sonin.mn
ШИНЭ-ДЕЛИ. /ВВС/. Энэтхэгийн нийслэл Дели хотын хөл хөдөлгөөн ихтэй гудамжинд нэгэн эмэгтэй 20 гаруй удаа хутгалуулж байгааг харсаар байж хажуугаар нь хэнэггүй өнгөрч байсан хүмүүсийг энэтхэгчүүд жигшин зэвүүцэж байна.
 
Хяналтын камерт үлдсэн дүрс бичлэгийг харвал, өдгөө 22 настай сургуулийн багш Каруна гэдэг эмэгтэй рүү мотоциклтой залуу ойртож ирээд, толгой руу нь чулуугаар цохиж, өшиглөн, удаа дараа хутгалсаар байх үед хүмүүс хажуугаар нь ажиг ч үгүй явж өнгөрч байжээ.
 
Эцэст нь залууг зугтах гэж оролдох үед ойр хавьд нь байсан хүмүүс түүнийг барьж авсан байна. Уг хэргийг харж байсан хүмүүсийг хүн амины хэрэгт сэжигтнээр татсан гэж цагдаагийн газар мэдэгджээ.
 
Халдлагын үеэр нэг залуу халдагч этгээд рүү дөхөх гэж оролдсон боловч заналхийлэлд өртөн ухарч, хэргийн газрыг орхин явжээ. Юу болж буйг харахаар гэж олон хүн зогсч байсан боловч нэг нь  ч хөөрхий эмэгтэйд тусалж чадаагүй байна.
 
“Багш эмэгтэй 09:00 цагийн үед үеэлтэйгээ хамт явж байхдаа халдлагад өртсөн. Түүний амийг хөнөөсөн залуу болон хохирогч эмэгтэй хоёр өмнө нь хөршүүд байжээ. Халдлага үйлдсэн багш эмэгтэйд сэтгэлтэй байсан бололтой. Гэтэл залуу гэрлэсэн байсан учраас Каруна түүнийг "тоодоггүй" байсан нь энэ хэрэг гарах шалтгаан болсон байж магадгүй” гэж цагдаагийн  ажилтан Эша Пандей ярьжээ.
 
Д.Нямтулга
Эх  сурвалж: “Монцамэ” агентлаг