Sonin.mn » Сонгууль 2009

Д.Зоригт тэргүүлж байна

sonin — Mon, 19 Oct 2009 02:55:07 +0000

Нөхөн сонгуулийн дүн эхнээсээ гарч эхэлжээ. Шөнийн 01 цаг 50 минутад МАХН-ын хотын намын хорооны байранд хийсэн мэдээллээр тус намаас нэр дэвшигч Д.Зоригт өрсөлдөгчдөөсөө 1800 хүний саналаар илт давуу түрүүлж байна гэсэн урьдчилсан мэдээ иржээ.

Чингэлтэй дүүргийн 1, 8, 12, 21 дүгээр хэсгийн хороод ийнхүү дүнгээ гаргасан байна. Дээрх дөрвөн хэсгийн хороодын сонгогчдоос Эрдэс баялаг эрчим хүчний сайд Д.Зоригт 3686 хүний санал авсан бол Ардчилсан намаас нэр дэвшигч Р.Бурмаа 1863 хүний санал авчээ. Бусад 19 хэсгийн хороодын санал тоолох үйл явц хараахан дуусаагүй байна гэж Чингэлтэй дүүргийн сонгуулийн тойргийн хорооноос мэдээллээ.

Иргэдийн 20 орчим хувь нь саналаа өгөөд байна

sonin — Sun, 18 Oct 2009 05:07:20 +0000

Чингэлтэй дүүрэгт УИХ-ын 24 дүгээр тойргийн нөхөн сонгууль өглөөний 7 цагт эхэлж, нийт сонгогчдын 20 орчим хувь нь саналаа өгөөд байна. Сонгогчдын ирц сайн байна. Одоогийн байдлаар хууль зөрчсөн ноцтой үйлдэл 23 хэсгийн хорооны хэмжээнд гараагүй байна гэж дөнгөж сая чингэлтэй дүүргийн сонгуулийн хорооноос мэдээллээ. 98 000 хүн амтай тус тойрогт сонгуулийн насны 70 000 орчим иргэн амьдардаг юм. Тэдний 60 гаруй хувьд нь сонгуулийн үнэмлэхийг тараагаад байгаа гэнэ.

Чингэлтэй дүүргийн сонгуулийн хорооны даргаар НЗДТГ-ын хэлтсийн дарга Ганболд, нарийн бичгийн даргаар Нийслэлийн Ардчилсан намын ХЭГ-ын дарга Нямцэцэг нар нийт 11 хүний бүрэлдхүүнтэйгээр ажиллаж байна. Сонгууль 22 цагт дуусна.

Э.Ариунзаяа

Чингэлтэйн нөхөн сонгуулиар УИХ-д нэр дэвшүүлж, сонгож болохгүй улс төрчдийг иргэд нэрлэж байна

sonin — Fri, 18 Sep 2009 01:46:28 +0000

“Хариуцлагатай сонгуулийн төлөө” уриатайгаар үйл ажиллагаагаа явуулдаг “СОНГУУЛЬ.МН” сонгуулийн мэдээллийн төрөлжсөн сайт дэлхийн өнцөг булан бүрт суугаа Монголчууддаа удаа дараагийн УИХ, Ерөнхийлөгч, ИТХ-ын сонгуулийн үйл явцын талаарх мэдээллийг хүргэж байсан билээ. Аливаа сонгууль бүрийг хариуцлага дагах учиртайгаас гадна, иргэдийн хүсэн хүлээсэн төрийн түшээг улс төрийн нам, эвслүүд дэвшүүлэх үүрэгтэй. Иймээс ч УИХ-ын Чингэлтэй дүүргийн нөхөн сонгууль 2009 оны 10 дугаар сарын 18 нд болохтой холбогдон “СОНГУУЛЬ.МН” сайтаас 2009 оны 9 дүгээр сарын 10-аас 2009 оны 09 дүгээр сарын 18 нийг хүртэлх хугацаанд “ Чингэлтэйн нөхөн сонгуулиар хэнийг УИХ-д нэр дэвшүүлж, сонгож болохгүй вэ? ” гэсэн санал асуулгыг явуулахад нийт 3553 саналын хамгийн олон буюу 19.7% нь МАХН-аас Ерөнхийлөгч асан Намбарын Энхбаярыг нэр дэвшихийг дэмжихгүй байгаагаа илэрхийлсэн бол Ардчилсан намаас УИХ-ын гишүүн асан Батын Батбаатарыг нэр дэвшүүлэхийг дэмжихгүй байгаагаа 11.7% нь илэрхийлсэн байна. Хуулийн дагуу энэ сарын 23 ны дотор намууд нэр дэвшигчээ тодруулах бөгөөд иргэд, сонгогчдынхоо өмнө хариуцлага хүлээн, шударга ажиллаж чадах эсэхээ намууд ямар нэр дэвшигч сонгож буйгаараа ч харуулж болох юм. Санал асуулгийн “Ямар учраас дээрх нэр дэвшигчийг сонгож болохгүй вэ” гэсэн хэсэгт ч иргэд цахим хаягаар олон тайлбар ирүүлжээ. Тэдгээрээс тоймлон хүргэе:

Н.Энхбаяр- “ Арай гэж авилгын загалмайлсан эцгээс саллаа гэж бодож байтал юу вэ?”
Н.Энхбаяр- “Их хуралд дэвших яах вэ? Энхбаяр минь, Их өрөөс зувчуулсан мөнгөө Монголын ард түмэнд хэзээ өгөх гэж байна.”
Н.Энхбаяр- “Ганчимэгийг худалдаж аваад л өөрийгөө магтуулчихад ялна гэж бодоо юу? Чамайг дагалдагчдаас чинь өөр хэн ч сонгохгүй.”
Д.Эрдэнэбат- “Багануур дүүргийг нураасан этгээдийг УИХ-д сонгох хүн олдохгүй байх даа, арай ч . Багануурчууд минь мэдэж байгаа.”
Д.Эрдэнэбат-“ 1000-ын архи зардаг хүн мөн биз дээ. Энэ хүнийг засаг дарга байхад АН-ын ҮЗХ-ны гишүүн эзэнтэй “Азийн чоно” архи Багануурчуудыг хордуулж, алсныг хэн ч мартаагүй байхаа. Ийм л засаг дарга байсан хүн дээ”
Г.Мөнхбаяр –“ Саяны үерээр энэ нөхрийн ажлын үр дүн харагдлаа. Тэгэхээр УИХ-д биш хотдоо сайжруулах хийх ажил зөндөө байгаа байхаа, эрхэм хотын даргаа.”
Р.Бурмаа- “ Төслийн мөнгө идээд, намынхныгаа муулаад явдаг хүн. Хаяагаа хадардаг хүүхэн. Өнгөрсөн сонгуулиар манай тойрогт ирж байсан юм”
Б.Батбаатар-“Дүүрэгт нэр дэвшиж уначихаад дахиад УИХ-д гарах гэж байгаа юм байх даа”
У.Хүрэлсүх- “ Хадгаламж банкны хэргээр зувчуулсан мөнгөө сонгуульд зарцуулж байж л гарах гээгүй юм бол ч гарахгүй л дээ”

10. Б.Батболд-“ XLTA –ийн Батболдод УИХ-ын гишүүний суудал хэт томдох байлгүй дээ, гэмт хэрэгт хүртэл холбогдож байсан биз дээ”

11. Ш.Төмөрсүх –“ Энэ угаасаа сайн дурын уран сайханч. Иймэрхүү нөхдүүд Монгол төрөөс холхон явах хэрэгтэй”

12. Х.Бат-Ялалт-“Сая сонгуулиар Н.Энхбаярыг дэмжээд байсан. Одоо аягүй бол даалгавраар нь санал хуваах гэж дэвшиж байгаа биз. Захиалгын хөдөлгөөнчин Бат-Ялалт.”

13. Ё.Отгонбаяр-“ Хичээл эхэлчихээд түмэн ажил өмнө чинь байхад УИХ-д дэвшээд явав аа, нөхөр сайд гуай”

Улс төрийн намуудын болоод иргэн таны сонголт мэргэн байх болтугай

“СОНГУУЛЬ.МН”

“ Чингэлтэйн нөхөн сонгуулиар УИХ-д хэнийг сонгож болохгүй вэ?”санал асуулга www.songuuli.mn сайт дээр үргэлжлэн явагдаж байна.

Нөхөн сонгуульд 146 сая төгрөг зарцуулна

sonin — Wed, 09 Sep 2009 03:22:47 +0000

УИХ-ын 24 дугээр тойрогт нөхөн сонгууль явуулах товыг 2009 оны долдугаар сарын 17-ны өдөр зарласан. Харин сонгуулийн санал хураалт ирэх сарын 18-ны ням гаригт болох аж.
Сонгуулийн талаарх зарим зvйлийг СЕХ-ны нарийн бичгийн дарга Ч.Содномцэрэнгээс тодрууллаа.

- Нөхөн сонгуулийн бэлтгэл ажил хэр хангагдаж байна вэ?
- СЕХ хуралдаж нөхөн сонгуульд бэлтгэх ажлын төлөвлөгөөгөө гаргасан. Тойргийн хороо байгуулах, нам эвслvvдийг бvртгэх ажлыг хийж байна. Мөн Улсын бvртгэлийн ерөнхий газартай хамтран энэ сонгуульд дэвшилтэт аргуудыг хэрэглэх асуудлыг судалж байна.

-Дэвшилтэт аргаа тодруулаач?
-Урьд нь сонгогчийн vнэмлэхийг гараар бичдэг байсан. Харин энэ удаад бvх ажлыг комьпютер ашиглаж хийхээр боллоо. Мөн кодын нууцлалыг нэвтрvvлэх ажлыг хийхээр ярилцаж байна.

- Өнөөдрийн байдлаар ямар намууд сонгуульд оролцохоо мэдэгдээд байна вэ?
- МАХН, АН, ИЗН, Уламжлалын нэгдсэн нам, Хөгжлийн хөтөлбөр нам, Эрх чөлөөг хэрэгжvvлэгч нам, Ардчилсан хөдөлгөөн нам, Vндэсний шинэ нам гэсэн найман нам сонгуульд оролцохоо илэрхийлж бичиг баримтаа СЕХ-нд өгсөн. Одоо намуудаас ирvvлсэн материалуудыг СЕХ vнэн зөв гvицэд эсэхииг нягтлан хянаж байна.

-Бичиг баримтаа ирvvлсэн намуудыг хэзээ албан ёсоор бvртгэх вэ?
-Бид улс төрийн намуудын бичиг баримтыг дутуу, хуурамч мөн өмнөх сонгуулийн зардлын тайлангаа СЕХ-ны хороонд vнэн зөв ирvvлсэн эсэхийг шалгаж хурлаараа авч хэлэлцэнэ. Vvний дараа тухайн намыг бvртгэх эсэхийг шийдээд батламж өгнө. Харин шийдвэрээ энэ сарын 23-ны дотор гаргах хуулийн заалт бий.

-Нэр дэвшvvлэх ажил хэдэнд эхлэх вэ?
-Энэ сарын 24-өөс эхэлнэ. Тав хоногийн хугацаанд явагдаж өөрөөр хэлбэл 29- нд дуусна. Нэр дэвшигчийг тухайн тойргийн хороо бvртгэнэ. Тойргийн хороо бvртгэсэн мэдээгээ гурав хоногийн дотор СЕХ-нд ирvvлдэг. Энэ сарын 29-н гэхэд нэр дэвшигчид тодорсон байна.

-Нэр дэвшигчийн талаар?
- Тухайн нэр дэвшигч эхлээд намын даргатай хэлэлцэж дараа нь Дvvргайн намын хороогоор орж хамгийн сvvлд нь VЗХ-аар асуудлыг шийдэх шинэ журамтай болсон.

-Бие даан нэр дэвшигчдэд ямар шаардлага тавигдах бол?
-Бие даан нэр дэвшиж буй тохиолдолд юуны тvрvvнд хороо тус бvрийн иргэд дэмжигчдээс 801-ээс дээшхи хvний саналыг цуглуулж баталгаажуулсан байх ёстой. Дараа нь бусад асуудлуудыг шийднэ.

-Сонгогчдын нэрсийн жагсаалт гаргах ажил хийгдэж байгаа юу?
-Иргэний бvртгэлийн байгууллагууд сонгогчдын тоог бодитой болгохоор ажиллаж байна. Тус байгууллага энэ сарын 13-нд СЕХ-нд нэрсийн жагсаалтаа өгнө. Vvнээс хойшхи шилжилт хөдөлгөөнийг тодотгосон тоогоо иргэний бvртгэлийн байгууллага манайд ирvvлэх ёстой. Бидхэсгийн хороодод хуулийн дагуу, тогтоосон хугацаанд нь сонгогчдын нэрсийн жагсаалтыг хvргvvлнэ.

-Сонгуульд хэдэн төгрөг зарцуулах вэ?
-Нөхөн сонгуулийн зардалд УИХ 146 сая төгрөгийн төсөв баталсан. Өнгөрсөн сарын 24-нд ЗГ-ийн тогтоолоор сонгуульд зарцуулах хөрөнгийг Засгийн газрын нөөцөөс гаргахаар шийдвэрлэсэн.

Т.Сэлэнгэ

У.Хүрэлсүх Н.Энхбаярыг ялав

sonin — Wed, 29 Jul 2009 04:34:21 +0000

-Намуудын бэл бэнчийн сонгууль болно-

Сонгуулийн ерөнхий хорооноос УИХ-ын сонгуулийн тухай хуульд оруулсан нэмэлт, өөрчлөлтийн дагуу нийслэлийн Чингэлтэй дүүргийн 24-р тойрогт явагдах нөхөн сонгуулийг 2009 оны есдүгээр сарын 18-ны өдрөөс эхлэхээр товлон зарласан. Санал хураалтыг 2009 оны аравдугаар сарын 18-ны өдөр явуулахаар УИХ-ын тогтоолын төсөл боловсруулж, улмаар тогтоолыг 2009 оны долдугаар сарын 22-ны өдрөөс дагаж мөрдөхөөр болсон билээ.
Хуулиндаа намууд нөхөн сонгуулийн санал хураах өдрөөс 40-өөс доошгүй хоногийн өмнө сонгуульд оролцох эсэхээ мэдэгдэх ёстой гэсэн заалт бий. Тиймээс есдүгээр сарын 8-наас өмнө намууд саналаа ирүүлж, дараа нь сонгуульд өрсөлдөх хүмүүсийнхээ нэрсийг ирүүлэх юм.

Гэвч намуудын сонгуульд өрсөлдөх хүмүүсийн нэр аль хэдийнэ тодорсон болохыг эх сурвалж мэдээллээ.
МАХН-аас “найдвартай” гэгдэж байсан нь У.Хүрэлсүх, Н.Энхбаяр. Тэдний “дайн” эцэслэсэн бололтой.
“Үхэл нь ирсэн хулгана муурын сахлаар оролдоно” гэгчийн үлгэрээр эрх мэдэл бүхий Н.Энхбаярын хамрыг зангидуулж, зүрхийг нь савлуулсныхаа горыг амсаж “шавилхан бацаан” У.Хүрэлсүх шоронгийн хаалга татаж, хэсэгтээ л хөөрхөн чадуулсан.
Дараа нь өш хонзонгоо тайлж байна уу гэлтэй Н.Энхбаярыг газар дор ортол муулж, хар пи-ардаж байсан тэрээр Ерөнхийлөгчийн сонгуулийн өмнөхөн гэнэт “дайсан”-ыхаа талд орж, ая тал засч эхэлсэн нь улс төрийнхөн төдийгүй ард түмнийг гайхшрал, эргэлзээнд оруулсан юм.
2000 онд МАХН үнэмлэхүй ялалт байгуулж, МАСЗХ-ноос У.Хүрэлсүх ганцаараа УИХ-ын гишүүн болж, түүнтэй хамт тэмцэж явсан олон залуу гудамжинд хаягдан хоцорсон.
Эрх ашгийнхаа төлөө хэдийд ч, хэнд ч урваж, хэнийг ч зольж чадах “хамелеон” У.Хүрэлсүх энэ удаагийн нөхөн сонгуулийн өрсөлдөөнд намын хүрээнд Ерөнхийлөгчийн өндөр сэнтийгээс буусан Н.Энхбаярыг ардаа үлдээв. Өөрөөр хэлбэл нөхөн сонгууль явагдах 24-р тойрогт намынх нь нөхөд “экс” ерөнхийлөгч Н.Энхбаяраас илүүтэйгээр У.Хүрэлсүхэд итгэл хүлээлгэж байгаа бололтой.
Албан бус эх сурвалжийн мэдээлснээр МАХН-ын удирдлага Хотын дарга Г.Мөнхбаярыг суудлаас нь буулгах зорилгоор энэ удаагийн нөхөн сонгуульд нэрийг дэвшүүлж, оронд нь Нийслэлийн Засаг даргын орлогч Б.Мөнхбаатарыг тавих зорилготой байжээ. Харамсалтай нь үер усны гамшиг тохиож Г.Мөнхбаярыг унагах ажиллагаа амжилтгүй болсон гэнэ. Тэгээд ч олон хүний амь нас эрсдсэн тул түүнд ялах магадлал тун багаас гадна хариуцлага тооцох асуудал яригдаж эхэлсэн. Тиймээс Хувьсгалт нам Г.Мөнхбаярын нэрийг дэвшүүлэхээс татгалзсан сурагтай.
Харин Ардчилсан намын хувьд одоогийн байдлаар “Сонгогчдын боловсрол төвийн тэргүүн Р.Бурмаа манлайлж явна. Сонгогчид ч ам сайтай байгааг нуугаагүй. Тус намынхан түүнийг нөхөн сонгуульд ялалт байгуулах бүрэн боломжтой хэмээн дүгнэж байгаа ажээ.

УИХ-ын 2008 оны сонгуульд Ардчилсан намаас Чингэлтэй дүүрэгт нэр дэвшсэн тэрээр тухайн үед жагсаалтад байхгүй хүнээр санал өгүүлсэн, дүнгийн хорооны тогтоол, бичиг баримтууд 1104-өөр зөрсөн зэрэг сонгуулийн булай булхай, хууль бус үйлдлийг илчилсэн олон баримт дэлгэж байв.
Тэр ч бүү хэл СЕХ-ны дарга Б.Баттулгын тогтоолоор санал хураалт явуулсан Улаанбаатар, Дархан-Уул, Эрдэнэтэд луйвар явагдсаныг ч илчилж байсан.
Тэрээр “Дараа дараагийн олон сонгуульд зохион байгуулагчдын хууль бус байдлыг зогсоохын тулд, сонгууль будилуулбал хариуцлага оногддогийг жишиг болгохын тулд яваа. Цаашид хэн хэгнийг “Чи нэр дэвшигчээ ялуулбал, мөнгөөр албан тушаалаар шагная…” гэсэн улстөрч, улстөрийн нам, хүчин өөрөө ийм ялтай, хариуцлагатай шүү гэдгийг би харуулахын тулд явж байна” гэдгээ өгүүлдэг.
Ардчилсан намаас УИХ-ын гишүүн асан Б.Батбаатарыг тус тойрогт нэр дэвших сураг дуулдаж байсан. Харамсалтай нь түүнд тойргийн сонгогчид тийм ч ам сайтай бус байгаа аж.
Нөхөн сонгуулийн хамгийн хачирхалтай өрсөлдөгчөөр “Эрэл”-ийн Б.Эрдэнэбатын нэр цохиж яваа. Гэнэт газрын хаанаас гараад ирэв хэмээн өрсөлдөгчид нь түүнээс ихэд “цэрвэж” байгаа сурагтай.
Өнгөрсөн оны долдугаар сарын 1-ний өдөр УИХ-ын 2008 оны сонгуулийн дүн будилаантсанаас болж иргэдийн цуглаан үймээн болж, улмаар улсын эд хөрөнгө шатаж, сүйдсэн хэрэгт “манлайлсан” хэмээн цоллогдож, сэжигтнээр шалгагдаж байсан Бүгд найрамдах намын тэргүүн Б.Жаргалсайхан нөхөн сонгуульд өрсөлдөхөөр болжээ. Ерөнхийлөгч Ц.Элбэгдоржийн өргөн барьсан Өршөөлийн тухай хуулийн төсөл батлагдсанаар тэрээр ялаас мултарсан учир ийнхүү нэрээ дэвшүүлэн өрсөлдөж буй юм байна. Ерөнхийлөгчийн сонгуулиар Н.Энхбаярт зусардан долигонож явсан мань эрийг үнэндээ Ц.Элбэгдорж аварсан нь энэ.
Үндэсний шинэ намын хувьд нөхөн сонгуульд нэр нь дуулдаж асан нарийн бичгийн даргынхаа нэрийг М.Энхсайханаар сольж буй ажээ. Харин Монголын уламжлалын нэгдсэн намаас С.Батболд нэрээ дэвшүүлж өрсөлдөх бололтой.
Дашрамд дурдахад УИХ-ын сонгуулийн 24-р тойргийн нөхөн сонгуульд Иргэний зориг нам Ногоон намтай хамтран оролцох болсныг эх сурвалж мэдээлэв.
Улс төрчид энэ удаагийн нөхөн сонгуулийг “Мөнгөний сонгууль болно, хэр их мөнгө хаясан нь дийлэх тулаан” хэмээн дүгнэжээ. Намууд нөхөн сонгуульд ялалт байгуулахын төлөө улайрч байна.
Сэтгүүлч Д.Эрдэнэтуяа

Нөхөн сонгууль аравдугаар сарын 18-нд болно

sonin — Thu, 16 Jul 2009 03:29:20 +0000

-Нөхөн сонгуулийн зардалд нийт 14615963 төгрөг зарцуулна-

УИХ дахь Төрийн байгуулалтын байнгын хорооны өчигдрийн хуралдаанаар УИХ-ын нөхөн сонгуулийн тов зарлах тухай болон УИХ-ын нөхөн сонгуулийн зардлын хэмжээг тогтоох тухай УИХ-ын тогтоолын төслүүдийг хэлэлцэх эсэхийг шийдэв. Сонгуулийн тухай хуульд энэ сард өөрчлөлт орж, УИХ-ын гишүүн чуулганд ороод гарсан бол орж, гарснаас хойш 30 хоногийн дотор Сонгуулийн ерөнхий хороо нөхөн сонгуулийн товыг УИХ-д ирүүлэх тухай заасан. Уг саналыг хүлээн авснаас хойш УИХ 14 хоногийн дотор нөхөн сонгуулийн товыг зарлана. Шинэ хуулийн заалтад “Сонгуулийн хэсгийг санал авах өдрөөс 25,
тойргийн хороог 20, салбар болон хэсгийн хороодыг 15-аас доошгүй хоногийн өмнө байгуулна” гэж өөрчлөлт оруулсан.
Байнгын хорооны хуралдаанаар Чингэлтэй дүүрэгт болох нөхөн сонгуулийн сурталчилгааны ажлыг ирэх есдүгээр сарын 18-ны өдөр эхлүүлж, дараа сарын 18-нд санал хураалт явуулахаар товлов. Тус дүүрэгт нэг тойргийн хороо, 22 хэсгийн хороо ажиллах юм. Мөн нөхөн сонгуульд зарцуулах зардлын хэмжээг тус бүрээр нь нарийвчлан гаргасан аж. Нөхөн сонгуулийн зардалд нийт 14615963 төгрөг зарцуулахаар уг тогтоолын төсөлд тусгасан байна. Уг мөнгийг Засгийн газрын нөөц хөрөнгөөс гаргана.

Ц.Хүү

Чингэлтэйн нөхөн сонгуулиар дахин нэг нам УИХ-д суудалтай болох уу?

sonin — Fri, 29 May 2009 02:14:49 +0000

Монгол улсын Ерөнхийлөгчийн 2009 оны сонгуульд АН-аас нэр дэвшсэн Цахиагийн Элбэгдорж урьдчилсан дүнгээр ялалт байгуулаад буй билээ. Тиймээс ч түүний УИХ-д сонгогдсон нийслэлийн Чингэлтэй дүүргийн тойрогт нөхөн сонгууль явагдах учиртай. Өмнөх практикаас харахад экс гишүүн нь ертөнцийн мөнх бусыг үзүүлсэн тохиолдолд Монгол ёсыг бодон, талийгаачийн дөчин ёс хоногийг өнгөрөөж байж, сонгууль явуулдаг байсан ч хуулийн хугацаагаараа бол тухайн УИХ-ын гишүүн үүрэгт ажлаа гүйцэтгэхээ больсноос хойш даруй 14 хоногийг дотор нөхөн сонгууль зарлагдах ёстой байдаг аж. Энэ удаад шинээр сонгогдсон Ерөнхийлөгч тангараг өргөснөөс хойш 14 хоногийн дотор нөхөн сонгуулийн товыг зарлана хэмээн Сонгуулийн Ерөнхий Хорооны дарга Ч.Содномцэрэн мэдэгдээд байна. Өөрөөр хэлбэл энэ оны 8 дугаар сарын сүүлээр Чингэлтэйд УИХ-ын нөхөн сонгууль явагдах юм. Уг сонгуульд МАХН намынхаа ерөнхий нарийн бичгийн дарга У.Хүрэлсүхийг сойж магадгүй байна. Харин АН-аас УИХ-ын гишүүн асан, Чингэлтэй дүүргийн АН-ын дарга Б.Батбаатар нэр дэвшихээр төлөвлөж уг дүүргийн намын байгууллагыг удирддаг, Ц.Элбэгдоржийн ойрын хамтрагч зэрэг хүчин зүйлүүддээ найдаж буй ч Д.Дорлигжав, Д.Эрдэнэбат, “Ажнай” Д.Бат-Эрдэнэ нараас сонголт хийгдэж ч болзошгүй байна. Харин М.Энхсайханы үүсгэн байгуулсан ҮШН уг нөхөн сонгуульд онцгой ач холбогдол өгч оролцохоор шийдсэн сурагтай. ҮШН-аас тус намын ерөнхий нарийн бичгийн дарга Б.Цогтгэрэл нэр дэвшиж магадгүй агаад тэрээр өмнө нь Ц.Элбэгдоржтой өрсөлдөж байсан, Чингэлтэйн боловсролтой хэсэгт бас ч үгүй танигдсан нэгэн аж. Хэдийгээр Эх орон намын дарга Б.Эрдэнэбат намынхаа аппаратын ажилтан руу Англиас утасдаж, “Миний тухай жижиг ч хамаагүй мэдээ сонин дээр гаргаад байж бай” гэж хэлснээс эхлээд “Улс төрийн сонин”-ы эрхлэгч, Ногоон намын гишүүн Г.Уянга, МУНН-ын ерөнхий нарийн бичгийн дарга Б.Батболд гээд нэр дэвших хүсэлдээ автсан хүн олон байгаа ч улс төрийн гуравдагч хүчнүүд хамтарч оролцож байж л аль нэг нь УИХ-д суудалтай болох боломжтой билээ.

Б.Саруул

Сонгуулийн урьдчилсан дүн

sonin — Tue, 26 May 2009 03:26:42 +0000

Сонгуулийн Ерөнхий Хорооноос Монгол Улсын Ерөнхийлөгчийн сонгуулийн урьдчилсан байдлаар гарсан дүнг танилцууллаа.

Сонгуулийн ерөнхий хорооны удирдлагууд сэтгүүлчдэд мэдээлэл хийлээ. Монгол Улсын хэмжээнд төрийн тэргүүнийг сонгох энэ удаагийн сонгуульд 1 сая 97 мянган сонгогч саналаа өгснөөс 562459 сонгогч Ардчилсан намаас нэр дэвшсэн Ц.Элбэгдоржид, 520805 иргэн МАХН-аас нэр дэвшсэн Н.Энхбаярт тус бүр саналаа өгсөн аж.

Үүнийг хувьд шилжүүлбэл улсын дүнгээр Ц.Элбэгдорж 51.24, Н.Энхбаяр 47.44 хувийн санал аваад байна. Аймгийн дүнгээр нэр дэвшигч Ц.Элбэгдорж 48.28, Н.Энхбаяр 50.31 хувийн санал авчээ. Нийслэл Улаанбаатарт Ц.Элбэгдорж 55.9, Н.Энхбаяр 43.21 хувийн санал авсан гэсэн урьдчиласан дүн гараад байгаа юм байна.

Ц.Элбэгдоржийг дэмжигчдийн цуглаан /фото сурвалжлага/

sonin — Mon, 25 May 2009 10:19:44 +0000

Монгол улсын Ерөнхийлөгчийн сонгуулийн урьдчилсан дүнгээр ялалт байгуулаад буй УИХ-ын гишүүн Цахиагийн Элбэгдорж өнөөдөр нийслэл Улаанбаатар хотын төв Сүхбаатарын талбайд өөрийн дэмжигчидтэй уулзаж, баярын цуглаан зохион байгууллаа. Цуглаанаас хийсэн фото сурвалжлагыг хүлээн авч үзнэ үү?

Ерөнхийлөгчийн сонгуульд ялалт байгуулаад буй Ц.Элбэгдорж руу гутал шиджээ

sonin — Mon, 25 May 2009 09:57:55 +0000

Жанжин Д.Сүхбаатарын талбайд болж өнгөрсөн Ц.Элбэгдоржийг дэмжигчдийн баярын цуглааны үеэр нэгэн залуу Монгол улсын Ерөнхийлөгчийн сонгуульд урьдчилсан дүнгээр ялалт байгуулаад буй УИХ-ын гишүүн Ц.Элбэгдорж руу өөрийн өмсөж явсан гутлыг тайлан шидлээ. Гуч орчим насны уг залуу ямартай ч согтуу байгаагүй бөгөөд талбайн хамгаалалтанд гарч байсан цагдаагийн ажилтнууд түүнийг тэр дор нь саатуулжээ. Үйл явдал хэтэрхий хурдан болж өнгөрсөн ч манай гэрэл зурагчны дуранд зарим хэсэг нь үлдсэн байна.
Д.Санаасайн

Иргэний хөдөлгөөнүүд Ерөнхийлөгчийн сонгуульд хэнийг дэмжиж оролцсон бэ?

sonin — Mon, 25 May 2009 08:53:30 +0000

Монгол улсын Ерөнхийлөгчийг сонгох 2009 оны сонгуулийн дүн гарч, АН-аас нэр дэвшсэн УИХ-ын гишүүн Ц.Элбэгдорж урьдчилсан дүнгээр ялалт байгуулаад байна.
Энэ удаагийн Ерөнхийлөгчийн сонгуульд УИХ-д суудал бүхий дөрвөн намаас нэг нь дангаараа нэр дэвшүүлж, гурав нь хамтарч оролцсон билээ. Харин сүүлийн жилүүдэд нийгэм, улс төрийн амьдралд нэн идэвхтэй оролцох болсон иргэний хөдөлгөөнүүд Ерөнхийлөгчийн хэрхэн оролцов? “Эрүүл нийгэм иргэний хөдөлгөөн”, иргэдийн “Альяанс” төв, Шударга иргэний фронт, Монголын үндэсний ногоон хөдөлгөөн зэрэг хөдөлгөөн АН-аас Монгол улсын Ерөнхийлөгчийн сонгуульд нэр дэвшсэн Ц.Элбэгдоржийн талд ажиллаж байсан бол МАХН-аас Монгол улсын Ерөнхийлөгчид нэр дэвшигч, Монгол улсын Ерөнхийлөгч Н.Энхбаярыг “Үндэсний Соёмбо”, “Миний Монголын газар шороо”, “Хөх Монгол” хөдөлгөөнүүд дэмжиж байсан билээ. Мөн нэгэн сонирхолтой зүйл болсон нь “Фэнг шүй”-гээр овоглодог С.Ганбаатарын үүсгэн байгуулсан “Эрс шинэчлэл” хөдөлгөөний удирдлага хоёр хуваагдан н.Батзориг тэргүүтэй хэсэг нь Н.Энхбаярыг, н.Энхбат тэргүүтэй хэсэг нь Ц.Элбэгдоржийг дэмжин уриалга гаргаж байсан явдал юм. Харин “Иргэдийн шударга шүүх” ТББ-ын тэргүүн Х.Бат-Ялалт урьдчилан саатуулагдах байранд хоригдож байгаад гарч ирсэн даруйдаа Ерөнхийлөгчийн сонгуулийн ажилд идэвхийлэн оролцож, МАХН-тай хамтран ажиллах гэрээ байгуулж, иргэний хөдөлгөөнүүд нэгдэн, үймээн гаргахгүй гэсэн мэдэгдэл хийлгэх гэхчилэн манаргасан билээ. Юутай ч энэ удаагийн сонгууль иргэний хөдөлгөөнүүдийн ашиг сонирхлыг олонд ил болоход бага ч атугай нөлөөлсөн гэж дүгнэж болох юм.

Б.Буд

Сүхбаатарын талбайд цуглаан боллоо /видео/

sonin — Mon, 25 May 2009 08:43:40 +0000

Жанжин Д.Сүхбаатарын талбайд Монгол улсын Ерөнхийлөгчийн 2009 оны сонгуульд ялалт байгуулаад буй Ц.Элбэгдоржийг дэмжигчдийн баярын цуглаан болж өнгөрлөө. Ардчилсан нам уг нь өнөөдөр албан ёсны урлаг соёлын арга хэмжээ зохион байгуулахаар төлөвлөж байсан ч сонгуулийн санал тооллогын албан ёсны дүн гарсны дараа буюу энэ бямба, ням гаригт болгон хойшлуулжээ. Цуглаанаас хийсэн “Ийгл”, “ТМ” телевизүүдийн сурвалжлагыг хүргэж байна.

Талбайн ойр орчимд туг, далбааны наймаачид олшров

sonin — Mon, 25 May 2009 08:13:28 +0000

Монгол улсын Ерөнхийлөгчийг сонгох 2009 оны сонгуульд ялалт байгуулсан Цахиагийн Элбэгдоржийн иргэдтэй хийх уулзалт, баярын цуглаан Сүхбаатарын талбайд болж байна. Талбайд нийгмийн олон давхаргын бүхий л насныхан цуглаад буй агаад гартаа “Өөрчилье” гэсэн уриа бүхий туг, дарцаг, Монгол улсын төрийн далбаа барьцгаажээ. Үүнтэй зэрэгцэн талбай дээр туг, далбаа зарах наймаачид олширч, гэнэт үүссэн “эрэлт”-ийг хангаж байна. Машины тогтоогч бүхий далбаа 3000 төгрөгний үнэтэй байгаа бол жижиг далбаа 1500-2000 –аар зарагдаж буй аж.

Б.Саруул

МАХН сонгуулийн дүнг хүлээн зөвшөөрлөө /дүрстэй мэдээ/

sonin — Mon, 25 May 2009 08:12:33 +0000

МУ-ын Ерөнхий сайд, МАХН-ын дарга С.Баяр, Ерөнхийлөгч Н.Энхбаяр, МАХН-ын ерөнхий нарийн бичгийн дарга У.Хүрэлсүх, нарийн бичгийн дарга Барсболд нар Төрийн ордонд мэдээлэл хийлээ. Тэрээр АН-ын нэр дэвшигч Ц.Элбэгдоржид ялалт байгуулж байгаад нь баяр хүргэлээ.

Мөн Ерөнхийлөгч Н.Энхбаяр мэдэгдэл хийж байгаа бөгөөд тэрээр хэлэхдээ “албан ёсны дүн гараагүй ч урьдчилсан дүнгээр Ц.Элбэгдорж ялалт байгуулсан дүн гаржээ, сонгуулийн дүнг хүндэтгэж байна. Надад санал өгсөн хүмүүст баярлалаа. Ц.Элбэгдоржид цаашдаа Засгийн газар, УИХ-тай хамтарч ажиллахыг хүсье. Би Ц.Элбэгдорж руу утасдаагүй байгаа. Одоо амарч байгаа байлгүй. Би утасдаж, эсвэл урьж уулзаж энэ бүх саналаа хэлнэ. Би Монголынхоо ард түмэнд үргэлж баярлаж явдаг. Цаашид бидний хамтын ажиллагаа идэвхтэй өрнөж, би өөрийнхөө мэдлэг боловсрол, туршлагаа улсынхаа хөгжлийн төлөө харамгүй дайчлан ажиллах болно гэдгээ илэрхийлье” гэлээ.

Монгол улсын Ерөнхийлөгч Н.Энхбаяр дээрх мэдэгдлийг хийснийхээ дараа ердөө хоёр л сэтгүүлчийн асуултад хариулт өгөхийг зөвшөөрсөн юм.
-УИХ-ын нөхөн сонгууль Чингэлтэй дүүрэгт явагдах нь ойлгомжтой боллоо. Та нөхөн сонгуульд нэр дэвших үү?
-Сонин санаа байна.
-Төрийн хар хайрцагны бодлогын талаар та Ц.Элбэгдоржид хандаж хэлж өгч зөвлөнө биз дээ?
-Төрийн хайрцагны бодлогын чиглэлээр хэлж ярьж хийх зүйл их байгаа. Энэ бодлого уламжлагдаж явж байх ёстой юм. Та бүхэнд сайн сайхан бүхнийг хүсэн ерөөе. Эргээд ч энэ талаар олон удаа уулзаж ярилцах байх аа.
Ийнхүү төрийн ордонд МАХН-ын удирдлага, Монгол улсын Ерөнхийлөгч хамтран хийлгэсэн товчхон хэвлэлийн хурал өндөрлөлөө.

Хэвлэлийн хурлаас ТV9 болон Eagle телевизүүдийн бэлтгэсэн мэдээллийг та бүхэндээ хүргэж байна.

Б.Саруул

Сүхбаатарын талбайгаас /фото, видео/

sonin — Mon, 25 May 2009 07:59:45 +0000

Ардчилсан Намаас Ерөнхийлөгчид нэр дэвшигч Ц.Элбэгдорж урьдчилсан байдлаар ялалт байгуулсантай холбоотойгоор АН-аас 15.00 цагт цуглаан зохиохоор зарласан боловч одоогийн байдлаар тайз засал зэрэг шалтгааны улмаас эхлээгүй байна.

Яг одоо Сүхбаатарын талбай дээр Монгол улсын Ерөнхийлөгчийн сонгуульд ялалт байгуулсан Ц.Элбэгдорж иргэдтэй хийх уулзалт, баярын цуглаан эхлэх гэж байна. Монгол улсын болон АН-ын туг, далбаа барьсан олон зуун хүн төв талбай дээр цуглаад буй бөгөөд талбайн ойр орчимд цагдаагийн хамгаалалт гарсан ч энэ нь ямар нэгэн үймээн самуунтай холбоотой үйлдэл огт биш гэж цагдаагийн ажилтнууд мэдэгдэж буй юм. Арга хэмжээний хөтөлбөрт урлаг, соёлын тоглолт ч багтаж буй аж.

15.40 цагийн үед Сүхбаатарын талбайд байдал ямархуу байгаа мэдээллийг хүргэж байна.

Сонгуулийн явцын мэдээ /дүрстэй мэдээ/

sonin — Mon, 25 May 2009 07:12:29 +0000

Монгол улсын ерөнхийлөгчийн сонгуулийн явцын талаар ММ агентлагийн бэлтгэсэн мэдээг хүргэж байна

АН-ын байрны гадаа /дүрстэй мэдээ/

sonin — Mon, 25 May 2009 07:11:12 +0000

Монгол улсын Ерөнхийлөгчийн 2009 оны сонгуульд АН-аас нэр дэвшсэн Цахиагийн Элбэгдоржийн ялалт байгуулах нь тодорхой болоод буй. Өнөө өглөөнөөс эхлэн АН-ын төв байр олны хөл хөдөлгөөнд дарагдлаа. Намын ҮЗХ-ы гишүүдээс эхлээд жирийн хөдөөгийн сонгогчид хүртэл шинээр сонгогдсон Ерөнхийлөгчийн баяр хөөрөөс хуваалцахаар цугларч байна.
АН-ын төв байрны эргэн тойронд болж буй үйл явдлаас “ТВ-5” телевизийн бэлтгэсэн сурвалжлагыг хүргэе.
АН-аас өнөөдөр 15 .00 цагт Сүхбаатарын талбайд албан ёсны баярын цуглаан зохион байгуулах юм.

А.Тэлмэн

Ц.Элбэгдорж 35 000 саналын зөрүүтэй ялалт байгуулжээ

sonin — Mon, 25 May 2009 07:09:28 +0000

Ардчилсан намын удирдлагууд өглөөний 06.30 цагт сэтгүүлчдэд мэдээлэл хийлээ. Тус намын дарга Н.Алтанхуягийн мэдээлсэнээр Монгол улсын 2009 оны Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж өрсөлдөгчөөсөө 35 мянган саналын зөрүүгээр хол тасарсан байна. Тэрээр сэтгүүлчидтэй уулзах үеэр “Монгол улсын шинэ Ерөнхийлөгчид баяр хүргэе” хэмээн дуу алдсан юм.
Тодруулж хэлбэл, найман аймаг, нийслэлийн есөн дүүргийн зургаан том дүүрэгт үнэмлэхүй ялалт байгуулжээ. Улаанбаатар хотын хувьд авч үзвэл Баянзүрх дүүргийн хэмжээнд 10 мянган саналаар, Чингэлтэй дүүрэгт 9000 санал, Баянгол дүүрэгт 5000 саналаар, Сонгинохайрхан дүүрэгт 9130, Хан-Уул дүүрэгт 3200, Сүхбаатар дүүрэгт 7140 саналаар илүүрхэж, Монгол Улсын анхны Ардчилсан Ерөнхийлөгч болох болзлыг хангалаа гэж тус намынхан тодорхойлсон юм. Түүнчлэн АН-ын дарга Н.Алтанхуяг “Ардчилсан ерөнхийлөгчтэй болох юм сан гэж санал өгсөн нийт сонгогчдодоо баярласнаа илэрхийлье. Энэ сонгуулийг амжилттай явуулахад хүчин зүтгэсэн Ардчилсан нам, Иргэний Зориг нам, Монголын ногоон нам, Иргэний хөдөлгөөнүүдийн гишүүд, дэмжигчдэд бүгдэд нь талархал илэрхийлье. Ц.Элбэгдоржид баяр хүргэж, шударга амьдралыг бий болгохын төлөө ажиллахыг хүсье” гэлээ.

Ц.Элбэгдорж 8 аймаг, 8 дүүрэгт, Н.Энхбаяр 1 дүүрэг, 13 аймагт ялалт байгуулжээ

sonin — Mon, 25 May 2009 07:08:35 +0000

Өглөөний 06.30 цагт АН өөрийн төв байран дээр сэтгүүлчдэд мэдээлэл хийлээ. Хэвлэлийн хурлын үеэр АН-ын дарга, Монгол улсын тэргүүн шадар сайд Н.Алтанхуяг: “Монгол улсын 2009 оны Ерөнхийлөгчийн сонгуульд Ардчилсан намаас нэр дэвшигч Ц.Элбэгдорж өрсөлдөгчөөсөө 35 мянган саналын зөрүүгээр хол тасарч Монгол улсын шинэ Ерөнхийлөгч боллоо. Тодруулж хэлбэл, нэр дэвшигч маань нийт найман аймаг, нийслэлийн есөн дүүргийн наймт нь үнэмлэхүй ялалт байгуулжээ. Улаанбаатар хотын хувьд авч үзвэл Баянзүрх дүүргийн хэмжээнд 10 мянган саналаар, Чингэлтэй дүүрэгт 9000 санал, Баянгол дүүрэгт 5000 саналаар, Сонгинохайрхан дүүрэгт 9130, Хан-Уул дүүрэгт 3200, Сүхбаатар дүүрэгт 7140 санал авсан байна” хэмээн албан ёсоор мэдэгдэв.
Мөн үүнтэй зэрэгцэн МАХН хэвлэлийн хурал зарлажээ. 09.00 цагаас МАХН-ын төв байран дээр болох уг хурлын үеэр тэд сонгуулийн үр дүнгийн талаар мэдээллэх аж.
Харин СЕХ-ны удирдлагууд намууд ээлжлэн хэвлэлийн хурал хийж, зөрүүтэй мэдээлэл хийж буйг буруушаагаад сонгуульд хэн ялалт байгуулсан нь тодорхой бус хэвээр байна, СЕХ эцсийн, үнэн дүнг танилцуулна хэмээн өгүүллээ.

М.Сэргэлэн

АН –ын сонгуулийн штаб сонгуулийн дүнгийн талаар мэдээллээ /дүрстэй мэдээ/

sonin — Mon, 25 May 2009 07:07:19 +0000

АН-ын сонгуулийн төв штаб Монгол улсын Ерөнхийлөгчийн 2009 оны сонгуулийн саналын хуудасыг тоолох үйл явцын талаар мэдээлэл хийлээ.
УИХ дахь АН-ын бүлгийн ахлагч, УИХ-ын гишүүн Ч.Сайханбилэг, АН-ын сонгуулийн төв штабын нарийн бичгийн дарга Д.Дорлигжав нар мэдээлэл хийх үеэрээ одоогоор дүн нь тодорхой болсон 236 багийн 158 д нь Ц.Элбэгдорж ялалт байгуулсан тухай мэдэгдсэн юм.
Дэлгэрэнгүй мэдээллийг “Ийгл” телевизийн бэлтгэсэн сурвалжлагаас үзнэ үү?