагдаж байгаа нь ч огт санамсаргүй зүйл биш байх. Бүтэн жилийн турш гурвалсан морь тэрэг шиг хэвлэлээр дөрөө харшуулсан Ц.Элбэгдорж, Н.Энхбаяр, Тарбозавр Батаар гурав салах ёс хийж магадгүй юм.
 
 
Өөрөөр хэлбэл, Тарбозавр Батаартай зөрөөд Н.Энхбаяр АНУ явах, харин Ц.Элбэгдорж үлэг гүрвэлийн ясаар сонгуулийнхаа хууль ёсны ажиллагааг нээчихээд ажлаа бодох ийм сценари байж болох талтай. Уншигч олон нэг зүйлийг бодох учиртай.
 
 
Үлэг гүрвэлийн ясыг хэн хэзээ ямар шугамаар гаргасан тухай мэдээлэл Та хаанаас ч олж хараагүй. Харах ч үгүй. Тарбозавр Батаарыг ямар замаар гадагшаа алдагдсан тухай эрэн сурвалжлах ажиллагаа яагаад явуулаагүй юм. Энэ тухай яагаад ганц ч үг ганхийхгүй байгаа юм бэ.
 
 
Хэзээ нь бүү мэд алдагдсан гэх үлэг гүрвэлийн ясыг бүтэн жилйин турш хэвлэлийн хуудсаар Н.Энхбаярын мэдээлэлтэй ганзага нийлүүлдэг нь ямар учиртай юм. Хаанаас хэн хэзээ АНУ-д тэр ясыг аваачиж, хэчнээн сая доллараар хаана хадгалуулж байгаад ирэв зэрэг хар дагуулсан асуудал аяндаа босч таарна.
 
 
   Өнөөдрийн байдлаар цахим хуудаснаа “Нэг жилийн өмнө Нью- Йорк хотноо дуудлага худалдаанд орох гэж байсан Тарбозавр Батаар Монгол Улсын Ерөнхийлөгчийн сонорт хүрч, тэр даруйд нь Ерөнхийлөгч Ц.Элбэгдорж улсынхаа нэрийн өмнөөс нэхэмжлэл гарган шуурхай ажилласны үр дүнд буцаан авсан 70 гаруй сая жилийн настай Тарбозавр Батаар үлэг гүрвэлийн олдвор эх орондоо эргэн ирлээ” гэсэн мэдээлэл ид хүчээ авч байна.
 
 
Түүнчлэн тус мэдээлэлд. “Тарбозавр Батаарыг “Кореан эйр” компанийнхан өөрийн онгоцоор үнэ төлбөргүй тээвэрлэн Улаанбаатарт авчрав. Түүний араас янз бүрийн цаг хугацаанд, агаараар, бас далайн тээврээр 20 гаруй тооны динозаврын олдворууд Монголдоо ирэх юм.
 
 
Тарбозавр Батаарыг “Чингис хаан” олон улсын нисэх онгоцны буудалд Монгол Улсын Ерөнхийлөгчийн Тамгын газрын дарга П.Цагаан, ЗГХЭГ-ын дарга Ч.Сайханбилэг, ССАЖ-ын сайд Ц.Оюунгэрэл, цагдаа, гааль, даатгалын ажилтнууд хүлээн авсан юм” гэсэн мэдээлэл дагалдаж байгаа нь үнэхээр сүрдмээр юм.
 
 
Үнэхээр сэтгэл хөдөлгөм ажиллагаа гэдэг нь үүнээс харагдана. Юутай ч Ц.Элбэгдорж, Н.Энхбаяр, Тарбозавр Батаар гурвын салах ёс хийх цаг нь болсон санагдана.
 
 
С.Ууганбаяр
 
Эх сурвалж: