sonin.mn
Сэтгэгдэл (0)

 

Мэргэжлийн сүмогийн 68 дахь их аварга Д.Дагвадорж АН-ын гишүүн болж, Үйлдвэр худалдааны сайд Х.Баттулгаас үнэмлэхээ гардан авсан нь өчигдөрийн төдийгүй сүүлийн үеийн монголын улстөрийн шуугиантай үйл явдлын нэг болов. 
 
 
Ц.Элбэгдорж Ерөн­хий­лөгчийн сон­гуульд албан ёсоор нэр дэвшигчийн үнэмлэхээ гардан авснаас гуравхан ца­гийн дараа болсон энэ үйл явдлыг одоогийн Ерөнхийлөгчийн сонгуулийн сур­талчилгаанд бяр хүч нэмэрлэсэн явдал боллоо гэх хүн захаас аваад байна. 
 
 
Жил гаруйхны өмнө МАХН-ын дарга Н.Энхбаярыг хүчирхэг цээжээрээ хамгаалах шахам итгэл үнэмшилтэй явсан их аваргын үзэл бодол чухам яагаад орвонгоороо эргэж, төрүүлж өсгөсөн аав, зулай дээр нь гишгэж төрсөн ахынхаа эсрэг санаа зориг шулуудсаныг тааварлах аргагүй. 
 
 
Нөгөөтэйгүүр Дархан аварга Б.Бат-Эрдэнийг анх удаа УИХ-ын гишүүн болоход “Пөөх. Тоон дотор үсэг цохиж явах чинь юу вэ” гэцгээж байсан хү­мүүс өнөөдөр “Б.Бат-Эрдэнэ аварга Ерөнхийлөгчийн сонгуульд нэр дэвшсэн нь нүдээ олсон явдал боллоо” хэмээн амаа олохгүй магтацгааж байгаа. 
 
 
Магадгүй “Женко” Х.Баттулга хөтөлсөөр АН-ын отгон гишүүнээр сүр дуулиантай тодорч байгаа их аварга Д.Дагвадорж гуравхан жилийн дараа дээрх хувь тавиланг давтахгүй гэх газаргүй. Тэр ч бүү хэл 2017 оны Ерөнхийлөгчийн сонгуульд АН-ын хүчирхэг өрсөлдөгчдөө “цупаридаж” хаячихаад ханхайгаад зогсож байж ч мэдэх л юм. 
 
 
Үйл явдал тэгж өрнөвөл “Их эзэн Чингисийн хойд дүр албан ёсоор тодорлоо” хэмээн гадаад, дотоодгүй шуугиж сүйд болох нь тодорхой. 
 
 
Гайхуулах амжилт үзүүлэхгүй байгаа монголын Чөлөөт бөхийн холбоог тэргүүлэх болоод удаагүй Д.Дагвадорж аварга эрх баригч АН-д элссэнээр хөрөнгө санхүүгийн хувьд толгой өвдөх зүйлгүй болж, 2016 оны олимпод монголын бөхчүүд хангамж, бэлтгэл сайтай оролцох нөхцөл бүрдлээ гэх хүмүүс ч байна. 
 
 
Ерөнхийлөгч Н.Энхбаяр бүрэн эрхийнхээ хугацааг дуусахаас өмнөхөн Монгол Улсын хөдөлмөрийн баатар хэмээх эрхэм дээд шагнал хүртээснээр энэ хоёр хүн нэг хэсэгтээ “Хаа ч явсан цуг гэж мэдээрэй” хэмээн хоолой салган дуулсан түүхтэй. Тэгвэл өчигдрөөс “Салъя гэж салсангүй, салаа замын эрхээр хагацлаа” гээч нь л болох шиг боллоо. 
 
 
Ямартай ч их аварга Д.Дагвадорж хүчирхэг цээжээ цэнхэр тугаар ороолоо. Эр хүний дотор эмээлтэй хазаартай морь багтдаг гэлцдэг билээ. Харин Д.Дагвадорж аваргын дотор АН багтаад байгаа бололтой.
 
 
Түүний дараагийн “барилдаан” юу байхыг сонирхон хүлээх л үлдэж байна. Цагтаа тэр “гарлаа, өрлөө, давлаа” явсан. Харин одоо “элслээ”-гээ хийчихлээ. Удахгүй “дэвшлээ, яллаа” болох болов уу яах бол. 
 
 
Д.Түвшин 
 
Эх сурвалж: