sonin.mn
БЭЭЖИН. /ITAR-TASS/. 2014 оны эцсийн байдлаар Хятадын хүн ам 1.367 тэрбум болсон байна. Нэг жилийн хугацаанд хүн ам нь 7.1 саяар өссөн тухай Хятадын Улсын статистикийн газрын мэдээлэлд дурджээ.
 
Тус байгууллагын мэдээлснээр, өнгөрсөн онд Хятадад 16.9 сая төрөлт, 9.8 сая нас баралт бүртгэгдсэн байна. Хятадын хүн амын дотор хүйсийн тэнцвэрт бус байдал ажиглагдсан хэвээр байна. Хятад эрчүүдийн тоо эмэгтэйчүүдийн тооноос 33.8 саяар илүү байгаа аж.
 
Тус улсын хүн амын 17.5 хувийг 16 хүртэл насны хүүхдүүд эзэлж байгаа бол хөдөлмөрийн насны /16-60 нас/ хүмүүс хүн амын 67 хувийг бүрдүүлж байна. Хятадын 60-аас дээш настай ахимаг насныхан нийт оршин суугчдын 15.5 хувийг эзэлдэг ажээ.
 
Хятадын хүн амын тал гаруй буюу 54.8 хувь нь хотуудад оршин суудаг бол хөдөө аж ахуйн бүс нутагт 45.2 хувь нь амьдарч байна.
 
Д.Жаргал
Эх сурвалж: "Монцамэ" агентлаг