Дэлхийн бөмбөрцөг бөөрөнхий гэдэгт сүүлийн үед эргэлзэх болов. Учир нь дэлхийн бөмбөрцгийн нөгөө буланд болж буй зүйлийг интернэт гэгч гайхамшгийн ачаар цаг алдалгүй, үзэх боломжтой болсон нь ийнхүү дэлхийг хавтгайруулахад хүргэж байна. Интернэтийн ач холбогдлын талаар өнөө үед тоочоод баршгүй.
Гэхдээ түүний сөрөг тал ч сайнаасаа дутахгүй. Тодруулбал өчигдөр л гэхэд цахим мэдээллийн сайтуудаар “Өмнөговь аймгаас алмаз эрдэнэ олдлоо”, “Нийслэлээс 2.2 кг жинтэй цул алт олджээ” зэрэг мэдээлэл борооны дараах мөөг шиг шилээ даган гарцгаасан. Энэ нь даамжирч фэйсбүүк, твиттерт шуугиан тарьж, өдрийн гол сэдэв болоод байв.
Гэтэл Өмнөговийн алмазын тухайд тус аймгийн Цогт-Овоо сумаас 40 км-ийн зайтай газраас олдсон гялтгар чулуулаг нь хатуу зүйлээр хүчтэй цохих, хазахад үйрч байсан гэнэ. Тэгэхээр энэ мэдээлэл худлаа болж таарав. Ямартай ч өмнөговьчууд “бутардаг алмаз”-аа геологийн төв лаборатор руу шинжилгээнд өгөхөөр болсон гэнэ.
Энэ мэдээллээс үүдэн алмаз олдсон гэх газар руу хүрз, жоотуу барьсан иргэд ихээр очих болсны улмаас сумын Засаг дарга нь “Тэр хавьд одоо ямар ч хүн, машин тэрэг байхгүй” гэдгийг албан ёсоор мэдэгдсэн байна.
Тэгвэл Өмнөговийн алмазны дууль ердөө л мөнгөтэй болох гэсэн хүний суурь хэрэгцээ, үндсэн хүсэлд дөрөөлсөн “элийрэл” байж таарав. Нутгийн олны эндүүрлийг шүүрэн авч, элдвээр хачирлан нийслэлчүүдийн арааны шүлсийг асгаруулах арга ядсан арга ч байж болох юм.
Энэ явдал ердөө л интернэт гэгчийн бараан талыг харуулж байгаа хэрэг. Нэг нь сенсаацлаж, нөгөө нь дэвэргэдэг халтуурны хэдэн сайтуудын балаг.
Нөгөөтэйгүүр нийтийн дунд шуугиан дэгдээж, улайрсан олон тийшээ хошуурахыг мэдсэн хэсэг бүлгийн явуургүй арга байхыг ч үгүйсгэх боломжгүй. Бидний нэрлэдэг “нинжа” гэх бүлэг хэзээний л алт гарлаа гэсэн газрыг гараараа ч сэндийччих сүйхээтэй.
Тэгэхээр энэ сургаар Цогт-Овоо сумын нутаг руу улаан нүдэлж, хүрз, жоотуугаар зэвсэглэсэн нөхөд хошуурсан болоод газар нутгаа аварахын тулд сумын Засаг дарга нь албан ёсны мэдэгдэл хийсэн байж таараа.
Энэ явдлууд дээх нь үед жинхэнэ скандал болж явсан “Гал гаргадаг Өнөрмаа”, “Ромбу гарагийнхантай ярьдаг Ч.Дашцэрэн” зэрэг нөхдийг эрхгүй санагдуулав. Сонссон бүхэндээ итгэж, телевизийн урлагийг “Халтар царайт”-аар төсөөлж явсан бараан түүхэнд одооноос гэгээ татах нь уу гэтэл “Бурханаар бөөлждөг” В.Мөнгөнчимэг гэгч бүсгүй гарч ирээд хэсэгтээ л донсолгоод авсан. Тэгэхээр интернетийн ачаар хавтгайрсан бөмбөрцөг дэлхийн задгайралд хазаар хэрэгтэй болж байх шиг.
М.Санчир
Эх сурвалж:
Сэтгэгдэл0
Баабар л олон нийтийн анхааралыг өөр тийш хандуулах гэж ийм хорлонтой зүйл хийж байгаа даа. Баабараас хүний санаанд оромгүй муу зүйл гардаг түүнийг нь санхүүжүүлдэг далд эзэн байдаг болохоор ийм юм дандаа хийж байдаг юм.
тэнэг тэнэг гэхэд бас ийм элий балай хүн байдаг аа