sonin.mn
Сэтгэгдэл (0)

 

Цагдаа нар таван настай хүүгээ заазуурдсан харгис эцгийг сулласан тухай мэдээлэл иргэдийн бухимдлыг барав. Гэтэл Баянзүрх дүүргийн цагдаагийнхан үүнийг худал мэдээлэл гэж няцаасан.
 
 
Энэ мэтчилэн таван настай хүүгийн хэргийг тойрсон үл ойлгогдох мэдээлэл олонтаа гарсан учраас "Лантуун дохио" ТББ, хүүгийн эмч П.Батсүх, ээж О.Болормаа нар өнгөрсөн бямба гаригт хэвлэлийнхэнд хандаж бодит мэдээлэл өгөхийг хүссэн юм.
 
 
Баянзүрх дүүргийн XI хороонд бага насны хүүхдээ заазуурдлаа гэх дуудлагаар Яаралтай түргэн тусламжийн их эмч П.Батсүх очсон байна. Тэрбээр энэ тухай ярихдаа "Намайг очиход нөхцөл байдал үнэхээр хүнд байсан. Би нүдэнд харагдсан бүхнээ фейсбүүктээ бичсэн.
 
 
Хамгийн гол нь эрх мэдэлтнүүд хүүхдийн асуудалд анхаарал хандуулаасай гэж хүссэн" хэмээв. Харин "Лантуун дохио" ТББ-ын тэргүүн Ч.Ганжавхлан "Манай төрийн бус байгууллагынхан энэ сарын 13-ны өдөр хүүг эргэхээр очсон.
 
 
Тухайн үед хүү ямар нэгэн эмчилгээ хийлгээгүй байсан. Түүнчлэн цагдаа нар хэрцгий эцгийг нь төрсөн дүүгийнх нь хүсэлтээр тавиад явуулчихсан. Эргэж ирээд эхнэр, хүүхдээ зодсон байсан. Хүүгийн ээж биднээс хоёр зүйлийг хүссэн.
 
 
Нэг нь аюулгүй газар аваачиж өгөхийг, нөгөөх нь хэвлэл мэдээллийнхэнд яриа өгөхийг хүсэхгүй байгаагаа хэлсэн" гэв. Үүний дараа "Лантуун дохио" ТББ-ын гишүүд эх, хүүхдийг хамгаалах байр, эмнэлэгт хүргэж өгсөн байна.
 
 
Сайны хажуугаар саар гэгчээр хүчирхийлэлд өртсөн хүүгийн нэрээр түрий барин хуурамч данс нээж, мөнгө завших оролдлогууд ч гарсан гэнэ. Хүүхдийн төлөө гэсэн уриа лоозонтой төрийн байгууллагууд хүчирхийллэлд өртсөн хүүгийн төлөө хуруугаа ч хөдөлгөөгүй байна.
 
 
Тэгсэн атлаа Нийслэлийн хүүхэд, гэр бүлийн хөгжлийн газраас "Бид хүүг хамгаалалтад авсан" гэж худал мэдээлэл цацсаныг Ч.Ганжавхлан хэлэв. Тэрбээр "Хүүхдийн төлөө үндэсний газар, Хүний эрхийн комисс, Баянзүрх дүүргийн зарим дарга нар юу ч хийгээгүй байж хийсэн юм шиг худлаа ярьсан.
 
 
Төрийн байгууллагууд ажлаа яаж хийдгийг эндээс харлаа. Тэд бодит ажил биш, зүгээр л шоу хийдэг юм байна" хэмээн ярив. Энэ үеэр хүүгийн ээж О.Болормаагаас цөөн асуултад хариулт авлаа.
 
 
-Та нөхөртэйгээ хэдэн жил хамт амьдарч байна вэ?
 
-Би нөхөртэйгээ хамт амьдраад найман жил болж байна. Хэрэг гарсан өдөр би ээжийндээ байсан. Гэртээ хүрээд иртэл охин маань уйлчихсан байсан. Эхэндээ би хүүгээ анзаараагүй. Охин уйлаад байсан болохоор бүх анхаарлаа тийшээ хандуулсан.
 
 
Нэг харсан чинь хүүгийн нүүр цус болчихсон. Миний хүү яасан юм гэтэл аав уруугаа заасан. Үнэхээр аймаар болчихсон байсан. Би харангуутаа гараад таньдаг хүний утсаар цагдаа, түргэн дуудсан. Эмч нар шуурхай ажиллаж, хүүд маань оёдол тавьсан.
 
 
Маргааш нь үдээс хойш цагдаад саатуулагдсан нөхөр маань юу ч болоогүй юм шиг гэртээ ороод ирсэн. Хүүхдийн бие ямар байна гэж огт асуугаагүй. Харин ч цагдаа дуудлаа гэж загнасан.
 
 
Нөхрөө ороод ирэнгүүт нь айгаад хоол хийж өгөөд жаахан тал зассан. Тэгсэн гадаа байсан нохойн гөлгийг барьж зодсон. Бүрэнхий болонгуут дахиад нөгөөх балмад авираа гаргаж эхэлсэн. Ингээд цагдаа дуудаж өгөхөөс өөр арга байгаагүй.
 
 
-Таныг өмнө нь ч гэсэн зоддог байсан гэж ойлгож болохуу? 
 
-Эхний үедээ ийм авир гаргаж байгаагүй. Харин сүүлийн хоёр жил архи ууж, агсам согтуу тавих болсон. Намайг байнга л дарамталдаг. Цагдаа дуудах юм бол улам л илүү занадаг. Салья гэхээр байгаа газар чинь очиж ална гэж сүрдүүлдэг.
 
 
Би хадмууддаа хэлж үзсэн. Бүр зугтаж хүртэл үзлээ. Сүүлдээ хэрцгийлэл нь хэтэрч хүүхдүүдийг минь хаздаг болсон. Хажуугаар нь хүүхдүүд өнгөрвөл чимхэж, хазаж, өшиглөдөг. Гэр бүлд маань тайван уур амьсгал гэж байхгүй болсон.
 
 
Байнга л түгшүүр зовлон дунд амьдарч байна. Хүүхдүүдээ өмөөрөхөөр намайг зоддог. Одоо хууль хяналтын байгууллага нь анхааралдаа авсан учраас нөхцөл байдал арай дээрдэнэ гэж итгэж байна.
 
 
-Нөхрийг тань хүүхдүүдээрээ шил, лааз түүлгэж мөнгөөр нь архи авч уудаг байсан гэсэн мэдээлэл тарсан ? 
 
-Тэр мэдээлэл худлаа. Тийм юм байхгүй. Манай нөхөр гарын дүйтэй хүн. Тийм болохоор төмрөөр эд зүйлс хийж хоногийн хоолоо залгуулдаг юм. Гэхдээ олсон мөнгөөрөө дандаа архи уудаг.
 
 
-Хүүгийн бие ямар байна вэ?
 
-Өмнөхөө бодвол сайжирч байгаа. Саяхнаас дусал тарианд орсон. Сайхан сэтгэлтэй иргэдийн буянаар хурдан тэнхэрч байна. "Лантуун дохио" ТББ-ын охид хөвгүүд байнга эргэж ирж байгаа. Хүү маань тэдэнтэй хамт инээж хөөрч байна.
 
 
-Та нөхрөө хуулийн дагуу зохих хариуцлага хүлээх нь зөв гэж бодож байна уу?
 
-Би нөхрөө суллагдаад гараад ирэх вий гэж айж байна. Хуулийн дагуу хариуцлагаа хүлээхэд надад өмгөөлөх юм байхгүй. Би одоо хэдэн хүүхдийнхээ төлөө амьдарья гэж тууштай шийдсэн. Бие гайгүй байвал удахгүй ажил хийнэ. Өмнө нь би цэцэрлэгт дуу хөгжмийн багшаар ажиллаж байсан. Одоо бол хүүхдээ л харж байна.
 
 
Ц.Оюунтунгалаг
 
Эх сурвалж: