sonin.mn
Сэтгэгдэл (0)

 

Оросын “ТНТ” телевизээс зохион байгуулдаг “Зөн билгийн тулаан” нэвтрүүлгийн шилдэг оролцогч болох Мохсен Нарузы, Мехти, Вит Мано зэрэг зөн билигтэн манай улсад ирж хүмүүстэй уулзан, бясалгал ариуслыг үйлдэж байсан удаатай. Тэгвэл тус нэвтрүүлгийн 13 дахь тулааны шилдэг оролцогч Фатима Хадуева Монголд ирлээ.
 
 
Тэрбээр ирсэн даруйдаа хэвлэлийнхэнд хандсан бөгөөд сэтгүүлчдийн сонирхсон асуултад хариулсан юм. Хурлын үеэр сониуч нэгэн зөн билэгтнийг туршиж өөрийн төрсөн ордыг асуусан нь хүмүүсийн сонирхлыг ихэд татлаа. Гэвч зөн билэгтэн замдаа алжаасан болоод ч тэр үү хариултад бүдэрсэн юм.
 
 
Фатима Хадуева нь халуун цэгийн сурвалжлагч, нийгмийн халамжийн сангийн удирдагч ажээ. Тэрбээр Дагестанд өссөн бөгөөд хоёр охинтой гэнэ. Том охин Алена нь оюутан бол бага охин Даша нь сурагч.
 
 
Фатима Хадуева эгчийгээ нас барсны дараа түүний хүү Ризванаг авч өсгөсөн ажээ. Охиных нь багалзуур хоолойг эмч задалснаас хойш буяны үйл ажиллагаа эрхлэх болсон байна. Тэрбээр манай улсад зочлохдоо ч буяны ажил хийхээр төлөвлөжээ. 
 
 
-Монголын талаарх сэтгэгдлээсээ хуваалцаач. Ирэхээсээ өмнө Монгол орны тухай төсөөлж байв уу? 
 
-Онгоцноос буугаад Монгол орны ёс заншлын сайхныг мэдэрлээ. Өмнө нь танай үндэсний дээлийг өмсч байгаагүй. Өмсөхөд их тааламжтай байдгийг одоо мэдэрч байна. Тэгээд бас их гоё юм аа. Надад их таалагдаж байна.
 
 
Ер нь ирэхээсээ өмнө Монголын талаар мэдээлэлтэй байсан. Би Монголд ирж байсан хүмүүсээс танай орны талаар асуухад “Харж үзэх олон зүйлтэй сайхан орон” гэж хэлдэг юм. Бас Монголын аугаа их түүхийг мартаж болохгүй. Энэ нь намайг танай улсад ирэхэд нөлөөлсөн.
 
 
Мөн зөн билэгтэн гэдэг утгаар надад мэдрэгдсэн анхны сэтгэгдлээсээ хуваалцъя. Ерөнхийдөө ард түмнийг шинжиж хэлэх юм бол одоогоор тайван, хүлээлгийн байдалтай байгаа нь мэдрэгдлээ. Дээрээс нь Монголын ард түмэн хэрэгтэй газраа зөв цагтаа байгаа гэж бодож байна. 
 
 
-Юу хүлээгээд байгааг Та хэлж өгөөч? 
 
-Бидэнд хэлж болдоггүй зүйл гэж бий. Тиймээс хариулж чадахгүй юм байна. Ер нь бүх шийдвэрийг ард түмэн хамтаар шийддэг. Энэ нь амаргүй ч чухал шүү. Монгол орон байгаль, газар зүйн хувьд их энергитэй бүсэд оршдог.
 
 
Тиймээс одоо газартаа анхаарал хандуулах хэрэгтэй гэж зөвлөмөөр байна. Энэ утгаараа өөрт байгаа бүхий л бололцоогоо газартаа зориулах шаардлагатай. Ингэж чадвал энх тунх амьдрал, эдийн засгийн бүрэн байдлыг хадгалах болно.
 
 
Улмаар Монголын ард түмний амьдрал өсч дээшлэх юм. Бас шийдвэр гаргах цаг болсон байна. Мэдээж эрсдэлгүй зүйл гэж үгүй. Хамгийн гол нь толгойгоо зөв ажиллуулж ухаантай хөдлөх хэрэгтэй.
 
 
Монголчуудын хувьд залуусын эрин үе эхэлж байна. Өөрөөр хэлбэл, тэдний хийж бүтээх цаг иржээ. Тиймээс эвтэй байж хамтдаа хүчтэй байх ёстой гэж хэлье. 
 
 
-Таны ярианаас газар шороондоо анхаарал хандуулах хэрэгтэй гэдгийг ойлголоо. Хэрвээ тэгж чадахгүй бол энерги үгүй болно гэж ойлгож болох уу? 
 
-Энерги хэзээ ч устдаггүй. Зарим үед аягыг усаар дүүргэхэд нэг дусал дутдаг шүү дээ. Энэ үе нь одоо ирсэн байна гэж ойлгох хэрэгтэй. 
 
 
-Өөрийнхөө зөн билэгтэй гэдгийг хэдэн настайдаа мэдсэн бэ? 
 
-Ер нь хүн бүрт тодорхой хэмжээний зөн бий. Миний хувьд энэ мэдрэмжийг таван настайдаа олж авсан. Нэгэн тохиолдлоор, санамсаргүйгээр онцгой гэдгээ мэдэрч эхэлсэн юм. Түүнээс хойш өөрийнхөө мэдрэмжийг удаан хугацаанд хөгжүүлсэн. Улмаар хамгийн түрүүнд дурсамж сэргээх чадвараа хөгжүүлж эхэлсэн. 
 
 
-Оросын 13 дахь зөн билгийн тулааныг монголчууд телевизээр үзсэн. Их өрсөлдөөнтэй болдог юм шиг ажиглагдсан? 
 
-Хэн нэгний хувь тавилантай холбоотой асуудлыг шийдэх нь сэтгэл зүйн хувьд амаргүй. Тиймээс их энерги зарцуулдаг. Та бүхэн гэрээсээ бидний хэрхэн оролцохыг харсан байх. Нэвтрүүлгийн үеэр оролцогч бүр нэг даалгаврыг гүйцэтгэхэд 3-5 цаг зарцуулсан. Энэ бидний хувьд их ачаалалтай, хүнд байдаг. 
 
 
-Зөн билэгтнүүдийг хийж буй үйлээр нь хар, цагаан гэж ангилдаг уу? 
 
-Энэ миний дуртай асуулт байна. Хар, цагаан энерги гэж байдаггүй. Энэ бол яг атомын энергитэй адил. Хамгийн гол нь энергитэй хүн өөрөө хар, цагаан болохоо шийддэг юм.
 
 
Үүнийг зөвхөн тухайн хүний зүрх сэтгэл шийддэг. Хүүхэд төрүүлэхэд есөн сар шаардлагатай байдаг. Гэтэл хүний амийг хөнөөхөд ганц хором хангалттай байдаг биз дээ. Энэ л асуултын хариу болно. 
 
 
-2013 оны онцлох үйл явдлыг нэрлэж болох уу? 
 
-2013 оны гуравдугаар сарын 21-нд могой жилийн нээлт болсон. Өөрөөр хэлбэл, энэ үед могой жил идэвхэжсэн гэсэн үг. Энэ утгаараа могой жи- лийн могой сар эрүүл мэндийн салбарынхны хувьд шинэ зүйлийг эрэлхийлсэн, дэвшилтэт он тохиох болно.
 
 
Эрүүл мэндийн салбарын бэлгэ тэмдэг нь ч хүртэл могой байдаг биз дээ. Олон жил эмчлэх боломжгүй хэмээн тодорхойлж байсан өвчнийг анагаах аргыг энэ жил олно. Бас генетиктэй холбоотой олон нээлт хийнэ. Технологийн хувьд ч гэсэн төсөөлөхийн аргагүй дэвшилттэй сайхан жил болох юм. 
 
 
-Та Монголд ирэх өдрөө яагаад могой жилийн могой сар хэмээн онцолсон юм бэ? 
 
-Дээр хэлсэнчлэн могой жил гайхалтай үйл явдлуудаар дүүрэн байх болно. Монголчууд могойн чуулганыг харсан хүн хөрөнгө чинээтэй болно гэж ярьдаг. Энэ утгаараа энэ жил эдийн засгийн хувьд ч дэвшилтэт байх юм байна.
 
 
Тиймээс Монголд зүгээр ирэх бус уулзсан хүмүүсийнхээ мөнгөний зөв чиглэлийг заах зорил готой ирсэн. Мөн хүмүүст аурагаа хэрхэн хамгаалах талаар лекц уншина. Мэдээж их эзэн Чингис хааны нутагтай танилцах нь бас нэг зорилго шүү дээ. 
 
 
-Таныг Батсүмбэрийн асрамжийн газар очно гэж сонслоо. Тийшээ явах болсон нь шалтгаантай юу? 
 
-Би Монголд гурав хоног байна. Энэ хугацаандаа байгалийн үзэсгэлэнт газраар аялж, монголчуудтай танилцах хүсэлтэй байгаа. Мөн маргааш / өнөөдөр/ өглөө Батсүмбэрийн асрамжийн газар уруу явна.
 
 
Тэнд очиж ахмад буурлуудыг баярлуулж, тэдэнтэй хамт тоглолт үзэхээр болсон. Аливаа орны түүх соёлыг ахмад буурлууд маань авч явдаг байсан. Тиймээс ч тэдэнд хүндэтгэл үзүүлэхээр болсон юм. 
 
 
-Монголд ирэхээсээ өмнө сонгууль болох гэж байгаа талаар сонссон байх. Та бидэнд дараагийн Ерөнхийлөгч ямар хүн сонгогдох талаар мэдээлэл өгөөч? 
 
-Үнэндээ сонгууль болох гэж байгааг мэдээгүй юм байна. Ер нь би улстөр сонирхдоггүй. Гэхдээ Танд Ерөнхийлөгч болох хүнийг дүрслэх гээд оролдъё. Ерөнхийлөгч болох хүн өндөр, хариуцлагатай алба хашдаг хүн байна. Энэ хүн галын илүү энерги, эрч хүчтэй. Түүнээс гадна залуулаг сэтгэлгээтэй, хүч чадалтай хүн юм даа.
 
 
Б.Сэлэнгэ
 
Эх сурвалж: